Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Heblu lẹ 12:1-29

12  Enẹwutu, to whelọnu lo, na mí tindo aslọ daho kunnudetọ lẹ tọn lẹdo mí pé wutu, mì gbọ mí nisọ de onú pinpẹn lẹpo gọna ylando he nọ bẹpla mí po awubibọ po lẹ sẹ̀, mì sọ gbọ mí ni yí akọndonanu do họ̀n alèwezun he yin zizedonukọnna mí lọ,  dile mí to Jesu, yèdọ Afọzedaitọ-gán lọ podọ Mẹhe nọ hẹn yise mítọn zun pipé lọ pọ́n tlintlin. Na ayajẹ he yin zizedonukọnna ẹn wutu, e doakọnna yatin de, bo ma hò winyan lọ pọ́n, bo ko sọ sinai to adusilọ ofìn Jiwheyẹwhe tọn mẹ.  Na nugbo tọn, mì nọ yí sọwhiwhe do lẹn mẹhe ko doakọnna hodidọ agọ̀ mọnkọtọn lẹ he wá sọn ylandonọ lẹ dè tọn pọ́n, yèdọ yé mẹhe gbọnmọ dali to awugblena yedelẹ, na onú nikaa ṣikọna mì bọ agbọ́ na pé alindọn mìtọn.  To ahididi mìtọn sọta ylando enẹ mẹ, mì ma ko doakọnna todin kakajẹ ohùn mìtọn sinsọndai ji gba,  ṣigba mì ko wọn tudohomẹnamẹ lọ he dọhona mì di ovi lẹ mlẹnmlẹn: “Ovi ṣie lẹ emi, mì yí nukunpẹvi do pọ́n mẹplọnlọ Jehovah tọn blo, mọjanwẹ agbọ́ ni ma pé mì to whenue ewọ wọhẹ mì blo;  na mẹhe Jehovah yiwanna go wẹ e nọ domẹplọnlọ; na taun tọn, mẹdepope he e kẹalọyi taidi ovi wẹ e nọ hò.”  Na mẹplọnlọdomẹgo wutu wẹ mìwlẹ to akọndonanu. Jiwheyẹwhe to nuyiwa hẹ mì taidi hẹ ovi lẹ. Na ovi tẹwẹ tin he otọ́ ma nọ domẹplọnlọ e go?  Ṣigba, eyin mìwlẹ ma nọ mọ mẹplọnlọ he mẹlẹpo to mimọyi lọ yí, be ayọvi lẹ wẹ mì yin na nugbo tọn, bọ e ma yin ovi jọnun lẹ.  Humọ, to dai, mí tindo otọ́ agbasalan tọn taidi míwlẹ he nọ domẹplọnlọ mí go, bọ mí nọ na sisi yé. Be e ma jẹ dọ mí ni yin mẹmẹglọ na Otọ́ ogbẹ̀ gbigbọmẹ tọn mítọn bo nọgbẹ̀ ya? 10  Na yewlẹ nọ domẹplọnlọ mí go na azán vude sọgbe hẹ nuhe yọ́n to nukun yetọn mẹ, ṣigba ewọ nọ wàmọ na ale mítọn na mí nido sọgan tindo mahẹ to wiwe-yinyin etọn mẹ. 11  Na nugbo tọn, mẹplọnlọ depope ma nọ sọawuhia nado yin ayajẹnu to whenue e tin to aimẹ, adavo awublanu; ṣogan to godo mẹ, e nọ de sinsẹ́n jijọho tọn, yèdọ dodowiwa tọ́n na mẹhe e ko yin yíyí do plọn lẹ. 12  Enẹwutu, mì hẹn alọ he ko kuyẹ̀ lẹ po kligonu he ma sinyẹn lẹ po lodo, 13  bo nọ to ali jijlọ lẹ de na afọ mìtọn lẹ, na dehe kúsẹ́ nikaa ylan dogọ, ṣigba kakatimọ nido yin hinhẹn jẹgangan. 