Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Timoti 1:1-18

1  Paulu, apọsteli Klisti Jesu tọn de gbọn ojlo Jiwheyẹwhe tọn gblamẹ sọgbe hẹ opagbe ogbẹ̀ tọn he tin to kọndopọ mẹ hẹ Klisti Jesu,  yẹn to wekanhlan Timoti, ovi yiwanna de: Na hiẹ ni tindo nukundagbe majẹhẹ, lẹblanu po jijọho po sọn Jiwheyẹwhe Otọ́ po Klisti Jesu Oklunọ mítọn po dè.  Yẹn dopẹna Jiwheyẹwhe, mẹhe yẹn to sinsẹ̀nzọn wiwe wà na dile tọgbo ṣie lẹ wà do podọ yẹn to mọwà po ayihadawhẹnamẹnu wiwe de po, na yẹn ma nọ gọ̀n ma flin we to ovẹvivẹ ṣie lẹ mẹ gbede, to ozán po okle po  podọ yẹn nọ to jijlo vẹkuvẹku nado mọ we, dile yẹn nọ to dasin towe lẹ flin, na yẹn nido sọgan gọ́ na ayajẹ.  Na yẹn flin yise matin yẹnuwiwa depope he tin to hiẹ mẹ, podọ ehe ko tin jẹnukọn to onọ̀-daho towe Loisi po onọ̀ towe Euniki po mẹ, ṣigba ehe yẹn deji dọ e tin to hiẹ lọsu mẹ ga.  Na ehe wutu wẹ yẹn flinnu we nado to nunina Jiwheyẹwhe tọn he tin to hiẹ mẹ lọ hẹn jizò di miyọ́n, ehe yin nina we gbọn alọ ṣie lẹ zizedo oji we dali.  Na Jiwheyẹwhe ma na mí gbigbọ obu tọn, ṣigba huhlọn tọn, owanyi tọn po wunza tọn po.  Enẹwutu, kunnudide gando Oklunọ mítọn go, kavi gando yẹn mẹhe yin gàntọ de na ewọ tọn wutu go ni ma huwinyan na we blo, ṣigba nọ tindo mahẹ to oyà kanyinylan tọn jiji na wẹndagbe tọn wutu mẹ sọgbe hẹ huhlọn Jiwheyẹwhe tọn.  Ewọ whlẹn mí gán bo yí oylọ wiwe do basi oylọna mí, e ma yin na azọ́n mítọn lẹ wutu, ṣigba gbọn lẹndai po nukundagbe majẹhẹ etọn po dali. Ehe yin nina mí to kọndopọ mẹ hẹ Klisti Jesu sọn whenu dindẹn die, 10  ṣigba todin, e ko yin hinhẹn họnwun hezeheze gbọn awusọhia Mẹwhlẹngántọ mítọn, Klisti Jesu tọn gblamẹ, mẹhe ko de okú sẹ̀ ṣigba bo tá hinhọ́n do ogbẹ̀ po magble po ji gbọn wẹndagbe lọ gblamẹ, 11  ehe wutu wẹ yẹn ko yin dide taidi yẹwhehodọtọ de podọ apọsteli de podọ mẹplọntọ de. 12  Na ehe tọn wutu wẹ yẹn sọ to oyà onú ehelẹ tọn ji, ṣigba winyan ma hù mi. Na yẹn yọ́n omẹ lọ he yẹn yise, podọ yẹn deji dọ ewọ penugo nado basi hihọ́na nuhe yẹn ko zedo alọmẹ na ẹn lọ kakajẹ azán enẹ gbè. 13  Nọ tẹdo ohia ohó he pegan lẹ tọn he hiẹ sè sọn dè e lọ go gligli gọna yise po owanyi po he tin to kọndopọ mẹ hẹ Klisti Jesu. 14  Nọ basi hihọ́na onú họakuẹ lọ he yin zizedo alọmẹ na we gbọn gbigbọ wiwe he tin to mí mẹ lọ dali. 15  Hiẹ yọ́n ehe, dọ mẹhe tin to Asia* lẹpo wẹ ko gbẹ́ mi dai. Figelu po Hẹmogini po tin to yé mẹ. 16  Na Oklunọ ni do lẹblanu hia whédo Onesifọlu tọn, na ewọ nọ saba hẹn kọfanamẹ wá na mi, podọ winyan gẹdẹ ṣie lẹ tọn ma hù i. 17  Kakatimọ, to whenue ewọ wá Lomu, e yí sọwhiwhe do dín mi bo mọ mi. 18  Na Oklunọ ni dike ewọ ni mọ lẹblanu sọn Jehovah dè to azán enẹ gbè. Podọ hiẹ lọsu yọ́n devizọn he e wà to Efesu lẹ ganji.

Nudọnamẹ Odò Tọn

2Ti  1:15* Pọ́n Ow 2:9, nudọnamẹ odò tọn.