Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Heblu lẹ 9:1-28

9  Enẹwutu, alẹnu dai tọn lọ lọsu ko tindo osẹ́ndoai sinsẹ̀nzọn wiwe tọn lẹ po ofi wiwe aigba ji tọn etọn po.  Na abò tintan gòhọ lọ tọn mẹ wẹ miyọ́ngbántin de podọ tafo de ga gọna akla didetọn lẹ tin te; e sọ yin yiylọdọ “Ofi Wiwe lọ.”  Ṣigba, to họmẹgbòvọ̀ awetọ lọ godo wẹ abò gòhọ lọ tọn he nọ yin yiylọdọ “Fiwiwe Gbaugbau lọ” tin te.  Finẹ wẹ nuwhẹ́nwan-gbán sika tọn de podọ aki alẹnu tọn he yè kọ̀n sika lẹdo pé, ehe mẹ ozẹ́n sika tọn he mẹ manna tin te lọ podọ opò Aalọn tọn he jọ̀ amà gọna wekan-zannu alẹnu tọn lẹ tin te;  ṣigba kelubimi gigonọ lẹ tin to nùsu oyẹsu tọn lọ ji to aga bo ṣinyọnyẹ e ji. Ṣigba, e ma yin ojlẹ lọ die nado dọho gando onú ehelẹ go to gigọ́ mẹ gba.  To whenue onú ehelẹ ko yin awuwlena to aliho ehe mẹ godo, yẹwhenọ lẹ nọ biọ abò gòhọ tọn tintan lọ mẹ gbọzangbọzan nado basi sinsẹ̀nzọn wiwe lẹ;  ṣigba yẹwhenọ daho lọ kẹdẹ wẹ nọ biọ abò awetọ lọ mẹ whladopo to owhe dopo mẹ bo nọ hẹn ohùn he e nọ yí do sanvọ́ do ota edetiti tọn mẹ podọ na ylando he gbẹtọ lẹ wà to mayọnẹn mẹ lẹ.  Enẹwutu, gbigbọ wiwe hẹn ẹn họnwun hezeheze dọ aliho he biọ ofi wiwe lọ ma ko yin hinhẹn sọawuhia to whenue gòhọ tintan lọ gbẹ́ pò to ote.  Gòhọ ehe yin ohia de na ojlẹ dide he ko wá todin lọ, podọ nunina lẹ po avọ́sinsan lẹ po nọ yin bibasi to gbesisọ mẹ hẹ ẹ. Ṣigba, ehelẹ ma penugo nado hẹn ayihadawhẹnamẹnu mẹhe to sinsẹ̀nzọn wiwe wà lọ tọn zun pipé gba, 10  ṣigba núdùdù lẹ, núnùnù lẹ po baptẹm* voovo lẹ po kẹdẹ go wẹ yé gando. Yé yin nubiọtomẹsi osẹ́n tọn lẹ gando agbasalan go bo yin hinhẹn zun dandan kakajẹ ojlẹ dide lọ mẹ nado hẹn onú lẹ sọgbe. 11  Ṣigba, to whenue Klisti wá taidi yẹwhenọ daho onú dagbe he ko wá aimẹ lẹ tọn, gbọn gòhọ he klohugan bo yin pipé hugan he ma yin bibasi po alọ po gblamẹ, enẹ wẹ, dehe ma yin nudida ehe tọn, 12  ewọ ma biọ e mẹ po ohùn gbọgbọẹ lẹ tọn po podọ po oyìnsú winyanwinyan lẹ tọn po gba, lala, ṣigba ewọ biọ ofi wiwe lọ mẹ whladopo podọ kakadoi po ohùn edetiti tọn po bo mọ whlẹngán madopodo yí na mí. 13  Na eyin ohùn gbọgbọẹ lẹ tọn po oyìnsú lẹ tọn po gọna afín oyìn asiwhe tọn he yin húnhúnhún do mẹhe ko yin hinhẹnflu lẹ ji nọ hẹnmẹ zun wiwe jẹ obá lọ mẹ nado hẹn agbasalan zun wiwe, 14  nẹmunẹmu wẹ ohùn Klisti tọn, mẹhe gbọn gbigbọ madopodo dali yí ede do