14  Mì nọ doafọna jijọho mẹ ninọ hẹ omẹ lẹpo, gọna wiwe-yinyin, na matin ehe mẹdepope ma na mọ Oklunọ, 15  bo nọ to aṣeji na nukundagbe majẹhẹ Jiwheyẹwhe tọn nikaa yin hihòyi sọn mẹdepope si; na adọ̀ adínọ de nikaa tọ́n bo hẹn bẹwlu wá bosọ hẹn mẹsusu flu; 16  na galọtọ de kavi mẹdepope he ma yọ́n pinpẹn onú wiwe lẹ tọn taidi Esau nikaa sọawuhia, mẹhe yí núdùdù dopo do diọ jlọjẹ viplọnji tọn etọn lẹ. 17  Na mì yọnẹn dọ to godo mẹ, to whenue ewọ sọ jlo nado dugu dona lẹ tọn, e yin gbigbẹdai, na dile etlẹ yindọ e yí dasin do dín vẹkuvẹku nado diọ linlẹn otọ́ etọn tọn, e ma mọ dotẹnmẹ etọn. 18  Na mì ma ko dọnsẹpọ enẹ he sọgan yin alọdo e go, podọ ehe yè ko domiyọ́n, podọ ehe gọ́ na aslọ titli, zinvlu gọ́ngọ́n po jẹhọn-ahizi po, 19  gọna kúnkún opẹ̀n de tọn po ogbè hodidọ lẹ tọn po; to whenue gbẹtọ lẹ sè ogbè lọ, yé vẹvẹ dọ ohó depope ni masọ yin didọna yé dogọ ba blo. 20  Na gbedide lọ dobuna yé taun: “Podọ eyin agbasa kanlin de tọn jẹ osó lọ go, e dona yin zannu dlan do hù.” 21  Humọ, nuhe yin mimọ lọ dobu sọmọ bọ Mose dọmọ: “Yẹn dibu bo to sisọsisọ.” 22  Ṣigba, mìwlẹ ko dọnsẹpọ Osó Ziọni de podọ tòdaho Jiwheyẹwhe ogbẹ̀nọ lọ tọn, yèdọ Jelusalẹm olọn tọn, podọ angẹli fọtọ́n ao lẹ, 23  he pli dopọ, podọ agun plọnji lọ tọn, yinkọ mẹhe tọn ko yin kinkàndai to olọn mẹ lẹ, gọna Jiwheyẹwhe Whẹdatọ mẹlẹpo tọn, podọ ogbẹ̀ gbigbọmẹ tọn dodonọ he ko yin hinhẹn zun pipé lẹ tọn, 24  podọ Jesu whẹgbọtọ alẹnu yọyọ de tọn, po ohùn he ewọ húnhún do mí ji lọ po, ehe to hodọ to aliho dagbe de mẹ hú ohùn Abẹli tọn. 25  Mì hẹn diun dọ mì gbẹ́ nado dotoaina mẹhe to hodọ lọ blo. Na eyin yé mẹhe gbẹ́ nado dotoaina mẹhe na avase Jiwheyẹwhe tọn to aigba ji lẹ ma họ̀ngán, mílọsu ma sọgan wàmọ eyin mí ma dotoaina mẹhe to hodọ sọn olọn mẹ lọ. 26  To ojlẹ enẹ mẹ, ogbè etọn whàn aigba, ṣigba ewọ ko dopagbe todin dọmọ: “Whladopo dogọ, yẹn na whàn, e ma yin aigba kẹdẹ ṣigba olọn lọsu ga.” 27  Todin, hogbe lọ “Whladopo dogọ” zẹẹmẹdo didesẹ nuhe to yinyin whinwhàn lẹ tọn taidi nuhe ko yin bibasi lẹ, na nuhe ma to yinyin whinwhàn lẹ nido sọgan gbọṣi aimẹ. 28  Enẹwutu, mimọ dọ míwlẹ na mọ ahọluduta he ma sọgan yin whinwhàn de yí, mì gbọ mí ni zindonukọn nado tindo nukundagbe majẹhẹ, gbọn ehe gblamẹ mí sọgan yí budisi Jiwheyẹwhe po sisi sisosiso po do basi sinsẹ̀nzọn wiwe na Jiwheyẹwhe to aliho he yin alọkẹyi de mẹ. 29  Na miyọ́n nuvasudotọ de wẹ Jiwheyẹwhe mítọn yin ga.

Nudọnamẹ Odò Tọn