Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Galatianu lẹ 3:1-29

3  Mì Galatianu gugutọ lẹ emi, mẹnu wẹ hẹn mì wá nuyiwadomẹji ylankan glọ, nukun mì mẹhe tọn mẹ Jesu Klisti yin didohia to gbangba te taidi mẹhe yè whè do núgo?  Ehe kẹdẹ wẹ yẹn jlo na sè sọn mì dè: Be mìwlẹ mọ gbigbọ lọ yí na azọ́n osẹ́n tọn wutu wẹ kavi na yise to nuhe yin sisè lọ mẹ wutu?  Be mìwlẹ gú sọmọ wẹ? To whenue mì ko bẹjẹeji to gbigbọ mẹ godo, todin be tadona wẹ mì te to agbasalan mẹ ya?  Be ovọ́ mẹ wẹ mìwlẹ jugbọn yajiji susu sọmọ mẹ ya? E họnwun na mi dọ e ma yin to ovọ́ mẹ.  Enẹwutu, ewọ he nọ na mì gbigbọ lọ bo nọ wà azọ́n huhlọnnọ lẹ to ṣẹnṣẹn mìtọn, be ewọ nọ wà ẹ na azọ́n osẹ́n tọn lẹ wutu wẹ kavi na yise to nuhe yin sisè lọ mẹ wutu?  Kẹdẹdile Ablaham “tindo yise to Jehovah mẹ bọ e yin hihia hlan ẹn di dodowiwa do.”  Na jide tọn, mìwlẹ yọnẹn dọ mẹhe tindo yise lẹ wẹ mẹhe yin ovi Ablaham tọn lẹ.  Todin, na Owe-wiwe mọ hlan dọ Jiwheyẹwhe na lá omẹ akọta lẹ tọn di dodonọ na yise wutu, e lá wẹndagbe lọ jẹnukọn hlan Ablaham dọmọ: “Gbọn hiẹ gblamẹ wẹ akọta lẹpo na yin didona te.”  Enẹwutu, mẹhe tindo yise lẹ to yinyin didona dopọ hẹ Ablaham nugbonọ. 10  Na mẹhe ganjẹ azọ́n osẹ́n tọn lẹ go lẹpo tin to dẹ̀hodo de glọ; na e ko yin kinkàndai dọmọ: “Mẹhodẹ̀do wẹ mẹdepope he ma zindonukọn nado to nuhe yin kinkàn do owe-hihá Osẹ́n lọ tọn mẹ lẹpo wà lẹ.” 11  Humọ, e họnwun dọ mẹdepope ma nọ yin lilá di dodonọ gbọn osẹ́n dali to Jiwheyẹwhe dè, na “dodonọ na nọgbẹ̀ gbọn yise etọn dali.” 12  Todin, Osẹ́n lọ ma nọ biọ yise to mẹsi, ṣigba “mẹhe nọ yìn yé na nọgbẹ̀ gbọn yé dali.” 13  Gbọn hihọ̀ mí dali, Klisti tún mí dote sọn dẹ̀hodo Osẹ́n lọ tọn glọ gbọn lilẹzun mẹhodẹ̀do do otẹn mítọn mẹ dali, na e ko yin kinkàndai dọmọ: “Mẹhodẹ̀do wẹ mẹdepope he yin zizepla pòtin de go.” 14  Lẹndai lọ wẹ yindọ dona Ablaham tọn nido sọgan yin hinhẹnwa na akọta lẹ gbọn Jesu Klisti gblamẹ, na mí nido sọgan mọ gbigbọ he yè dopagbe etọn lọ yí gbọn yise mítọn gblamẹ. 15  Mẹmẹsunnu lẹ emi, apajlẹ gbẹtọ tọn de wẹ yẹn yí do to hodọ dọmọ: Dile etlẹ yindọ alẹnu he yin hinhẹn lodo yin gbẹtọ tọn, mẹdepope ma gbẹkọ e go kavi yí nude dogọ ẹ gba. 16  Todin, opagbe lọ lẹ yin didó na Ablaham podọ na okún etọn. E ma dọ: “Podọ na okún lẹ,” taidi na mẹsusu, ṣigba taidi na omẹ dopo dọmọ: “Podọ na okún towe,” he yin Klisti. 17  Humọ, yẹn dọ ehe dọmọ: Na nuhe dù alẹnu he yin hinhẹn lodo gbọn Jiwheyẹwhe dali wayi, Osẹ́n lọ he wá aimẹ to owhe fowe gbàn godo ma hẹn ẹn zun ovọ́, bo de opagbe lọ sẹ̀ gba. 18  Na eyin osẹ́n wutu wẹ ogú yin nina, be e masọ yin na opagbe wutu ba; ṣigba na nugbo tọn, Jiwheyẹwhe ko gbọn homẹdagbe dali na ogú lọ Ablaham gbọn opagbe de gblamẹ. 19  To whelọnu lo, naegbọn Osẹ́n lọ do yin nina? E yin yiyidogọ nado hẹn sẹ́nhẹngba lẹ sọawuhia, kakajẹ whenue okún lọ na wá, yèdọ mẹhe opagbe lọ ko yin didó na; podọ e yin nina gbọn angẹli lẹ gblamẹ gbọn alọ whẹgbọtọ de tọn mẹ. 20  Todin, whẹgbọtọ de ma nọ tin eyin omẹ dopo gee go wẹ e gando, ṣigba Jiwheyẹwhe yin omẹ dopo gee. 21  Enẹwutu, be Osẹ́n lọ sọta opagbe Jiwheyẹwhe tọn lẹ wẹ ya? Enẹ ni ma jọ gbede blo! Na eyin osẹ́n de ko yin nina he penugo nado namẹ ogbẹ̀ wẹ, na taun tọn, dodowiwa na ko wá aimẹ gbọn osẹ́n gblamẹ. 22  Ṣigba, Owe-wiwe ko hẹn onú lẹpo yin mẹmẹglọ na ylando, na opagbe lọ he dekọtọn sọn yise tintindo to Jesu Klisti mẹ nido sọgan yin nina mẹhe to yise dohia lẹ. 23  Ṣigba, whẹpo yise do wá, mí nọ yin anadena gbọn osẹ́n dali, bo nọ yin hinhẹn yin mẹmẹglọ dopọ, bosọ nọ to nukundo yise he dona yin didehia lọ. 24  Enẹwutu, Osẹ́n lọ ko lẹzun anademẹtọ mítọn he deanana mí yì Klisti dè, na míwlẹ nido sọgan yin lilá di dodonọ na yise wutu. 25  Ṣigba, todin he yise ko wá, mí masọ tin to anademẹtọ de glọ ba. 26  Na nugbo tọn, ovi Jiwheyẹwhe tọn wẹ mìmẹpo gbọn yise he mì tindo to Klisti Jesu mẹ lọ gblamẹ. 27  Na mìmẹpo he yin bibaptizi to Klisti mẹ ko ze Klisti dogo. 28  Ju kavi Glẹkinu de ma tin, afanumẹ kavi mẹhe to edekannu de ma tin, sunnu kavi yọnnu de ma tin; na omẹ dopo wẹ mìmẹpo to kọndopọ mẹ hẹ Klisti Jesu. 29  Humọ, eyin mìwlẹ yin Klisti tọn, be na taun tọn, okún Ablaham tọn wẹ mì yin, yèdọ gudutọ opagbe de tọn lẹ.

Nudọnamẹ Odò Tọn