Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Efesunu lẹ 4:1-32

4  Enẹwutu, yẹn he yin gàntọ to Oklunọ mẹ, to mì vẹ̀ nado nọ zinzọnlin sọgbe hẹ oylọ he mẹ mì yin yiylọ do,  mì nọ yí mẹdezewhè po walọmimiọn mlẹnmlẹn po gọna linsinsinyẹn do nọ sinyẹnlin hẹ ode awetọ to owanyi mẹ,  bo nọ yí vivẹnudido vẹkuvẹku do payi dopo-yinyin gbigbọ tọn go to gẹdẹ pọninọ jijọho tọn mẹ.  Agbasa dopo wẹ tin, podọ gbigbọ dopo, yèdọ dile mìwlẹ yin yiylọ do todido dopo he mẹ mì yin yiylọ do;  Oklunọ dopo, yise dopo, baptẹm dopo;  Jiwheyẹwhe dopo podọ Otọ́ mẹlẹpo tọn mẹhe tin to onú lẹpo ji podọ gbọn onú lẹpo gblamẹ podọ to onú lẹpo mẹ.  Todin, nukundagbe majẹhẹ yin nina dopodopo mítọn kẹdẹdile Klisti ko namẹ nunina vọnu do.  Enẹwutu, e dọmọ: “To whenue ewọ hẹji yì aga, e plan kanlinmọ lẹ yì; e namẹ sunnu lẹ di nunina.”  Todin, etẹwẹ hogbe lọ “e hẹji,” zẹẹmẹdo? E zẹẹmẹdo dọ ewọ sọ jẹte yì lẹdo he yìdo lẹ mẹ, enẹ wẹ, aigba. 10  Omẹ lọ he jẹte dopolọ wẹ sọ hẹji yì aga tlala hú olọn lẹpo, na ewọ nido sọgan na gigọ́-yinyin onú lẹpo. 11  Ewọ sọ namẹ, mẹdelẹ taidi apọsteli lẹ, mẹdelẹ taidi yẹwhegán lẹ, mẹdelẹ taidi wẹndagbe-jlatọ* lẹ, mẹdelẹ taidi lẹngbọhọtọ lẹ po mẹplọntọ lẹ po, 12  na hinhẹn gọ̀ do tẹnmẹ omẹ wiwe lẹ tọn, na azọ́n lizọnyizọnwiwa tọn, na didó daga agbasa Klisti tọn, 13  kaka mímẹpo nado jẹ dopo-yinyin to yise mẹ podọ to oyọnẹn he pegan gando Visunnu Jiwheyẹwhe tọn go kọ̀n, bo whẹ́n pete zun sunnu, jẹ obá ninọmẹ he yin gigọ́-yinyin Klisti tọn kọ̀n; 14  bọ mí ma nado yin ovivu lẹ ba, he yè nọ do yigọyigọ na taidi gbọn agbówhẹn lẹ dali bo nọ yin hinhẹn dánpe gbọn jẹhọn oplọn tọn lẹpo dali, gbọn ayiha gigẹdẹ gbẹtọ lẹ tọn dali podọ gbọn ayikinkan gigẹdẹ oklọ tọn dali. 15  Ṣigba, to nugbo didọ mẹ, mì gbọ mí ni gbọn owanyi dali whẹ́n to onú lẹpo mẹ to kọndopọ mẹ hẹ mẹhe yin tatọ́ lọ, yèdọ Klisti. 16  Gbọn ewọ gblamẹ, gbọn yinyin kinkọndopọ pẹkipẹki dali bo yin hinhẹn nado wazọ́n to kọndopọ mẹ gbọn agómẹ lẹpo he nọ namẹ nuhe nuhudo etọn tin lẹ dali, sọgbe hẹ azọ́n awutugonu dopodopo tọn kẹdẹdi nugopipe etọn, agbasa lọ pete nọ yinuwa na whinwhẹ́n agbasa lọ tọn na didó daga edetiti tọn to owanyi mẹ. 17  Enẹwutu, yẹn dọ ehe bo dekunnu gando e go to Oklunọ mẹ, dọ mìwlẹ masọ to zọnlinzin ba kẹdẹdile akọta lẹ nọ zinzọnlin do to ovọ́-yinyin ayiha yetọn tọn mẹ, 18  dile yé to zinvlu aliho nulẹnpọn tọn mẹ, bo jẹla na ogbẹ̀ he wá sọn Jiwheyẹwhe dè, na wunvi yetọn wutu, na sinsinyẹn ahun yetọn lẹ tọn wutu. 19  Na yé jẹgló wutu, yé jo yede na wantuntun nado yí nukunkẹn do wazọ́n mawé wunmẹ lẹpo. 20  Ṣigba, e ma yin nuhe mì plọn gando Klisti go niyẹn, 21  na nugbo tọn, dile etlẹ yindọ mìwlẹ sè ohó etọn bo yin pinplọn gbọn ewọ gblamẹ, kẹdẹdile nugbo to Jesu mẹ do, 22  dọ mì dona klọ́n gbẹtọ-yinyin hoho lọ dai ehe to kọndopọ mẹ hẹ aliho gbẹzan dai tọn mìtọn podọ ehe to yinyin hinhẹn gblezọn sọgbe hẹ ojlo oklọ tọn etọn lẹ; 23  ṣigba dọ mì dona hẹn huhlọn he nọ whàn ayiha mìtọn jẹ yọyọ, 24  bo dona ze gbẹtọ-yinyin yọyọ lọ dó, ehe yin didá sọgbe hẹ ojlo Jiwheyẹwhe tọn to dodowiwa nugbo po nugbonọ-yinyin po mẹ. 25  Enẹwutu, todin he mì ko klọ́n lalodido dai, dopodopo mìtọn ni nọ dọ nugbo hẹ kọmẹnu etọn, na awutugonu ode awetọ tọn wẹ mí yin. 26  Mì sọgan gblehomẹ, ṣogan mì waylando blo; mì dike owhè yihọ do mì to homẹgble mẹ blo, 27  mọdopolọ, mì natẹn Lẹgba blo. 28  Mì dike mẹhe nọ fìnnú sọ fìnnú ba blo, ṣigba mì gbọ ewọ ni nọ wazọ́n sinsinyẹn, bo nọ yí alọ etọn lẹ do wà azọ́n dagbe lẹ, na ewọ nido sọgan tindo nude nado má na mẹhe to nuhudo mẹ. 29  Mì dike ohó gbigble* de tọ́njẹgbonu sọn onù mìtọn mẹ blo, adavo ohó depope he yọ́n na mẹjlọdote dile ninọmẹ de biọ do, na e nido sọgan wà dagbe na sisètọ lẹ. 30  Humọ, mì nọ hẹn homẹgble gbigbọ wiwe Jiwheyẹwhe tọn blo, ehe ko yin yíyí do dohiagona mì na azán he gbè mì na yin tuntundote gbọn ofligọ dali. 31  Mì gbọ adi sinsinyẹn, homẹgble, adánjijẹ, awhá po mẹzunzun po ni dẹn do mì gọna ylanwiwa lẹpo. 32  Ṣigba, mì lẹzun homẹdagbenọ hlan ode awetọ, bo gọ́ na awuvẹmẹ sisosiso, bosọ nọ jona ode awetọ sọn ojlo mẹ wá kẹdẹdile Jiwheyẹwhe lọsu gbọn Klisti dali jona mì sọn ojlo mẹ wá do.

Nudọnamẹ Odò Tọn

Efe 4:11 Kavi, “mẹdehlan.”
Efe 4:29 To paa mẹ, “yìnyọ̀n.”