Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Heblu lẹ 11:1-40

11  Yise wẹ yin nukundido dejidego nuhe mí to todo lẹ tọn, yèdọ kunnudenu he họnwun onú tangan lẹ tọn, mahopọnna dọ yé ma ko yin mimọ.  Na gbọn ehe gblamẹ wẹ kunnu yin dide gando omẹ hohowhenu tọn lẹ go.  Gbọn yise dali, mí doayi e go dọ gbọn ohó Jiwheyẹwhe tọn dali wẹ titonu lẹ yin awuwlena, bọ nuhe yin mimọ ko wá tintin mẹ sọn nuhe ma yin mimọ lẹ mẹ.  Gbọn yise dali, Abẹli basi avọ́sinsan de hlan Jiwheyẹwhe he họakuẹ hú Kaini tọn, yise enẹ gblamẹ wẹ kunnu yin dide gando ewọ go dọ e yin dodonọ, Jiwheyẹwhe sọ dekunnu gando nunina etọn lẹ go; podọ gbọn yise etọn dali, dile ewọ tlẹ ko kú, e gbẹ́ to hodọ.  Gbọn yise dali, Enọku yin tẹndiọna ma nado mọ okú, podọ e ma yin mimọ to fidepope na Jiwheyẹwhe ko diọtẹnna ẹn wutu; na jẹnukọnna tẹndiọnamẹ etọn, kunnu yin dide gando e go dọ e ko hẹn homẹ Jiwheyẹwhe tọn hùn ganji.  Humọ, matin yise, e ma yọnbasi nado hẹn homẹ etọn hùn ganji, na mẹhe to dindọnsẹpọ Jiwheyẹwhe dona yise dọ ewọ tin podọ ewọ wẹ ahọsumẹtọ mẹhe to dindin in vẹkuvẹku lẹ tọn.  Gbọn yise dali, to whenuena avase Jiwheyẹwhe tọn ko yin nina Noa gando nuhe e ma ko mọ lẹ go, e do budisi Jiwheyẹwhe hia bo gbá aki de na whlẹngán whédo etọn tọn wutu; podọ gbọn yise ehe dali, e gblewhẹdo aihọn lọ, podọ e dugu dodowiwa tọn gbọn yise dali.  Gbọn yise dali, to whenue Ablaham yin yiylọ, e setonu nado tọ́njẹgbonu yì fide he e dona mọyi taidi ogú de; e sọ tọ́nyi, dile etlẹ yindọ e ma yọ́n fihe e jei.  Gbọn yise dali, e nọ aigba he yin opagbe etọn dó na ẹn lọ ji taidi jonọ, bo nọ gòhọ lẹ mẹ po Isaki po gọna Jakọbu, yèdọ mẹhe dugu opagbe dopolọ tọn lẹ hẹ ẹ. 10  Na ewọ to nukundo tòdaho lọ he tindo dodonu nujọnu tọn lẹ, yèdọ tòdaho he Jiwheyẹwhe wẹ yin didotọ po basitọ etọn po. 11  Gbọn yise dali ga, Sala lọsu mọ huhlọn yí nado mọhò okún de tọn, dile etlẹ yindọ ewọ ko zẹ̀ owhe vijiji tọn go, na ewọ pọ́n mẹhe dopagbe lọ hlan di nugbonọ wutu. 12  Mọdopolọ ga, gbọn dawe dopo, podọ ewọ he taidi mẹhe ko kú dote dali, ovi lẹ yin jiji kẹdẹdi sunwhlẹvu olọn tọn lẹ na yé yin susugege bo taidi tọkẹ́n huto tọn lẹ, yèdọ madosọha. 13  Omẹ ehelẹ yin nugbonọ kakajẹ okú, dile etlẹ yindọ yé ma mọ hẹndi opagbe lọ lẹ tọn, ṣigba yé mọ yé hlan olá bo kẹalọyi yé bosọ lá to gbangba dọ jonọ lẹ po gbéjinọtọ ojlẹ gli tọn lẹ po wẹ yé yin to aigba lọ ji. 14  Na mẹhe dọ onú mọnkọtọn lẹ na kunnudenu dọ yé to fide he na yin yetọn titi dín vẹkuvẹku. 15  Ṣogan, eyin nugbo wẹ dọ yé nọ to fihe yé tọ́njẹgbonu sọn lọ flin mapote, yé na ko tindo dotẹnmẹ hundote nado lẹkọyi. 16  Ṣigba todin, yé to vivẹnudo na fihe yọ́n hugan de, enẹ wẹ dehe to kọndopọ mẹ hẹ olọn. Enẹwutu, winyan ma hù Jiwheyẹwhe gando yé go, nado yin yiylọdọ Jiwheyẹwhe yetọn, na e ko wleawu tòdaho de tọn dai na yé. 17  Gbọn yise dali, to whenue Ablaham yin tintẹnpọn, e ko dibla yí Isaki do sanvọ́, bọ dawe lọ he ko mọ opagbe lọ lẹ yí po ayajẹ po tẹnpọn nado yí visunnu dopo akàn etọn do sanvọ́, 18  dile etlẹ yindọ e ko yin didọna ẹn dọmọ: “Nuhe na yin yiylọdọ ‘okún towe’ na wá gbọn Isaki gblamẹ.” 