Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Filipinu lẹ 2:1-30

2  To whelọnu lo, whedepopenu he tulinamẹ de tin to Klisti mẹ, whedepopenu he homẹmiọnnamẹ owanyi tọn de tin, whedepopenu he gbigbọ mẹtọnhopọn tọn de tin, whedepopenu he owanyi sisosiso po awuvẹmẹ po de tin,  mìwlẹ nọ hẹn ayajẹ ṣie gọ́ to enẹ mẹ dọ mì tindo linlẹn dopolọ bo tindo owanyi dopolọ, na mì ko yin kinkọndopọ di alindọn dopo, bosọ tindo linlẹn dopolọ,  bo ma nọ yí wiwọ́ kavi glòlò-jijlá do wà nudepope, ṣigba mì nọ gbọn mẹdezewhè dali do pọ́n mẹdevo lẹ dọ yé yiaga hú mì,  bo ma nọ ze nukun do ale mẹdetiti tọn he yin onú mìtọn titi lẹ tọn kẹdẹ ji gba, ṣigba do ale nuhe yin mẹdevo lẹ tọn ji ga.  Mìwlẹ ni nọ tindo pọndohlan ehe to mì mẹ, ehe tin to Klisti Jesu mẹ ga,  mẹhe, mahopọnna dọ e tin to awusọhia Jiwheyẹwhe tọn mẹ, ewọ ma lẹn nado hò otẹn de yí, enẹ wẹ, nado sọzẹn hẹ Jiwheyẹwhe.  Lala, ṣigba e jo onú lẹpo do bo taidi afanumẹ de bosọ wá tindo awusọhia gbẹtọ tọn.  Humọ, to whenuena e mọ ede to awusọhia gbẹtọ tọn mẹ, e whiwhẹ ede bo setonu kakajẹ okú, mọwẹ, yèdọ okú to yatin de ji.  Na whẹwhinwhẹ́n ehe wutu ga, Jiwheyẹwhe ze e daga do otẹn he yiaga de mẹ bo gbọn homẹdagbe dali na ẹn oyín lọ he yiaga hú oyín devo lẹpo, 10  bọ to oyín Jesu tọn mẹ, kligonu lẹpo dona jẹklo, yèdọ dehe to olọn mẹ lẹ podọ dehe to aigba ji lẹ podọ dehe to aigba glọ lẹ, 11  podọ odẹ́ lẹpo dona yigbe to gbangba dọ Jesu Klisti wẹ Oklunọ hlan gigo Jiwheyẹwhe Otọ́ lọ tọn. 12  Enẹwutu, mẹyiwanna ṣie lẹ emi, dile mì ko nọ setonu to whepoponu do, e ma yin to tintin tofi ṣie whenu kẹdẹ gba, ṣigba mì wleawu nado wà humọ todin he yẹn ma tin to mì dè, mì nọ yí obu po sisọsisọ po do to azọ́nwa na whlẹngán mìtọn titi; 13  na Jiwheyẹwhe wẹ yin omẹ lọ he to nuyiwa to mì mẹ sọgbe hẹ nuhe nọ hẹn homẹhun in, na mìwlẹ nido sọgan jlo bo yinuwa. 14  Mì nọ to onú lẹpo wà matin hùnhlún po nudindọn lẹ po, 15  na mì nido sọgan yin madoblọnọ po homẹvọnọ po, yèdọ ovi Jiwheyẹwhe tọn lẹ he ma tindo oblọ to whẹndo jijọ gbíngbánnọ po bublunọ de po ṣẹnṣẹn, mẹhe ṣẹnṣẹn mìwlẹ to wunhọ́n te taidi hinhọ́n lẹ to aihọn lọ mẹ, 16  bo nọ tẹdo ohó ogbẹ̀ tọn lọ go gligli, na yẹn nido sọgan tindo whẹwhinwhẹ́n nado jẹaglin to azán Klisti tọn gbè, dọ yẹn ma dowezun to ovọ́ mẹ kavi wazọ́n sinsinyẹn to ovọ́ mẹ. 17  Mahopọnna enẹ, eyin yẹn tlẹ to yinyin kinkọnyinai taidi avọ́nunina nùnù de do avọ́sinsan sinsẹ̀nzọn gbangba tọn he kọ̀n yise ko plan mì jẹ lọ ji, yẹn yin homẹhunnọ bosọ jaya hẹ mì. 18  Todin, to aliho dopolọ mẹ, mìlọsu lẹ ga ni yin homẹhunnọ bosọ jaya hẹ mi. 19  Na yẹn tọn, yẹn tindo todido to Oklunọ Jesu mẹ nado do Timoti hlan mì dè to madẹnmẹ, na yẹn nido sọgan yin homẹhunnọ to whenue yẹn na sè linlin lẹ gando mì go. 20  Na yẹn ma tindo mẹdevo de he tindo ayilinlẹn he taidi ewọ tọn, mẹhe na penukundo mì go sọn ahun mẹ wá. 21  Na mẹhe pò lẹpo wẹ nọ to ale yetọn titi lẹ dín, e ma yin Klisti Jesu tọn lẹ gba. 22  Ṣigba, mìwlẹ yọ́n kunnudenu he ewọ ko na gando ede go, dọ ewọ ko wazọ́n hẹ mi taidi ovi de hẹ otọ́ na nukọnyiyi wẹndagbe lọ tọn. 23  Enẹwutu, ehe wẹ omẹ lọ he yẹn to linlẹn nado dohlan mì dè tlolo he yẹn na ko yọ́n nuhe na jọ do go e. 24  Na nugbo tọn, yẹn tindo jidide to Oklunọ mẹ dọ yẹnlọsu ga na wá mì dè to madẹnmẹ. 25  Ṣigba, yẹn mọdọ e yin dandannu nado do Epafloditu hlan mì dè, yèdọ mẹmẹsunnu ṣie, azọ́nwatọ hatọ de podọ awhànfuntọ hatọ de, ṣigba dẹ́mẹnu mìtọn podọ devizọnwatọ ṣie titi na nuhudo ṣie, 26  na ewọ to jijlo vẹkuvẹku nado mọ mìmẹpo podọ ewọ jẹflumẹ na mìwlẹ ko sè dọ e to azọ̀njẹ wutu. 27  Mọwẹ, na nugbo tọn, ewọ jẹazọ̀n dibla jẹ kúdonu; ṣigba Jiwheyẹwhe wàlẹblanuna ẹn, na taun tọn, e ma yin na ewọ kẹdẹ, ṣigba na yẹnlọsu ga, na awubla nikaa jẹ awubla ji na mi. 28  Enẹwutu, po awuyiya daho po wẹ yẹn to dido e hlan, dọ to mimọ ẹn godo, mìwlẹ nido sọgan jaya whladopo dogọ bọ yẹn nado vò sọn awubla mẹ dogọ. 29  Enẹwutu, mì yí ayajẹ lẹpo do dokuavọna ẹn dile mì nọ basi do to Oklunọ mẹ; podọ mì nọ pọ́n omẹ mọnkọtọn lẹ hlan di mẹvivẹ, 30  na azọ́n Oklunọ tọn wutu wẹ ewọ do sẹpọ kúdonu, bo to alindọn etọn zedo owù mẹ, na ewọ nido sọgan nọ otẹn mìtọn mẹ to gigọ́ mẹ na mìwlẹ ma tin tofi nado wà sinsẹ̀nzọn na mi wutu.

Nudọnamẹ Odò Tọn