Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Heblu lẹ 6:1-20

6  Na ehe tọn wutu, todin he mí ko yinukọn zẹ̀ nuplọnmẹ dodonu tọn Klisti tọn go, mì gbọ mí ni dovivẹnu bo lẹzun mẹhe whèwhín, bo masọ vọ́ dodonu de zedai ba blo, yèdọ lẹnvọjọ sọn azọ́n kúkú lẹ mẹ, podọ yise to Jiwheyẹwhe mẹ,  nuplọnmẹ gando baptẹm lẹ go po alọ zizedomẹji po, fọnsọnku oṣiọ lẹ tọn po whẹdida madopodo po.  Podọ na nugbo tọn, ehe wẹ mí na wà, eyin Jiwheyẹwhe dike.  Na e ma yọnbasi na mẹhe ko yin hinhẹnwa hinhọ́n nù to ojlẹ de mẹ wayi, podọ mẹhe ko dọ́ nunina vọnu olọn tọn pọ́n lẹ, podọ mẹhe ko lẹzun mahẹtọ gbigbọ wiwe tọn lẹ,  podọ mẹhe ko dọ́ ohó dagbe Jiwheyẹwhe tọn po huhlọn titonu he ja lọ tọn lẹ po pọ́n,  ṣigba he ko jai lẹ, nado yin hinhẹngọwa ogbẹ̀ whladopo dogọ nado lẹnvọjọ gba, na yelọsu vọ́ Visunnu Jiwheyẹwhe tọn whè do núgo bo de e hia na e nido mọ winyan to gbangba.  Di apajlẹ, aigba he nọ nù jikun he nọ saba ja do e ji, bọ to enẹgodo nọ hẹn onú he jẹ lẹ wú jẹgbonu na mẹhe pọ̀ ẹ lẹ, nọ mọ dona yí sọn Jiwheyẹwhe dè taidi kọdetọn de.  Ṣigba, eyin owùn po tẹwùn lẹ po wẹ e hẹn jẹgbonu, e nọ yin gbigbẹdai bo nọ dibla yin dẹ̀hodo; podọ to godo mẹ, e nọ yin fifiọ.  Ṣigba, mẹyiwanna lẹ emi, na mìwlẹ tọn, mí tindo nujikudo dọ mì to onú dagbe lẹ po nuhe nọ hẹn whlẹngán wá lẹ po basi, dile etlẹ yindọ mí to hodọ to aliho ehe mẹ. 10  Na Jiwheyẹwhe ma yin mawadodonọ nado wọn azọ́n mìtọn po owanyi he mì dohia na oyín etọn po, na mì ko yilizọn* na omẹ wiwe lẹ bosọ zindonukọn nado to lizọnyi. 11  Ṣigba, mí jlo dọ dopodopo mìtọn ni tindo vivẹnudido dopolọ nado sọgan tindo jidide mlẹnmlẹn gando todido lọ go kakajẹ opodo, 12  na mìwlẹ ma nado lẹzun adidọnọ, ṣigba nọ hodo apajlẹ mẹhe gbọn yise po sọwhiwhe po dali dugu opagbe lọ lẹ tọn lẹ. 13  Na to whenue Jiwheyẹwhe dopagbe lọ na Ablaham, na ewọ ma sọgan yí mẹhe yiaga hugan de do whlé wutu, e yí edetiti do whlé, 14  dọmọ: “Na jide tọn, to didona mẹ yẹn na dona we, podọ to jijideji mẹ yẹn na hẹn we jideji.” 15  Podọ gbọnmọ dali, to whenuena Ablaham ko yí sọwhiwhe do nọte godo, e mọ opagbe ehe yí. 16  Na gbẹtọ lẹ nọ yí mẹhe yiaga hugan de do whlé, bọ whiwhle yetọn nọ hẹn opodo wá na nudindọn lẹpo, na e yin jidenamẹnu de he sọgbe hẹ osẹ́n na yé wutu. 17  Mọdopolọ, to whenuena Jiwheyẹwhe jlo na dohia gudutọ opagbe lọ tọn lẹ to gigọ́ mẹ dọ lẹndai etọn ma sọgan diọ, e yí whiwhle de do hẹn ohó etọn lodo, 18  na e nido yindọ, gbọn onú he ma sọgan diọ awe gblamẹ to ehe mẹ e glo Jiwheyẹwhe nado dolalo te lẹ mẹ, míwlẹ he ko họnyi otẹn fibẹtado tọn lọ nido sọgan mọ tulinamẹ sinsinyẹn yí nado tẹdo todido he yin zizedonukọnna mí lọ go. 19  Todido ehe, he mí tindo tin taidi húnsingàn de na alindọn mítọn, bo yin nujikudo tọn bosọ lodo, podọ e nọ biọ e mẹ yì zẹ̀ họmẹgbòvọ̀ lọ go, 20  fie nukọntọ de, yèdọ Jesu, ko biọ do ota mítọn mẹ, mẹhe ko lẹzun yẹwhenọ daho de taidi Mẹlkizedẹki kakadoi.

Nudọnamẹ Odò Tọn

Heb 6:10* Kavi, “alọgọ.”