Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Timoti 2:1-26

2  Enẹwutu, hiẹ ovi ṣie, nọ to huhlọn mọyi to nukundagbe majẹhẹ he tin to kọndopọ mẹ hẹ Klisti Jesu lọ mẹ,  podọ nuhe hiẹ ko sè sọn dè e bọ mẹsusu ko yin kunnudetọ etọn lọ lẹ, ze onú ehelẹ do alọmẹ na omẹ nugbonọ lẹ, mẹhe to godo mẹ, na pegan mlẹnmlẹn nado plọn mẹdevo lẹ.  Taidi awhànfuntọ Klisti Jesu tọn dagbe de, hiẹ ni wleawu nado jiya.  Mẹdepope he to azọ́nwa taidi awhànfuntọ de ma nọ tlọ ede do ajọ́ aihọn ehe tọn lẹ mẹ, na ewọ nido sọgan yin alọkẹyi gbọn mẹhe yí i taidi awhànfuntọ de dali.  Humọ, eyin mẹdepope whlẹnagbà etlẹ yin to aihundida lẹ mẹ, jẹgbakun lọ ma nọ yin ṣinṣinyọn na ẹn adavo ewọ whlẹnagbà sọgbe hẹ osẹ́n lọ lẹ.  Glesi azọ́n sinsinyẹnwatọ wẹ dona yin omẹ tintan he na dù sinsẹ́n lẹ.  Nọ lẹnnupọn to whepoponu do nuhe yẹn to didọ lẹ ji; na taun tọn, Oklunọ na na we wuntuntun to onú lẹpo mẹ.  Flindọ Jesu Klisti yin finfọn sọn oṣiọ lẹ mẹ podọ okún Davidi tọn mẹ wẹ ewọ wá sọn, sọgbe hẹ wẹndagbe he yẹn nọ dọyẹwheho etọn;  to kọndopọ mẹ hẹ ehe wẹ yẹn to oyà kanyinylan tọn ji kakajẹ gẹdẹ lẹ ji taidi ylanwatọ de. Etomọṣo, yè ma dó gẹdẹ ohó Jiwheyẹwhe tọn. 10  Ehe wutu wẹ yẹn zindonukọn nado to akọndona onú lẹpo na mẹdide lẹ tọn wutu, na yelọsu ga nido sọgan mọ whlẹngán he to kọndopọ mẹ hẹ Klisti Jesu yí to pọmẹ hẹ gigo madopodo. 11  Nugbo wẹ ohó lọ: E họnwun dọ eyin mí kú dopọ, mí nasọ nọgbẹ̀ dopọ ga; 12  eyin mí zindonukọn to akọndonanu mẹ, mí nasọ dugán taidi ahọlu lẹ dopọ; eyin mí mọ́n ewọ, ewọ lọsu na mọ́n mí ga; 13  eyin mí ma yin nugbonọ, ewọ na yin nugbonọ, na e ma sọgan mọ́n ede. 14  Nọ to onú ehelẹ flin yé, bo nọ to nugbẹna yé to Jiwheyẹwhe nukọn taidi kunnudetọ, ma nado nọ dọ̀nnu do hogbe lẹ ji, yèdọ nuhe ma yọ́n-na-yizan to aliho depope mẹ, na e nọ diọkọna mẹhe to todoai lẹ. 15  Nọ wà nuhe go a pé lẹpo nado do dewe hia di mẹhe Jiwheyẹwhe kẹalọyi, yèdọ azọ́nwatọ de he ma nọ kuwinyan nudepope tọn, ehe nọ yí ohó nugbo tọn lọ zan to aliho he sọgbe mẹ. 16  Ṣigba, nọ gbẹ́ ohó ovọ́ he nọ kọnmasin do onú wiwe go lẹ dai; na yé na to nukọnzindo nado nọ hẹn jijọ-madi-Jiwheyẹwhe wá dogọ, 17  podọ ohó yetọn na gbàpe di apà vivó. Himeneu po Filetu po tin to yé mẹ. 18  Omẹ ehelẹ ko jo nugbo lọ do, bo to didọ dọ fọnsọnku lọ ko wá aimẹ; yé sọ to yise mẹdelẹ tọn husudo. 19  Mahopọnna enẹ lẹpo, dodonu dolido Jiwheyẹwhe tọn gbọṣi ote, bo tindo hiadonu ehe dọmọ: “Jehovah yọ́n mẹhe yin etọn lẹ,” podọ: “Gbọ mẹhe to oyín Jehovah tọn ylọ lẹpo ni gbẹ́ mawadodo dai.” 20  Todin, to owhé daho de gbè, e ma yin núzinzan sika po fataka po tọn lẹ kẹdẹ wẹ nọ tin to finẹ gba ṣigba atin tọn po okọ́ tọn po ga, podọ delẹ na lẹndai yẹyi tọn ṣigba devo lẹ na lẹndai madoyẹyi tọn. 21  Enẹwutu, eyin mẹde nọla na omẹ ehelẹ, ewọ na yin núzinzan de na lẹndai yẹyi tọn, he yin kinklandowiwe, bo yọ́n-na-yizan na klunọ etọn, bosọ yin awuwledaina na azọ́n dagbe lẹpo. 22  Enẹwutu, nọ họ̀nna ojlo jọja whenu tọn lẹ, ṣigba nọ doafọna dodowiwa, yise, owanyi, jijọho, to pọmẹ hẹ mẹhe nọ ylọ Oklunọ sọn ahun wiwe de mẹ lẹ. 23  Humọ, nọ gbẹ́ kanbiọ nulú tọn po wunvi tọn lẹ po dai, to yinyọnẹn mẹ dọ yé nọ hẹn avùn wá. 24  Ṣigba, e ma jẹ dọ afanumẹ Oklunọ tọn ni hoavùn, ṣigba ewọ dona nọ wà dẹẹdẹ hlan mẹlẹpo, bo pegan nado plọnmẹ, bosọ nọ duto ede ji to whenue ewọ to akọndona oylan, 25  bo nọ yí walọmimiọn do plọn mẹhe ma tindo ayilinlẹn dagbe lẹ; vlavo Jiwheyẹwhe sọgan na yé lẹnvọjọ he nọ planmẹ jẹ oyọnẹn he pegan nugbo tọn kọ̀n, 26  bọ yé sọgan gọ̀ biọ yede mẹ sọn omọ̀ Lẹgba tọn mẹ, yèdọ yé mẹhe ko yin wiwle gbẹ̀te gbọn ewọ dali, nado wà ojlo etọn.

Nudọnamẹ Odò Tọn