Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Galatianu lẹ 4:1-31

4  Todin, yẹn dọ dọ dile e na dẹnsọ bọ gudutọ lọ na gbẹ́ pò to yọpọvu de yin, ewọ ma gbọnvo to aliho depope mẹ na afanumẹ de, dile etlẹ yindọ ewọ wẹ oklunọ onú lẹpo tọn,  ṣigba ewọ tin to nukunpedonugotọ lẹ po họ̀nkọnsi lẹ po glọ kakajẹ azán he otọ́ etọn ko de jẹnukọn lọ gbè.  Mọdopolọ, mílọsu lẹ ga, to whenue mí pò to yọpọvu, mí yin hinhẹn zun afanumẹ gbọn onú dodonu tọn aihọn tọn lẹ dali.  Ṣigba, whenuena ojlẹ dide lọ pé, Jiwheyẹwhe do Visunnu etọn hlan, mẹhe yin jiji gbọn yọnnu de dali bosọ tin to osẹ́n glọ,  na ewọ nido sọgan tún mẹhe to osẹ́n glọ lẹ dote gbọn hihọ̀ yé dali, na míwlẹ nido sọgan gbọnmọ dali mọ sọdodovi yí.  Todin, na ovi wẹ mì yin wutu, Jiwheyẹwhe ko do gbigbọ Visunnu etọn tọn hlan ahun mítọn mẹ bọ e yí ogbè lélé do dawhá dọmọ: “Abba,* Otọ́!”  Enẹwutu, to whelọnu lo, hiẹ masọ yin afanumẹ de ba ṣigba ovi de; eyin ovi de wẹ hiẹ yin, be gudutọ de wẹ hiẹ sọ yin gbọn Jiwheyẹwhe dali.  Etomọṣo, to whenue mìwlẹ ma ko yọ́n Jiwheyẹwhe, whenẹnu, mìwlẹ yin afanumẹ na nuhe ma yin yẹwhe to jọwamọ-liho lẹ.  Ṣigba, todin he mìwlẹ ko wá yọ́n Jiwheyẹwhe, kavi todin he mì ko wá yin yinyọnẹn gbọn Jiwheyẹwhe dali, naegbọn mìwlẹ sọ vọ́ to lilẹhlan onú dodonu tọn lẹ he yin ovọ́ po onú tata lẹ po kọ̀n bosọ jlo nado yin afanumẹ na yé whladopo dogọ? 10  Mìwlẹ nọ yí sọwhiwhe do payi azán lẹ, osun lẹ, osaa* lẹ po owhe lẹ po go. 11  Obu mìtọn to didi mi, dọ to aliho de mẹ, magbọjẹ ṣie gando mì go ni ma yin to ovọ́ mẹ blo. 12  Mẹmẹsunnu lẹ emi, yẹn vẹ̀ mì dọ, Mì ni lẹzun yẹn nkọ, na yẹn ko nọ lehe mìwlẹ te dai ga. Mì ma waylan de do mi. 13  Ṣigba, mì yọnẹn dọ gbọn azọ̀njijẹ ṣie to agbasalan mẹ gblamẹ wẹ yẹn lá wẹndagbe lọ na mì to tintan whenu. 14  Podọ dile azọ̀njijẹ ṣie to agbasalan mẹ tlẹ yin whlepọn de na mì, mìwlẹ ma yinuwa po vlẹko po kavi túntán nado do wangbẹna hia gba; ṣigba mì kẹalọyi mi taidi angẹli Jiwheyẹwhe tọn de, taidi Klisti Jesu. 15  To whelọnu lo, fie wẹ ayajẹ he mì tindo enẹ te? Na yẹn dekunnu gando mì go dọ, eyin e ko yọnbasi wẹ, mìwlẹ na ko de nukun mìtọn lẹ bo yí yé na mi. 16  Todin, to whelọnu lo, be yẹn ko lẹzun kẹntọ mìtọn na yẹn dọ nugbo na mì wutu