Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Heblu lẹ 3:1-19

3  Enẹwutu, mẹmẹsunnu mẹwiwe lẹ emi, mì he yin mahẹtọ oylọ olọn tọn lẹ, mì nọ lẹn apọsteli podọ yẹwhenọ daho he mẹ mì do yise hia te lọ tọn pọ́n—enẹ wẹ Jesu.  Ewọ yin nugbonọ na Omẹ lọ he hẹn ẹn yinmọ, dile Mose yin do ga to owhé Omẹ enẹ lọ tọn pete gbè.  Na ewọ yin pinpọnhlan nado jẹna gigo susu hú Mose, to whenuena e yindọ ewọ he gbá ẹ tindo gbégbò hugan ohọ̀ lọ.  Na nugbo tọn, ohọ̀ lẹpo wẹ nọ yin gbigbá gbọn mẹde dali, ṣigba mẹhe basi onú lẹpo wẹ Jiwheyẹwhe.  Podọ taidi devizọnwatọ de, Mose yin nugbonọ to owhé Omẹ enẹ lọ tọn pete gbè taidi kunnudenu nuhe na wá yin didọ to godo mẹ lẹ tọn,  ṣigba taidi Visunnu de, Klisti yin nugbonọ do owhé Omẹ enẹ lọ tọn ji. Míwlẹ wẹ yin owhé Omẹ enẹ lọ tọn, eyin mí tẹdo awuvivo hodidọ tọn mítọn podọ do awagundido mítọn na todido lọ go gligli kakajẹ opodo.  Na ehe tọn wutu, kẹdẹdile gbigbọ wiwe dọ do dọmọ: “Egbé, eyin mìwlẹ dotoaina ogbè etọn titi,  mì hẹn ahun mìtọn sinyẹn blo taidi to ojlẹ he mẹ homẹ yin hinhẹngble mi sinsinyẹn, taidi to azán he gbè yẹn yin tintẹnpọn to danfafa ji,  to ehe mẹ tọgbo mìtọn lẹ tẹ́n mi pọ́n te, mahopọnna dọ yé ko mọ azọ́n ṣie lẹ na owhe kande. 10  Na ehe tọn wutu, yẹn gblehomẹ do whẹndo ehe go bo dọmọ, ‘Whepoponu wẹ ahun yetọn nọ to dindanpe, bọ yelọsu lẹ ma ko wá yọ́n aliho ṣie lẹ.’ 11  Enẹwutu wẹ yẹn whlé to homẹgble ṣie mẹ dọ, ‘Yé ma na biọ gbọjẹ ṣie mẹ.’” 12  Mẹmẹsunnu lẹ emi, mì payi na mẹdepope to mì mẹ nikaa wleawuna ahun ylankan yise matindo tọn gbede gbọn agọjijoyigodo sọn Jiwheyẹwhe ogbẹ̀nọ lọ dè dali; 13  ṣigba mì nọ to tudohomẹna ode awetọ to azán lẹpo gbè, dile e na dẹnsọ bọ e na yin yiylọdọ “Egbé,” na huhlọn mẹkiklọ tọn ylando tọn nikaa hẹn ahun mẹdepope tọn to mì mẹ sinyẹn. 14  Na taun tọn, mí ma na lẹzun mahẹtọ po Klisti po eyin mí ma tẹdo jidide he mí tindo to bẹjẹeji lọ go gligli kakajẹ opodo, 15  to whenuena e to yinyin didọ dọmọ: “Egbé, eyin mìwlẹ dotoaina ogbè etọn titi, mì hẹn ahun mìtọn sinyẹn blo taidi to ojlẹ he mẹ homẹ yin hinhẹngble mi sinsinyẹn.” 16  Na mẹnu wẹ omẹ lọ lẹ he ko sè ṣogan bo hẹn homẹgble e sinsinyẹn? Na nugbo tọn, be e ma yin mẹhe tọ́njẹgbonu sọn Egipti to anademẹ Mose tọn glọ lẹpo wẹ wàmọ ya? 17  Humọ, mẹnu lẹ go wẹ Jiwheyẹwhe gblehomẹ do na owhe kande? Be e ma yin do mẹhe waylando bo kú to danfafa ji lẹ go wẹ ya? 18  Ṣigba, mẹnu lẹ wẹ ewọ whlé hlan dọ yé ma na biọ gbọjẹ etọn mẹ bọ e ma yin mẹhe vẹtoli lẹ wẹ? 19  Enẹwutu, mí mọdọ yé ma sọgan biọ e mẹ na yise matindo wutu.

Nudọnamẹ Odò Tọn