Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Efesunu lẹ 6:1-24

6  Mì ovi lẹ emi, mì nọ setonuna mẹjitọ mìtọn lẹ to kọndopọ mẹ hẹ Oklunọ, na ehe wẹ dodo:  “Gbògbéna otọ́ towe po onọ̀ towe po”; ehe yin gbedide tintan he zọnpọ hẹ opagbe de:  “Na e nido yin dagbe na we bọ hiẹ nado sọgan nọgbẹ̀ dẹn to aigba ji.”  Podọ mì otọ́ lẹ emi, mì ma nọ hẹn homẹgblena ovi mìtọn lẹ blo, ṣigba mì nọ to pinpọn yé go whẹ́n to mẹplọnlọ po anademẹ Jehovah tọn po mẹ.  Mì afanumẹ lẹ emi, mì nọ setonuna mẹhe yin ogán mìtọn to agbasa-liho lẹ, to obu po sisi sisosiso ahundoponọ-yinyin tọn po mẹ, taidi na Klisti,  e ma yin mẹnukunta-zọ́n taidi nukundagbe gbẹtọ tọn dintọ lẹ, ṣigba taidi afanumẹ Klisti tọn lẹ, he nọ to ojlo Jiwheyẹwhe tọn wà po alindọn lẹpo po.  Mì yin afanumẹ he tindo ayilinlẹn dagbe lẹ, taidi na Jehovah, e ma yin na gbẹtọ lẹ,  na mìwlẹ yọnẹn dọ dagbe depope he omẹ dopodopo wà, ewọ na mọ ale etọn yí sọn Jehovah dè, vlavo ewọ yin afanumẹ kavi mẹhe to edekannu.  Humọ, mì ogán lẹ emi, mì nọ wà nudopolọ lẹ na yé, mì sọ nọ vannukundo yé ba blo, na mì yọnẹn dọ Ogán yetọn po mìwlẹ tọn po tin to olọn mẹ, podọ ewọ ma tindo mẹnukuntahihopọn depope. 10  To popolẹpo mẹ, mì nọ to huhlọn mọyi sọn Oklunọ dè podọ sọn hlọnhlọn huhlọn etọn tọn mẹ. 11  Mì ze gbaja Jiwheyẹwhe tọn blebu dó, na mì nido penugo nado nọte gligli sọta ayiha wintinwintin Lẹgba tọn lẹ; 12  na ahididi he mí tindo, ma yin sọta ohùn po agbasalan po, ṣigba sọta gandudu lẹ, sọta aṣẹpipa lẹ, sọta ogán aihọn zinvlu ehe tọn lẹ, sọta huhlọn gbigbọ ylankan olọn tọn lẹ. 13  Na ehe wutu, mì ze gbaja Jiwheyẹwhe tọn blebu hẹn, na mì nido penugo nado nọavunte to azán ylankan gbè podọ, to whenue mì ko wà nuhe mì dona wà lẹpo dotana godo, nado nọte gligli. 14  Enẹwutu, mì nọte gligli bo yí nugbo do blagbajana adaja mìtọn, bosọ ze tùnudo dodowiwa tọn dó, 15  bo yí wẹndagbe jijọho tọn do doafọpa* na afọ mìtọn lẹ. 16  Hú popolẹpo, mì ze awọ̀yinu daho yise tọn, ehe mì sọgan yí do ṣimiyọ́n ogá miyọnnọ mẹylankan lọ tọn lẹpo. 17  Humọ, mì kẹalọyi ogangbakun whlẹngán tọn, podọ ohí gbigbọ tọn, enẹ wẹ, ohó Jiwheyẹwhe tọn, 18  to ninọmẹ gbigbọmẹ tọn lẹpo mẹ, mì nọ gbọṣi odẹ̀ po ovẹvivẹ wunmẹ lẹpo po mẹ. Podọ na ehe wutu, mì nọ gbọṣi nukle to whepoponu bo nọ basi ovẹvivẹ do ota omẹ wiwe lẹpo tọn mẹ, 19  podọ na yẹn tọn, na nugopipe nado dọho nido sọgan yin nina mi na yẹn nido yí awuvivo hodidọ tọn do dọho nado hẹn aṣli wiwe wẹndagbe lọ tọn zun yinyọnẹn, 20  ehe yẹn to nuyiwa taidi afọzedaitọ de na to gẹdẹ mẹ; na yẹn nido yí adọgbigbo do dọho etọn dile yẹn dona dọ do. 21  Todin, na mìwlẹ nido sọgan yọ́n ninọmẹ ṣie, yèdọ lehe yẹn te do, Tikiku, mẹmẹsunnu mẹyiwanna podọ lizọnyizọnwatọ nugbonọ de to Oklunọ mẹ na hẹn onú lẹpo zun yinyọnẹn na mì. 22  Yẹn to ewọ dohlan mì dè na lẹndai ehe wutu, na mì nido sọgan yọ́n ninọmẹ mítọn podọ na ewọ nido sọgan miọnhomẹna mì. 23  Na mẹmẹsunnu lẹ ni tindo jijọho, owanyi, po yise po sọn Jiwheyẹwhe Otọ́ podọ Oklunọ Jesu Klisti dè. 24  Na nukundagbe majẹhẹ ni tin hẹ mẹlẹpo he tindo owanyi he ma sọgan gble na Oklunọ mítọn Jesu Klisti.

Nudọnamẹ Odò Tọn

Efe 6:15 To paa mẹ, “awuwiwle gbọn afọpa didó na afọ towe lẹ dali.”