Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Filipinu lẹ 1:1-30

1  Paulu po Timoti po, afanumẹ Klisti Jesu tọn lẹ, to wekanhlan omẹ wiwe lẹpo he to Filippi bo to kọndopọ mẹ hẹ Klisti Jesu, gọna nugopọntọ lẹ po devizọnwatọ lizọnyizọnwiwa tọn lẹ po:  Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn podọ Oklunọ Jesu Klisti dè.  Yẹn nọ dopẹna Jiwheyẹwhe ṣie to whepoponu to whedepopenu he yẹn flin mì  to ovẹvivẹ ṣie lẹpo gando mìmẹpo go mẹ, dile yẹn yí ayajẹ do to vẹvẹ,  na alọgọ he mì ko basi nado nọgodona wẹndagbe lọ sọn azán tintan gbè kakajẹ ojlẹ ehe mẹ wutu.  Na yẹn tindo jidide gando ehe go, dọ ewọ he bẹ azọ́n dagbe jẹeji to mì ṣẹnṣẹn na zindonukọn to e mẹ kakajẹ whenue e na dotana ẹn to azán Jesu Klisti tọn gbè.  Nuhe sọgbe taun wẹ e yin dọ yẹn ni lẹn ehe gando mìmẹpo go, na mì tin to ahun ṣie mẹ wutu, mìmẹpo he yin mimátọ hẹ mi to nukundagbe majẹhẹ lọ mẹ, yèdọ to gẹdẹ ṣie lẹ mẹ podọ to avùnlọyiyi po wẹndagbe lọ hinhẹn lodo to osẹ́n-liho po mẹ.  Na Jiwheyẹwhe wẹ yin kunnudetọ ṣie gando lehe ajlù mìmẹpo tọn nọ wle mi do go na owanyi sisosiso he taidi dehe Klisti Jesu tindo lọ wutu.  Podọ ehe wẹ odẹ̀ he yẹn nọ hò to whepoponu, dọ owanyi mìtọn ni nọ to susudeji dogọ to pọmẹ hẹ oyọnẹn he pegan po wuntuntun mlẹnmlẹn po; 10  na mì nido mọdona nuhe yin nujọnu hugan lẹ, na mì nido tin matin mọdọ bo ma na nọ hẹn mẹdevo lẹ dahli kakajẹ azán Klisti tọn gbè, 11  bosọ sọgan gọ́ na sinsẹ́n dodo tọn, ehe yin gbọn Jesu Klisti gblamẹ, nado hẹn gigo po pipà po wá na Jiwheyẹwhe. 12  Todin, mẹmẹsunnu lẹ emi, yẹn jlo dọ mì ni yọnẹn dọ ninọmẹ ṣie lẹ ko dekọtọn do nukọnyiyi wẹndagbe lọ tọn mẹ kakati nido glọnalina ẹn, 13  sọmọ bọ gẹdẹ ṣie lẹ ko yin yinyọnẹn na mẹlẹpo to kọndopọ mẹ hẹ Klisti to Hihọ́tọ Sesali tọn* lẹpo ṣẹnṣẹn podọ na mẹhe pò lẹpo; 14  podọ suhugan mẹmẹsunnu lẹ tọn to Oklunọ mẹ, he tindo jidide na gẹdẹ ṣie lẹ wutu, to adọgbigbo tindo dogọ nado dọ ohó Jiwheyẹwhe tọn madibu. 