sanvọ́ hlan Jiwheyẹwhe matin oblọ ma na klọ́ ayihadawhẹnamẹnu mítọn lẹ wé sọn azọ́n kúkú lẹ mẹ na mí nido sọgan basi sinsẹ̀nzọn wiwe hlan Jiwheyẹwhe ogbẹ̀nọ lọ? 15  Enẹ wẹ zọ́n bọ ewọ do yin whẹgbọtọ alẹnu yọyọ de tọn, na mẹhe ko yin yiylọ lẹ nido sọgan mọ opagbe ogú madopodo lọ tọn yí, na ewọ ko kú nado tún yé dote sọn sẹ́nhẹngba lẹ mẹ to alẹnu dai tọn lọ glọ gbọn ofligọ dali. 16  Na eyin alẹnu de tin, okú mẹhe basi alẹnu lọ tọn yin dandan. 17  Na okú wẹ nọ hẹn alẹnu de lodo, na e ma nọ yin hinhẹn lodo gbede eyin mẹhe basi alẹnu lọ pò to ogbẹ̀. 18  Mọdopolọ, alẹnu dai tọn lọ ma yin didoai matin ohùn gba. 19  Na to whenue Mose ko hia gbedide Osẹ́n lọ tọn lẹpo na gbẹtọ lẹpo, e yí ofún vẹẹ ṣẹ́ṣẹ́ po hisọpu po do húnhún ohùn oyìnsú winyanwinyan lẹ tọn po gbọgbọẹ lẹ tọn po gọna osin do owe lọ lọsu po gbẹtọ lẹpo po go, 20  bo dọmọ: “Ehe wẹ ohùn alẹnu lọ tọn he Jiwheyẹwhe ko degbè etọn na mì.” 21  E sọ yí ohùn lọ bo húnhún in do gòhọ lọ go podọ do núzinzan sinsẹ̀nzọn gbangba tọn lẹpo go ga. 22  Mọwẹ, diblayin onú lẹpo wẹ yin kiklọwé po ohùn po sọgbe hẹ Osẹ́n lọ, podọ eyin ohùn ma yin kinkọ̀n jẹgbonu, jona depope ma nọ wá aimẹ. 23  Enẹwutu, dandan wẹ dọ apajlẹ jọnun onú olọn mẹ tọn lẹ tọn ni yin kiklọwé to aliho ehelẹ mẹ, ṣigba onú olọn mẹ tọn lẹ lọsu na yin kiklọwé gbọn avọ́sinsan he yọ́n hugan avọ́sinsan mọnkọtọn lẹ dali. 24  Na Klisti ma biọ ofi wiwe he yin bibasi po alọ po, he yin ohia onú jọnun lẹ tọn mẹ gba, ṣigba olọn lẹ lọsu mẹ wẹ ewọ biọ, nado sọawuhia todin to Jiwheyẹwhe lọsu nukọn na mí. 25  Mọdopolọ, e ma yin nado nọ yí ede do sanvọ́ gbọzangbọzan, dile yẹwhenọ daho lọ nọ biọ ofi wiwe lọ mẹ to whemẹwhemẹ po ohùn he ma yin edetiti tọn po do gba. 26  Eyin e ma yinmọ, ewọ na ko nọ jiya gbọzangbọzan sọn didoai aihọn tọn whenu. Ṣigba todin, ewọ ko hẹn ede sọawuhia whladopo podọ kakadoi to vivọnu titonu lẹ tọn nado de ylando sẹ̀ gbọn ede yíyí do sanvọ́ gblamẹ. 27  Podọ dile gbẹtọ lẹ dona kú whladopo podọ kakadoi, ṣigba bọ whẹdida na bọdo ehe go do, 28  mọdopolọ ga wẹ Klisti yí ede do sanvọ́ whladopo podọ kakadoi do nado hẹn ylando mẹsusu tọn; podọ whla awetọ he ewọ na sọawuhia ma na yin na ylando wutu, ṣigba e na yin na mẹhe to dindin in vẹkuvẹku na whlẹngán yetọn lẹ.

Nudọnamẹ Odò Tọn

Heb 9:10* Gbẹtọ lẹ po onú lẹ kiklọwé po he yin nubiọtomẹsi Osẹ́n Mose tọn.