Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Efesunu lẹ 5:1-33

5  Enẹwutu, mì nọ hodo apajlẹ Jiwheyẹwhe tọn, taidi ovi yiwanna lẹ,  bo nọ to zọnlinzin to owanyi mẹ, kẹdẹdile Klisti yiwanna mì do ga bo ze ede jo do ota mìtọn mẹ taidi avọ́nunina de podọ avọ́sinsan de hlan Jiwheyẹwhe na owán vivi de.  Mì gbọ galilọ po mawé wunmẹ lẹpo po kavi nukunkẹn ni ma tlẹ yin nùdego to ṣẹnṣẹn mìtọn blo, kẹdẹdile e jẹna omẹ wiwe lẹ do;  mọdopolọ, walọ he huwinyan kavi hodidọ nulú tọn kavi aslan gblewa tọn, yèdọ nuhe ma sọgbe lẹ, ṣigba, kakatimọ mì nọ dopẹ́.  Na mìwlẹ yọ́n ehe, bo mọnukunnujẹemẹ hezeheze, dọ galọtọ kavi omẹ mawé kavi nukunkẹnnọ—enẹ wẹ nado yin boṣiọ-sẹ̀ntọ de—ma tindo ogú depope to ahọluduta Klisti tọn po Jiwheyẹwhe tọn po mẹ.  Mì dike mẹde yí ohó ovọ́ lẹ do klọ mì blo, na onú ehelẹ wutu wẹ homẹgble Jiwheyẹwhe tọn ja tolivẹtọ lẹ ji.  Enẹwutu, mì lẹzun mahẹtọ lẹ hẹ yé blo;  na mì ko yin zinvlu to ojlẹ de mẹ wayi, ṣigba mì ko yin hinhọ́n todin to kọndopọ mẹ hẹ Oklunọ. Mì nọ to zọnlinzin taidi ovi hinhọ́n tọn lẹ,  na sinsẹ́n hinhọ́n tọn nọ bẹ dagbewà wunmẹ lẹpo, dodowiwa po nugbo po hẹn. 10  Mì nọ to dodinna nuhe Oklunọ kẹalọyi lẹ zọnmii; 11  mì sọ nọ tindo mahẹ to azọ́n mado sinsẹ́n he yin zinvlu tọn lẹ mẹ hẹ yé ba blo, ṣigba, kakatimọ, mì nọ gbẹ́ yé dai, 12  na nuhe yé to wiwà to nuglọ lẹ huwinyan nado tlẹ dọ. 13  Todin, nuhe to yinyin whẹgbledo lẹpo wẹ yin hinhẹn sọawuhia gbọn hinhọ́n lọ dali, na nulẹpo he to yinyin hinhẹn sọawuhia wẹ yin hinhọ́n. 14  Enẹwutu wẹ e dọmọ: “Fọ́n, hiẹ he to amlọndọ, bo fọ́n sọn oṣiọ lẹ mẹ, Klisti nasọ họ́n do oji we.” 15  Enẹwutu, mì nọ payi tlala dọ lehe mì to zọnlinzin do ni ma yin taidi nulunọ blo ṣigba taidi nuyọnẹntọ lẹ, 16  mì nọ fli ojlẹ he jẹ lẹ na mìde, na ylankan wẹ azán lẹ wutu. 17  Na ehe wutu, mì sọ yin nulunọ ba blo, ṣigba mì nọ to ayido nuhe ojlo Jehovah tọn yin go zọnmii. 18  Humọ, mì sọ nọ nù ovẹn mú ba blo, ehe nọ dekọtọn do walọ he gblezọn mẹ, ṣigba mì nọ gọ́ na gbigbọ, 19  bo nọ yí psalm lẹ po pipà nina Jiwheyẹwhe po gọna ohàn gbigbọ tọn lẹ do dọhona ode awetọ, mì nọ kehàn bosọ nọ pà Jehovah to ahun mìtọn mẹ, 20  to oyín Oklunọ mítọn Jesu Klisti tọn mẹ, mì nọ dopẹna Jiwheyẹwhe podọ Otọ́ mítọn to whepoponu na onú lẹpo. 21  Mì nọ yin mẹmẹglọ hlan ode awetọ na budisi Klisti wutu. 22  Mì gbọ asi lẹ ni nọ yin mẹmẹglọ hlan asu yetọn taidi hlan Oklunọ, 23  na asu wẹ ota na asi etọn dile Klisti yin ota agun lọ tọn do ga, na ewọ wẹ whlẹngántọ agbasa ehe tọn. 24  Na nugbo tọn, dile agun lọ yin mẹmẹglọ hlan Klisti do, mọ wẹ asi lẹ lọsu ga ni nọ wà na asu yetọn do to onú lẹpo mẹ. 25  Mì asu lẹ emi, mì nọ yiwanna asi mìtọn, kẹdẹdile Klisti yiwanna agun lọ do ga bo ze ede jo na ẹn, 26  na ewọ nido sọgan hẹn ẹn zun wiwe, bo klọ́ ẹ wé gbọn yíyí osin ohó lọ tọn do klọ́ ẹ dali, 27  na ewọ nido sọgan ze agun lọ donukọnna ede to whanpẹ daho etọn mẹ, matin dihó kavi awugbopo kavi onú mọnkọtọn depope, ṣigba dọ e dona yin wiwe bo ma tindo oblọ. 28  To aliho ehe mẹ, asu lẹ dona nọ yiwanna asi yetọn taidi agbasa yetọn titi. Ewọ he yiwanna asi etọn yiwanna ede, 29  na mẹdepope ma nọ gbẹwanna agbasalan edetiti tọn gbede; ṣigba e nọ na ẹn núdùdù bo nọ wlebòna ẹn, dile Klisti nọ wà na agun lọ do ga, 30  na awutugonu agbasa etọn tọn wẹ mí yin wutu. 31  “Na ehe wutu, sunnu na jo otọ́ etọn po onọ̀ etọn po do bo na sẹbọdo asi etọn go, yé omẹ awe lẹ nasọ lẹzun agbasalan dopo.” 32  Aṣli wiwe daho wẹ ehe yin. Todin, yẹn to hodọ gando Klisti po agun lọ po go. 33  Etomọṣo, mì gbọ dopodopo mìtọn ni nọ yiwanna asi etọn dile e nọ wà na edetiti do; mọdopolọ, asi dona tindo sisi sisosiso na asu etọn.

Nudọnamẹ Odò Tọn