15  Na nugbo tọn, mẹdelẹ yí nuvẹun po agbàwhinwhlẹn po do to yẹwheho Klisti tọn dọ, ṣigba mẹdevo lẹ sọ yí ojlo dagbe do to mọwà. 16  Mẹhe yí ojlo dagbe do to yẹwhehodọ lẹ to Klisti lá pé sọn owanyi mẹ, na yé yọnẹn dọ yẹn tin tofi nado yiavunlọna wẹndagbe lọ; 17  ṣigba mẹhe yí nuvẹun po agbàwhinwhlẹn po do to yẹwhehodọ lẹ to mọwà na wiwọ́ wutu, e ma yin na mẹwhinwhàn dagbe wutu gba, na yé to linlẹn nado fọ́n nukunbibia dote na mi to gẹdẹ ṣie lẹ mẹ. 18  Etẹwẹ lo? E ma yin nude, adavo dọ to aliho lẹpo mẹ, vlavo to yẹdoklọmẹ mẹ kavi to nugbo mẹ, Klisti to yinyin lilá pé podọ ehe mẹ wẹ yẹn jaya te. Na nugbo tọn, yẹn na gbẹ́ to ayajẹ zọnmii, 19  na yẹn yọnẹn dọ ehe na dekọtọn do whlẹngán ṣie mẹ gbọn ovẹvivẹ mìtọn po gbigbọ Jesu Klisti tọn mimọyi po gblamẹ, 20  to kọndopọ mẹ hẹ nukundido vẹkuvẹku po todido ṣie po dọ winyan ma na hù mi to aliho depope mẹ, ṣigba dọ to awuvivo hodidọ tọn lẹpo mẹ, Klisti na yin gigopana gbọn agbasa ṣie dali todin dile e ko nọ saba yin do, vlavo gbọn ogbẹ̀ ṣie gblamẹ kavi gbọn okú ṣie gblamẹ. 21  Na yẹn tọn, eyin yẹn to ogbẹ̀, yẹn to ogbẹ̀ na Klisti, podọ eyin yẹn kú, ale de wẹ e yin na mi. 22  Todin, eyin nado nọgbẹ̀ zọnmii to agbasalan mẹ wẹ, sinsẹ́n azọ́n ṣie tọn wẹ ehe yin—ṣogan yẹn ma hẹn nuhe yẹn na de lọ zun yinyọnẹn gba. 23  Yẹn to bẹwlu mẹ gando onú awe ehelẹ go; ṣigba nuhe yẹn jlo wẹ tundote podọ tintin hẹ Klisti, na nado dọ hójọhó, ehe wẹ pọnte hugan. 24  Ṣigba, nuhe yin nujọnu hugan wẹ yindọ yẹn ni gbọṣi agbasalan mẹ na mìwlẹ tọn wutu. 25  Enẹwutu, na yẹn tindo jidide gando ehe go wutu, yẹn yọnẹn dọ yẹn na gbọṣi aimẹ bo na nọhẹ mìmẹpo na nukọnyiyi mìtọn po ayajẹ yise mìtọn tọn po, 26  na aglinjijẹ mìtọn nido gọfla to Klisti Jesu mẹ na yẹn tọn wutu gbọn tintin tofi ṣie hẹ mì whladopo dogọ gblamẹ. 27  Onú lọ poun wẹ yindọ mì ni nọ yinuwa to aliho he jẹna wẹndagbe lọ he gando Klisti go mẹ, na e nido yindọ vlavo yẹn wá bo mọ mì kavi yẹn ma tin to finẹ, yẹn nido nọ sè linlin gando mì go, dọ mì to ote gligli to gbigbọ dopo mẹ, bo to vivẹnudo to kọndopọ mẹ taidi alindọn dopo na yise wẹndagbe lọ tọn, 28  bo masọ yin budona to aliho depope mẹ gbọn agọjẹdomẹtọ mìtọn lẹ dali. Onú ehe yin kunnudenu vasudo tọn na yewlẹ, ṣigba whlẹngán tọn na mìwlẹ; podọ Jiwheyẹwhe dè wẹ kunnudenu ehe wá sọn, 29  na mìwlẹ wẹ lẹblanulọkẹyi lọ ko yin nina na Klisti tọn wutu, e ma yin nado tindo yise to ewọ mẹ kẹdẹ gba, ṣigba nado jiya na ewọ tọn wutu ga. 30  Na mìwlẹ tindo ahididi dopolọ dile mì mọ to whẹho ṣie mẹ do podọ dile mì to sisè todin gando yẹn go do.

Nudọnamẹ Odò Tọn

Flp 1:13 Hihọ́tọ ahọluigbagán Lomu tọn lẹ tọn.