Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Galatianu lẹ 5:1-26

5  Na mẹdekannujẹ mọnkọtọn wutu wẹ Klisti tún mí dote. Enẹwutu mì nọtegli, mì sọ dike bo yin ginglọndo zẹgẹ afanumẹ-yinyin tọn mẹ ba blo.  Mì doayi e go! Yẹn, Paulu, to didọna mì dọ eyin mì yin adàgbona, Klisti ma na yin ale de na mì.  Humọ, yẹn dekunnu whladopo dogọ hlan mẹdepope he to yinyin adàgbona dọ ewọ tin to dandannu glọ nado yìn Osẹ́n lọ blebu.  Mì ko yin kinklan sọn Klisti go, mahopọnna mẹhe mì yin, eyin mì tẹnpọn nado yin lilá taidi dodonọ gbọn osẹ́n dali; mì ko buali sọn nukundagbe majẹhẹ etọn mẹ.  Na míwlẹ tọn, mí gbọn gbigbọ dali yí jejejininọ do to tenọpọn dodowiwa he mí to todo taidi kọdetọn yise tọn.  Na nuhe dù Klisti Jesu, adàgbigbo kavi adàmagbo ma yin nude, adavo yise he to azọ́nwa gbọn owanyi gblamẹ.  Mì to wezundo ganji dai. Mẹnu wẹ glọnalina mì ma nado to tonusena nugbo lọ zọnmii?  Linlẹndiọnamẹ wunmẹ ehe ma wá sọn Omẹ lọ he to mì ylọ dè gba.  Otọ́n vude wẹ nọ hẹn linfin yinyan lẹpo fọ́n. 10  Yẹn dejido mì go, mì mẹhe tin to kọndopọ mẹ hẹ Oklunọ, dọ mì ma na wá lẹnnu to aliho devo mẹ; ṣigba ewọ he to tukla hẹn biọ mì mẹ na hẹn whẹgbledomẹ etọn, mahopọnna mẹhe nkọ ewọ sọgan yin. 11  Na yẹn tọn, mẹmẹsunnu emi, eyin yẹn gbẹ́ pò to yẹwheho adàgbigbo tọn dọ, naegbọn yè pò to homẹkẹndo mi? Na nugbo tọn, eyin mọ wẹ, be zannu ahlìda tọn he yin yatin lọ ko yin didesẹ. 12  Yẹn jlo dọ mẹhe to tintẹnpọn nado hẹn bẹwlu wá mì mẹ lẹ ni tlẹ sá yedelẹ. 13  Na nugbo tọn, mẹdekannujẹ mẹ wẹ mì yin yiylọ do, mẹmẹsunnu emi; etomọṣo mì yí mẹdekannujẹ ehe zan taidi dotẹnmẹ hundote de na agbasalan blo, ṣigba gbọn owanyi dali mì nọ wazọ́n na ode awetọ taidi afanumẹ. 14  Na Osẹ́n lọ blebu yin hinhẹndi to gbedide dopo mẹ, enẹ wẹ: “Hiẹ dona yiwanna kọmẹnu towe di dewe.” 15  Nalete, eyin mì to adúhẹn bosọ to ode awetọ mìtọn tlẹndu zọnmii, mì payi na mì nikaa hù ode awetọ mìtọn sudo. 16  Ṣigba yẹn dọmọ, Mì to zọnlinzin gbọn gbigbọ dali zọnmii, mì masọ to na hẹn ojlo agbasalan tọn depope di ba. 17  Na agbasalan jẹagọdo gbigbọ to ojlo etọn mẹ, podọ gbigbọ jẹagọdo agbasalan; na ehelẹ jẹagọdo yedelẹ, sọmọ bọ nuhe mìwlẹ na jlo taun nado wà lẹ mì ma nọ wà. 18  Humọ, eyin gbigbọ wẹ to anadena mì, be mì ma tin to osẹ́n glọ. 19  Todin azọ́n agbasalan tọn lẹ sọawuhia, podọ ehelẹ wẹ galilọ, mawé, wantuntun, 20  boṣiọ-sinsẹ̀n, afinyọnnuwiwa, okẹ̀n, avùn, awuwhàn, adánjijẹ whẹwhẹ, wiwọ́, kinklan, plọngiglọ, 21  nuvẹun, ahànnu-zẹjlẹgo, paṣadudu, po onú mọnkọ lẹ po. Gando onú ehelẹ go yẹn to avase na mì jẹnukọn, kẹdẹdile yẹn ko na avase mì do dai, dọ mẹhe nọ wà onú mọnkọtọn lẹ ma na dugu ahọluduta Jiwheyẹwhe tọn. 22  To alọ devo mẹ, sinsẹ́n gbigbọ tọn wẹ owanyi, ayajẹ, jijọho, linsinsinyẹn, homẹdagbe, dagbewà, yise, 23  walọmimiọn, mawazẹjlẹgo. Osẹ́n depope ma tin he jẹagọdo onú mọnkọtọn lẹ. 24  Humọ, mẹhe yin Klisti Jesu tọn lẹ ko whè agbasalan do atin go to pọmẹ hẹ numọtolanmẹ zogbe po ojlo etọn lẹ po. 25  Eyin mí to gbẹnọ gbọn gbigbọ dali, mì gbọ mí nisọ to zọnlinzin zọnmii to aliho he sọgbe mẹ gbọn gbigbọ dali ga. 26  Mì dike mí dín gigo ovọ́, to agbàwhinwhlẹn finfọndote to ode awetọ mítọn ṣẹnṣẹn, to nuvẹun tintindo na ode awetọ mẹ blo.

Nudọnamẹ Odò Tọn