Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Pita 2:1-22

2  Etomọṣo, yẹwhegán lalo lẹ sọ wá tin to akọta lọ ṣẹnṣẹn, kẹdẹdile mẹplọntọ lalo lẹ na wá tin to mì ṣẹnṣẹn do ga. Omẹ ehelẹ lọsu na gbọn yẹwiwa dali hẹn plọngiglọ* mẹvasudo tọn lẹ wá bo na tlẹ mọ́n klunọ lọ he họ̀ yé, bo to vasudo niyaniya tọn hẹnwa yedelẹ ji.  Humọ, mẹsusu na hodo walọ wantuntun tọn yetọn lẹ, podọ na yewlẹ tọn wutu, aliho nugbo tọn lọ na nọ yin nùzan dego.  Mọdopolọ, yé na gbọn nukunkẹn dali yí ohó oklọ tọn lẹ do hò mì dù. Ṣigba na yewlẹ tọn, whẹdida lọ sọn hohowhenu ma to gbàndọn, podọ vasudo yetọn ma to na gọ̀n.  Na taun tọn, eyin Jiwheyẹwhe ma whleawu nado sayana angẹli he waylando lẹ, ṣigba bo bẹ yé dlan Taltalu mẹ, bosọ jo yé do odò zinvlu gọ́ngọ́n tọn lẹ mẹ nado yin hihla dai na whẹdida;  podọ e ma whleawu nado sayana aihọn hohowhenu tọn de, ṣigba bo whlẹn Noa, yẹwhehodọtọ dodo tọn, po omẹ ṣinawe devo lẹ po gán to whenuena e hẹn singigọ wá aihọn omẹ jijọ-madi-Jiwheyẹwhe tọn lẹ tọn de ji;  podọ gbọn hinhẹn tòdaho Sodọmi po Gomọla po tọn zun afín dali, e gblewhẹdo yé bo ze ohia nuhe na wá jọ lẹ tọn de dai na omẹ jijọ-madi-Jiwheyẹwhe tọn lẹ;  podọ e whlẹn Lọti dodonọ, he pipeve to wantuntun mẹ mẹhe nọ diọnukunsọ osẹ́n lẹ tọn nọ dotukla tlala—  na dawe dodonọ enẹ, gbọn nuhe e nọ mọ bo nọ sè dile e to gbẹnọ to ṣẹnṣẹn yetọn egbesọegbesọ lẹ dali, alindọn dodonọ etọn nọ yin yasana, na walọ sẹ́nhẹngba tọn yetọn lẹ wutu—  Jehovah yọ́n lehe e nọ whlẹn mẹhe ze yede jo na Jiwheyẹwhe lẹ sọn whlepọn mẹ do, ṣigba bo nọ hla gbẹtọ mawadodonọ lẹ dai na azán whẹdida tọn nado yin sinsánsẹ, 10  yèdọ, titengbe mẹhe nọ doafọna agbasalan po ojlo lọ po nado hẹn ẹn flu bosọ nọ yí nukunpẹvi do pọ́n oklunọ-yinyin* lẹ. Yé yin adọgbotọ, ojlo mẹdetiti tọn watọ lẹ, bo ma nọ si omẹ gigonọ lẹ ṣigba nọ zánnu, 11  to whenuena e yindọ angẹli lẹ, mahopọnna dọ yé klohu yé to hlọnhlọn po huhlọn po mẹ, ma nọ hẹn whẹsadokọnamẹ wá sọta yé to hogbe mẹzunzun tọn lẹ mẹ, podọ yé ma nọ wàmọ, na yé tindo sisi na Jehovah wutu. 12  Ṣigba, taidi kanlin he ma nọ lẹnnupọn, he to jọwamọ-liho nọ yin jiji nado yin wiwle bo yin hùhù lẹ, omẹ ehelẹ, to onú he mẹ yé yin wunvinọ bo nọ zánnu te lẹ, na jiya vasudo tọn to aliho vasudo tọn yetọn titi mẹ, 13  bo waylan do yedelẹ taidi ale de na ylanwiwa. Yé nọ pọ́n gbẹzan fẹẹmẹninọ tọn zinzan to okle hlan di gbẹdudu. Dihó po oblọ lẹ po wẹ yé, bọ yé nọ mọ awuvivi zẹjlẹgo nado yí nuplọnmẹ lalo yetọn lẹ do hẹn mẹdevo lẹ buali dile yé to núdù dopọ po mì po. 14  Yé tindo nukun he gọ́ na ayọdide lẹ bo ma sọgan nọla na ylando, podọ yé nọ dó omọ̀ na alindọn he ma lodo lẹ. Yé tindo ahun he yin pinplọn to nukunkẹn mẹ. Ovi hodẹ̀do lẹ wẹ yé. 15  Gbọn ali jijlọ lọ gbigbẹdai dali, yé ko yin hinhẹn buali. Yé ko hodo ali Balaami, visunnu Beoli tọn, he yiwanna ale ylanwiwa tọn, 16  ṣigba e mọ wọhẹ yí na afọ he ewọ lọsu tùn nuhe sọgbe ji wutu. Kẹtẹkẹtẹ he ma nọ dọho de yí ogbè gbẹtọ tọn do dọho bo glọnalina aliho nuyiwa alẹdida yẹwhegán lọ tọn. 17  Asisa osin tọn he ma tindo osin lẹ po avìvì he yujẹhọn sinsinyẹn to hinhẹn dánpe lẹ po wẹ omẹ ehelẹ, podọ yuudidi zinvlu tọn ko yin hihla dai na yé. 18  Na yé nọ dọ ohó gboogbo he ma nọ hẹn ale de wá lẹ, podọ yé nọ yí ojlo agbasalan tọn lẹ po wantuntun lẹ po do dó omọ̀ na mẹhe ṣẹṣẹ to tintọ́n sọn gbẹtọ he nọ yinuwa to alibubu mẹ lẹ ṣẹnṣẹn. 19  To whenuena yé to opagbe mẹdekannujẹ tọn dó na yé, yelọsu lẹ gbẹ́ yin afanumẹ walọ gblezọn tọn lẹ. Na mẹdepope he duto mẹdevo ji nọ hẹn omẹ enẹ zun afanumẹ ede tọn. 20  Na taun tọn, to whenuena yé ko họ̀ngán sọn hẹnflu aihọn tọn lẹ mẹ gbọn oyọnẹn he pegan Oklunọ po Mẹwhlẹngántọ lọ Jesu Klisti po tọn gblamẹ godo, eyin yé sọ vọ́ tlọ biọ onú ehelẹ dopolọ mẹ bo yin dududeji, ninọmẹ godo mẹ tọn yetọn lẹ ylanhu tintan tọn. 21  Na e na ko pọnte na yé ma nado ko yọ́n ali dodowiwa tọn lọ hezeheze hú dọ to whenuena yé ko yọ́n ẹn hezeheze godo, yé ni lẹkọ sọn gbedide wiwe he yin nina yé lọ kọ̀n. 22  Nuhe howhinwhẹn nugbo lọ dọ ko jọ do yé go: “Avún ko lẹkọ do oslú edetiti tọn kọ̀n, podọ ohàn asi he yè ko lawuna sọ lẹkọyi blu ogbọ̀n.”

Nudọnamẹ Odò Tọn

2Pi 2:1 Kavi, “sinsẹ̀n klandovo.”
2Pi 2:10 Dlẹnalọdo Jiwheyẹwhe po mẹhe e na aṣẹpipa lẹ po.