Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Efesunu lẹ 1:1-23

1  Paulu, apọsteli Klisti Jesu tọn de gbọn ojlo Jiwheyẹwhe tọn gblamẹ, to wekanhlan omẹ wiwe he to Efesu lẹ podọ hlan nugbonọ he to kọndopọ mẹ hẹ Klisti Jesu lẹ:  Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn podọ Oklunọ Jesu Klisti dè.  Pipà ni tin hlan Jiwheyẹwhe podọ Otọ́ Oklunọ mítọn Jesu Klisti tọn, na ewọ ko yí dona gbigbọmẹ tọn lẹpo he tin to lẹdo olọn tọn lẹ mẹ to kọndopọ mẹ hẹ Klisti do dona mí,  kẹdẹdile ewọ ko de mí to kọndopọ mẹ hẹ Klisti jẹnukọnna didá aihọn tọn do, na míwlẹ nido yin wiwe bo ma tindo oblọ to owanyi mẹ to Jiwheyẹwhe nukọn.  Na ewọ ko de mí jẹnukọn taidi sọdodovi gbọn Jesu Klisti gblamẹ taidi ovi lẹ na ede, to kọndopọ mẹ hẹ nuhe nọ hẹn homẹ etọn hùn bo yin ojlo etọn,  nado hẹn pipà wá na ẹn na nukundagbe majẹhẹ gigonọ etọn he ewọ yí homẹdagbe do na mí gbọn mẹyiwanna etọn gblamẹ.  Gbọn mẹhe gblamẹ míwlẹ mọ tundote yí gbọn ofligọ he omẹ enẹ yí ohùn etọn do basi lọ gblamẹ, mọwẹ, yèdọ jona sẹ́nmẹjijẹ mítọn lẹ tọn, sọgbe hẹ nukundagbe majẹhẹ susugege etọn tọn.  Ewọ na mí ehe susugege to nuyọnẹn po linlẹn dagbe lẹpo po mẹ,  to enẹ mẹ dọ ewọ hẹn aṣli wiwe ojlo etọn tọn zun yinyọnẹn na mí. Ehe sọgbe hẹ nuhe nọ hẹn homẹ etọn hùn he e ko lẹn to ede mẹ 10  nado ze tito anadenanu tọn de dai to whenue ojlẹ dide lọ lẹ pé, enẹ wẹ, nado vọ́ onú lẹpo bẹpli dopọ to Klisti mẹ, yèdọ nuhe tin to olọn mẹ lẹ po nuhe tin to aigba ji lẹ po. Mọwẹ, to ewọ mẹ, 11  yèdọ mẹhe mílọsu lẹ ko yin dide nado yin gudutọ lẹ to pọmẹ hẹ, to enẹ mẹ dọ mí ko yin dide jẹnukọn sọgbe hẹ lẹndai ewọ he nọ deanana onú lẹpo sọgbe hẹ linlẹn ojlo etọn tọn, 12  na mí nido wadevizọn nado pà gigo etọn, yèdọ míwlẹ he yin omẹ tintan nado tindo todido to Klisti mẹ. 13  Ṣigba, mìlọsu lẹ ga tindo todido to ewọ mẹ to whenue mì ko sè ohó nugbo tọn lọ godo, enẹ wẹ wẹndagbe lọ he gando whlẹngán mìtọn go. Gbọn ewọ dali ga, to whenue mìwlẹ ko yise godo, gbigbọ dopagbe lọ yin yíyí do dohiagona mì, 14  ehe yin ohia jẹnukọn de gando ogú mítọn go, na lẹndai lọ he yin nado tún nutindo Jiwheyẹwhe lọsu titi tọn dote gbọn ofligọ de dali, hlan pipà gigonọ etọn. 15  Enẹ wẹ zọ́n bọ yẹnlọsu ga, sọn whenue yẹn ko sè gando yise he mì tindo to Oklunọ Jesu mẹ go podọ gando lehe mì nọ do e hia to nuyiwa mìtọn lẹ hẹ omẹ wiwe lẹpo mẹ do go, 16  yẹn ma doalọtena pẹdido do ota mìtọn mẹ. Yẹn zindonukọn nado nọ to dẹ̀ho gando mì go, 17  dọ Jiwheyẹwhe Oklunọ mítọn Jesu Klisti tọn, Otọ́ gigonọ lọ, nido sọgan na mì gbigbọ nuyọnẹn tọn po osọhia tọn po nado tindo oyọnẹn he pegan gando ewọ go; 18  na nukun ahun mìtọn tọn ko yin hùnhùn nado mọnú ganji, na mìwlẹ nido sọgan yọ́n nuhe todido he kọ̀n ewọ ylọ mì do lọ yin, nuhe gigo susugege he ewọ wleawu etọn taidi ogú de na omẹ wiwe lẹ yin, 19  podọ nuhe kiklo-yinyin huhlọn mayọnjlẹ etọn tọn gando mí mẹhe yin yisenọ lẹ go lọ yin. Ehe nọ yin mimọ to aliho he mẹ ewọ nọ yí huhlọn etọn zan te mẹ, 20  ehe e ko yizan gando Klisti go to whenue e fọ́n ẹn sọn oṣiọ lẹ mẹ bo ze e sinai do adusilọ etọn mẹ to olọn mẹ, 21  bo hẹn ẹn yiaga hú gandudu, aṣẹpipa, huhlọn, oklunọ-yinyin lẹpo podọ oyín he nọ yin yiylọ lẹpo, e ma yin to titonu ehe kẹdẹ mẹ, ṣigba to dehe ja lọ lọsu mẹ ga. 22  Ewọ sọ hẹn onú lẹpo zun mẹmẹglọ to afọ etọn lẹ glọ, bo hẹn ẹn yin tatọ́ onú lẹpo tọn na agun, 23  ehe yin agbasa etọn, yèdọ gigọ́-yinyin ewọ he gọ́ onú lẹpo to onú popo mẹ tọn.

Nudọnamẹ Odò Tọn