Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Heblu lẹ 13:1-25

13  Mì zindonukọn to owanyi mẹmẹsunnu tọn mìtọn mẹ.  Mì wọnji johẹmẹ go blo, na gbọn e dali, mẹdelẹ ko yí angẹli lẹ to mayọnẹn mẹ.  Mì nọ hẹn mẹhe to gẹdẹ gànpamẹ tọn mẹ lẹ do ayiha mẹ, taidi dọ mìlọsu ko yin didó gẹdẹ mẹ hẹ yé wẹ nkọ, podọ mẹhe to yinyin yasana lẹ, na mìlọsu lẹ gbẹ́ tin to agbasa mẹ.  Mì gbọ alọwle ni tindo gbégbò to nukun mẹlẹpo tọn mẹ, podọ adọ́zan alọwle tọn yin hinhẹnflu blo, na Jiwheyẹwhe na dawhẹna galọtọ lẹ po ayọdetọ lẹ po.  Mì gbọ aliho gbẹninọ tọn mìtọn ni tin matin wanyina akuẹ, na mì ni tindo pekọ po nuhe mì tindo* lẹ po. Na ewọ ko dọmọ: “Yẹn ma na jo mì do to aliho depope mẹ kavi gbẹ́ mì dai to aliho depope mẹ.”  Na mí nido sọgan gọ́ na adọgbigbo bo dọmọ: “Jehovah wẹ alọgọtọ ṣie; yẹn ma na dibu. Etẹwẹ gbẹtọ sọgan wà na mi?”  Mì nọ flin mẹhe to anadenanu to ṣẹnṣẹn mìtọn lẹ, mẹhe ko dọ ohó Jiwheyẹwhe tọn na mì lẹ, podọ dile mì to nulẹnpọndo kọdetọn walọyizan yetọn tọn ji, mì nọ hodo apajlẹ yise yetọn tọn.  Nudopolọ wẹ Jesu Klisti yin to osọ he wayi, to egbé podọ kakadoi.  Mì yin hinhẹn buali gbọn nuplọnmẹ voovo lẹ po dehe mì ma jẹakọ hẹ lẹ po dali blo; na onú dagbe wẹ e yin dọ ahun ni yin hinhẹn lodo gbọn nukundagbe majẹhẹ dali, e ma yin gbọn núdùdù lẹ dali, ehe ma ko hẹn ale depope wá na mẹhe yí yé do hẹn alọnu yetọn ján lẹ. 10  Mí tindo agbà de he mẹhe nọ wà sinsẹ̀nzọn wiwe to gòhọ lọ mẹ lẹ ma tindo jlọjẹ nado dù sọn e ji. 11  Na gbonu osla lọ tọn wẹ agbasa kanlin he yẹwhenọ daho lọ nọ hẹn ohùn yetọn biọ ofi wiwe lọ mẹ na ylando wutu lẹ tọn nọ yin fifiọ te. 12  Enẹwutu, na Jesu lọsu ga nido sọgan yí ohùn etọn titi do hẹn gbẹtọ lẹ zun wiwe, e jiya to gbonu họngbo lọ tọn. 13  Enẹwutu, mì gbọ mí ni yì ewọ dè to gbonu osla lọ tọn, bo hẹn vlẹko he ewọ ko hẹn lọ, 14  na mí ma tindo tòdaho he na gbọṣi aimẹ de tofi gba, ṣigba dehe ja lọ wẹ mí to tenọpọn vẹkuvẹku. 15  Mì gbọ mí ni nọ gbọn ewọ gblamẹ do basi avọ́sinsan pipà tọn hlan Jiwheyẹwhe to whepoponu, enẹ wẹ, sinsẹ́n nùflo tọn he nọ basi gbeyiyi gbangba tọn na oyín etọn. 16  Humọ, mì wọnji dagbe wiwà po onú lẹ mimá hẹ mẹdevo lẹ po go blo, na avọ́sinsan mọnkọtọn lẹ go wẹ homẹ Jiwheyẹwhe tọn nọ hùn do taun. 17  Mì nọ setonuna mẹhe to anadenanu to ṣẹnṣẹn mìtọn lẹ bo nọ litai, na yewlẹ to alindọn mìtọn họ́ bo yọnẹn dọ yé na dogbè; na yé nido sọgan yí ayajẹ do wà ehe bọ e ma yin po azọ̀nwinwẹn po, na ehe na yin awugblenu na mì. 18  Mì nọ hodẹ̀ na mí, na mí deji dọ mí tindo ayihadawhẹnamẹnu dagbe de, bọ mí jlo nado nọ yinuwa po ahundopo po to onú lẹpo mẹ. 19  Ṣigba, yẹn dotuhomẹna mì vẹkuvẹku nado nọ wà ehe, na yẹn nido sọgan wá mì dè to madẹnmẹ. 20  Todin, na Jiwheyẹwhe jijọho tọn, mẹhe hẹn lẹngbọhọtọ daho lẹngbọ lẹ tọn, yèdọ Oklunọ mítọn Jesu gọwá ogbẹ̀ sọn oṣiọ lẹ mẹ po ohùn alẹnu madopodo de tọn po, 21  ni yí onú dagbe lẹpo do hẹn mì penugo nado wà ojlo etọn, bo gbọn Jesu Klisti gblamẹ wà nuhe sọgbe taun to nukun etọn mẹ to mí mẹ; mẹhe gigo ni tin na kakadoi podọ doidoi. Niṣẹ.* 22  Todin, mẹmẹsunnu lẹ emi, yẹn dotuhomẹna mì nado kẹalọyi ohó tulinamẹ tọn ehe po homẹdagbe po, na nugbo tọn, na hogbe vude wẹ yẹn yí do kàn wekanhlanmẹ de hlan mì. 23  Mì doayi e go dọ mẹmẹsunnu mítọn Timoti ko yin tuntundote, mẹhe po yẹn po na wá mì dè eyin ewọ wá to madẹnmẹ. 24  Mì yí nudọdomẹ ṣie lẹ na mẹhe to anadenanu to ṣẹnṣẹn mìtọn lẹ podọ na omẹ wiwe lẹpo. Mẹhe tin to Itali lẹ yí nudọdomẹ yetọn hlan mì. 25  Nukundagbe majẹhẹ ni tin hẹ mìmẹpo.

Nudọnamẹ Odò Tọn

Heb 13:5 Kavi, “onú dintọn lẹ.” To paa mẹ, “[nuhe] tin to yakẹ lẹ.”
Heb 13:21 Pọ́n Lo 1:25, nudọnamẹ odò tọn.