19  Ṣigba, e mọdọ Jiwheyẹwhe tlẹ penugo nado fọ́n ẹn sọn oṣiọ lẹ mẹ; podọ e sọ gọ̀ ẹ mọyi sọn finẹ to yẹhiadonu-liho. 20  Gbọn yise dali ga, Isaki dona Jakọbu po Esau po gando nuhe ja lẹ go. 21  Gbọn yise dali, to whenue Jakọbu jlo na kú, e dona visunnu Josẹfu tọn lẹ dopodopo bo sẹ̀n gbọn didẹ́ do opò etọn ji dali. 22  Gbọn yise dali, to whenue Josẹfu sẹpọ vivọnu gbẹzan etọn tọn, e donù tintọ́njẹgbonu* ovi Islaeli tọn lẹ tọn sọn Egipti go; ewọ sọ na gbedide de gando ohú etọn lẹ go. 23  Gbọn yise dali, Mose yin zizewhla na osun atọ̀n gbọn mẹjitọ etọn lẹ dali to jiji etọn godo, na yé mọdọ ovi pẹvi lọ yọnwhanpẹ wutu bọ yé ma dibuna gbedide ahọlu tọn. 24  Gbọn yise dali, to whenue Mose whẹ́n, e gbẹ́ nado yin yiylọdọ visunnu viyọnnu Falo tọn tọn, 25  bo de nado yin yasana po omẹ Jiwheyẹwhe tọn lẹ po kakati nado dugbẹ ylando tọn na ojlẹ gli de, 26  na e pọ́n vlẹko Klisti tọn hlan taidi adọkun he klohu adọkun Egipti tọn lẹ; na ewọ pọ́n ale ahọsumẹ lọ tọn hlan tlintlin wutu. 27  Gbọn yise dali, ewọ tọ́n sọn Egipti, ṣigba e ma dibuna homẹgble ahọlu tọn, na e gbọṣi tenọgli mẹ taidi dọ e to Omẹ lọ he yin mayinukundomọ lọ mọ wẹ nkọ. 28  Gbọn yise dali, e basi hùnwhẹ juwayi tọn bo mimí ohùn do dòtin ohọ̀n tọn lẹ go, na mẹvasudotọ lọ nikaa doalọ plọnji yetọn lẹ go. 29  Gbọn yise dali, yé jugbọn Ohù Vẹẹ lọ mẹ taidi gbọn aigba húhú ji nkọ, ṣigba to whenue Egiptinu lẹ tẹnpọn nado gbọn e ji, yé yin sisiọ. 30  Gbọn yise dali, adó Jẹliko tọn lẹ họ́jai to whenue yé ko yin lilẹdo pé na azán ṣinawe godo. 31  Gbọn yise dali, Lahabi galọtọ lọ ma dọ̀n po mẹhe vẹtoli lẹ po gba, na ewọ yí amẹ́ lẹ to aliho jijọho tọn de mẹ wutu. 32  Podọ etẹwẹ yẹn nasọ dọ dogọ? Na whenu ma na pé mi eyin yẹn zindonukọn nado dọ Gideoni tọn, Balak tọn, Samsọni tọn, Jẹfta tọn, Davidi tọn, podọ Samuẹli tọn po yẹwhegán devo lẹ tọn po, 33  yé mẹhe gbọn yise gblamẹ gbawhàn ahọluduta lẹ tọn to awhàn mẹ, ze dodowiwa dai, mọ opagbe lẹ yí, bọnùdo na kinnikinni lẹ, 34  doalọtena huhlọn miyọ́n tọn, họ̀ngán sọn onù ohí tọn nù, yin hinhẹn zun huhlọnnọ sọn ninọmẹ madogán tọn mẹ, yin adọgbotọ to awhàn mẹ, bo gbà awhànpa jonọ lẹ tọn do. 35  Yọnnu lẹ mọ oṣiọ yetọn lẹ yí gbọn fọnsọnku dali; ṣigba mẹdevo lẹ yin yasana na yé ma kẹalọyi tundote gbọn ofligọ delẹ dali wutu, na yé nido sọgan mọ fọnsọnku he yọ́n hugan de yí. 36  Mọwẹ, mẹdevo lẹ mọ whlepọn yetọn yí gbọn vlẹko lẹ po hihò lẹ po dali, podọ humọ, gbọn gẹdẹ lẹ po gànpamẹ lẹ po dali. 37  Yé yin zannu dlan do hù, yé yin whiwhlepọn, yé yin sinsán do awe po whlẹzẹ̀nú po, yé yin hùhù gbọn ohí dali, yé dánpe to ayú lẹngbọ tọn lẹ mẹ, to ayú gbọgbọẹ tọn lẹ mẹ, to whenue yé tin to nuhudo mẹ, to nukunbibia mẹ, to yasanamẹ glọ; 38  podọ aihọn ma jẹna yé. Yé flu gbọn danfafa lẹ ji, osó lẹ ji, oslò lẹ po odò aigba tọn lẹ po mẹ. 39  Ṣogan, mahopọnna dọ kunnu yin dide gando omẹ ehe lẹpo go na yise yetọn wutu, yé ma mọ hẹndi opagbe lọ tọn, 40  na Jiwheyẹwhe mọ nuhe yọ́n hugan de na mí, na yé nikaa yin hinhẹn zun pipé matin míwlẹ.

Nudọnamẹ Odò Tọn

Heb 11:22* Hogbe Glẹkigbe tọn he yin yiyizan tofi yin nudopolọ po yinkọ Glẹkigbe tọn he yin yiyizan na owe Eksọdusi tọn po.