wẹ ya? 17  Yé nọ yí zohunhun do dín mì, e ma yin to aliho dagbe de mẹ, ṣigba yé jlo nado glọnalina mì sọn dè e, na mìwlẹ nido sọgan yí zohunhun do dín yé. 18  Ṣigba, e na yọ́n na mì hú dọ yè ni nọ yí zohunhun do dín mì to nuhe yin dagbe lẹ mẹ to whepoponu, bọ e ma na yin to whenue yẹn tin to mì dè kẹdẹ, 19  yọpọ ṣie lẹ emi, mì mẹhe yẹn gbẹsọ to awufiẹsa vijiji tọn mẹ na kakajẹ whenue Klisti na yin awuwlena do mì mẹ lẹ. 20  Ṣigba, e na ko jlo mi nado tin to mì dè todin bo nado dọhona mì to aliho he gbọnvo de mẹ, na yẹn jẹflumẹ na mìtọn wutu. 21  Mì dọna mi, mì mẹhe jlo nado to osẹ́n glọ lẹ, Be mìwlẹ ma sè nuhe Osẹ́n lọ dọ ya? 22  Di apajlẹ, e yin kinkàndai dọ Ablaham tindo visunnu awe, dopo yin gbọn deviyọnnu lọ dali bọ awetọ yin gbọn yọnnu he to edekannu lọ dali; 23  ṣigba na taun tọn, dehe yin deviyọnnu lọ tọn yin jiji to agbasalan-liho, awetọ lọ he yin yọnnu he to edekannu lọ tọn yin gbọn opagbe de gblamẹ. 24  Onú ehelẹ tindo zẹẹmẹ yẹhiadonu* tọn de; na yọnnu ehelẹ nọtena alẹnu awe, dehe sọn Osó Sinai ji, he ji ovi lẹ nado yin afanumẹ, podọ enẹ wẹ Hagali. 25  Todin, Hagali ehe nọtena Sinai, yèdọ osó de to Alabia, podọ ewọ nọtena Jelusalẹm egbehe tọn, na ewọ po ovi etọn lẹ po yin afanumẹ lẹ. 26  Ṣigba, Jelusalẹm he to aga lọ tin to edekannu, podọ ewọ wẹ onọ̀ mítọn. 27  Na e ko yin kinkàndai dọmọ: “Jaya, hiẹ yọnnu wẹnsinọ he ma jivi; dabobo bo yí ayajẹ do dawhá, hiẹ yọnnu he ma tindo awufiẹsa vijiji tọn; na ovi yọnnu he yin kọgbẹ́ e go lọ tọn lẹ sù hugan dehe yin yọnnu lọ he tindo asu tọn lẹ.” 28  Todin, mẹmẹsunnu lẹ emi, míwlẹ wẹ ovi dopagbe lẹ kẹdẹdile Isaki te do. 29  Ṣigba, kẹdẹdile e te do to whenẹnu bọ dehe yin jiji to agbasalan-liho jẹ homẹkẹndo dehe yin jiji to gbigbọ-liho ji, mọ wẹ e te do todin ga. 30  Etomọṣo, etẹwẹ Owe-wiwe dọ? “Yàn deviyọnnu lọ po visunnu etọn po tọ́n, na visunnu deviyọnnu lọ tọn ma na yin gudutọ de hẹ visunnu yọnnu he to edekannu lọ tọn to aliho depope mẹ.” 31  Enẹwutu, mẹmẹsunnu lẹ emi, míwlẹ ma yin ovi deviyọnnu de tọn, ṣigba yọnnu he to edekannu lọ tọn lẹ.

Nudọnamẹ Odò Tọn

Ga 4:6* Pọ́n Mk 14:36, nudọnamẹ odò tọn.
Ga 4:10* Kavi, “ojlẹ dide lẹ.”
Ga 4:24* Kavi, “onú ehelẹ nọtena wadohia yẹhiadonu tọn de.”