Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Jakọbu 1:1-27

1  Jakọbu, afanumẹ Jiwheyẹwhe po Oklunọ Jesu Klisti po tọn, hlan whẹndo wiawe he gbàpe lẹ: Yẹn dọnudo mì!  Mẹmẹsunnu ṣie lẹ emi, mì nọ pọ́n ẹn hlan di ayajẹ nugbonugbo, to whenuena mì pehẹ whlepọn voovo lẹ,  dile mì yọnẹn do dọ nuhọakuẹ-yinyin yise mìtọn tọn he yin whiwhlepọn ehe, nọ wazọ́n akọndonanu tọn.  Ṣigba, mì gbọ akọndonanu ni wà azọ́n etọn dotana, na mìwlẹ nido sọgan sọgbe bosọ pegan mlẹnmlẹn, bo ma jẹdò nudepope tọn.  Enẹwutu, eyin depope to mì mẹ gbọagba nuyọnẹn tọn, gbọ e ni nọ to bibiọ Jiwheyẹwhe zọnmii, na ewọ nọ yí alọtútlú do na mẹlẹpo matin whẹgbledomẹ; podọ e na yin nina ẹn.  Ṣigba e ni nọ to bibiọ zọnmii to yise mẹ, matindo ayihaawe depope, na ewọ he tindo ayihaawe tin taidi agbówhẹn ohù tọn he jẹhọn to hinhẹn dánpe bo to yigọyigọ-dona.  Na nugbo tọn, na omẹ enẹ ni ma lẹndọ emi na mọ nudepope yí sọn Jehovah dè blo;  gbẹtọ ayihaawenọ de wẹ ewọ, bo ma lodo to aliho etọn lẹpo ji.  Ṣigba, gbọ mẹmẹsunnu wamọnọ ni jẹaglin do zizedaga etọn ji, 10  podọ adọkunnọ do hinhẹn whè etọn ji, na ewọ na juwayi di vounvoun ogbé tọn. 11  Na owhè nọ zẹ̀ po yozò sinsinyẹn etọn po bo nọ hẹn ogbé yọ́, bọ vounvoun etọn nọ ja kọnyinai podọ whanpẹ awusọhia gbonu tọn etọn nọ gble. Mọdopolọ wẹ adọkunnọ na kupẹ́ do to aliho gbẹzan tọn etọn lẹ ji. 12  Ayajẹnọ wẹ omẹ lọ he to akọndona whlepọn zọnmii, na to whenuena e wá yin alọkẹyi e na mọ jẹgbakun ogbẹ̀ tọn lọ yí, he Jehovah dopagbe etọn na mẹhe zindonukọn nado to wanyina ẹn lẹ. 13  To whenuena mẹde tin to whlepọn glọ, mì dike e dọ dọ: “Jiwheyẹwhe wẹ to whiwhle mi pọ́n” blo. Na Jiwheyẹwhe ma sọgan yin whiwhlepọn po onú ylankan lẹ po mọjanwẹ ewọ lọsu ma nọ whlé mẹdepope pọ́n to aliho enẹ mẹ. 14  Ṣigba omẹ dopodopo nọ yin whiwhlepọn dile e yin dindọn yì bo yin omọ̀ dó na gbọn ojlo edetiti tọn dali. 15  Enẹgodo, ojlo lọ, to whenuena e ko mọhò, e nọ ji ylando; podọ to godo mẹ, to whenuena ylando ko yin wiwà pó, e nọ hẹn okú wá. 16  Mẹmẹsunnu mẹyiwanna ṣie lẹ emi, mì yin hinhẹn buali blo. 17  Aga wẹ nunina dagbe lẹpo gọna nunina pipé lẹpo nọ wá sọn, na e nọ jẹte wá sọn Otọ́ hinhọ́n olọn tọn lẹ lọ dè, podọ didiọ lilẹpe oyẹ̀ tọn de ma tin to ewọ dè. 18  Na ojlo etọn wẹ e yin wutu, e hẹn mí wá gbọn ohó nugbo tọn lọ dali, na míwlẹ nido yin sinsẹ́n tintan de to nudida etọn lẹ mẹ. 19  Mì yọ́n ehe, mẹmẹsunnu mẹyiwanna ṣie lẹ emi. Omẹ dopodopo dona nọ yawu nado sè, whleawu nado dọho, bo whleawu nado gblehomẹ; 20  na homẹgble gbẹtọ tọn ma nọ wazọ́n dodowiwa Jiwheyẹwhe tọn. 21  Enẹwutu mì de dihó lẹpo sẹ̀ po onú lankan enẹ po, yèdọ ylanwiwa, bo yí walọmimiọn do kẹalọyi didó ohó lọ tọn do mì mẹ, he penugo nado whlẹn alindọn mìtọn lẹ gán. 22  Ṣigba, mì lẹzun basitọ ohó lọ tọn lẹ, e ma yin sisètọ lẹ kẹdẹ gba, to mìdelẹ kiklọ po linlẹn agọ̀ po mẹ. 23  Na eyin mẹdepope yin sisètọ ohó lọ tọn, bo ma yin basitọ, omẹ ehe taidi dawe de he to nukunmẹ jọwamọ tọn etọn pọ́n to mẹpọ́nnu de mẹ. 24  Na e pọ́n ede, bo tọ́nyi podọ to afọdopolọji e wọn gbẹtọ wunmẹ he e yin. 25  Ṣigba ewọ he zín nukun do osẹ́n pipé he yin mẹdekannujẹ tọn lọ mẹ bo zindonukọn to e mẹ, omẹ ehe, na e ko lẹzun basitọ azọ́n lọ tọn, bo ma yin sisètọ nuwọntọ, na yin ayajẹnọ to bibasi i mẹ. 26  Eyin omẹ depope lẹn to ede mẹ dọ emi nọ basi sinsẹ̀n to aliho he sọgbe mẹ ṣogan bo ma nọ dogànnuna odẹ́ etọn, ṣigba nọ to ahun edetiti tọn klọ zọnmii, ovọ́ wẹ wunmẹ sinsẹ̀n-bibasi omẹ ehe tọn. 27  Wunmẹ sinsẹ̀n-bibasi tọn he wé bo ma yin hinhẹnflu sọn pọndohlan Jiwheyẹwhe podọ Otọ́ mítọn tọn mẹ wẹ ehe: nado nọ penukundo tọṣiọvi lẹ po asuṣiọsi lẹ po go to nukunbibia yetọn mẹ, podọ nado nọ whlá mẹde matin dihó sọn aihọn dè.

Nudọnamẹ Odò Tọn