Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Pita 1:1-21

1  Simọni Pita, afanumẹ podọ apọsteli Jesu Klisti tọn de, hlan omẹ lọ lẹ he ko mọ yise de yí, he yin lẹblanulọkẹyi he sọzẹn hẹ míwlẹ tọn, gbọn dodowiwa Jiwheyẹwhe mítọn po Mẹwhlẹngántọ lọ Jesu Klisti po tọn gblamẹ:  Na nukundagbe majẹhẹ po jijọho po ni yin hinhẹn sudeji hlan mì gbọn oyọnẹn he pegan Jiwheyẹwhe po Jesu Oklunọ mítọn po tọn dali,  to whenuena e yindọ huhlọn etọn he wá sọn Jiwheyẹwhe dè ko na mì onú lẹpo he gando ogbẹ̀ po mẹdezejo na Jiwheyẹwhe po go vọnu, gbọn oyọnẹn he pegan omẹ lọ he yí gigo po jijọ dagbe po do ylọ mí tọn gblamẹ.  Gbọn onú ehelẹ gblamẹ, e ko na mí opagbe họakuẹ he klo tlala lẹ vọnu, na mì nido sọgan gbọn ehelẹ dali tindo mimá to ninọmẹ Jiwheyẹwhe tọn mẹ, to whenuena e yindọ mì ko họ̀ngán sọn walọ gblezọn aihọn tọn he yin hinhẹnwa gbọn ojlo ylankan dali mẹ.  Mọwẹ, na whẹwhinwhẹ́n ehe taun wutu, gbọn vivẹnudido vẹkuvẹku mìtọn lẹpo dali taidi kọdetọn de, mì yí jijọ dagbe dogọ yise mìtọn, oyọnẹn dogọ jijọ dagbe mìtọn,  mawazẹjlẹgo dogọ oyọnẹn mìtọn, akọndonanu dogọ mawazẹjlẹgo mìtọn, mẹdezejo na Jiwheyẹwhe dogọ akọndonanu mìtọn,  owanyi mẹmẹsunnu tọn dogọ mẹdezejo na Jiwheyẹwhe mìtọn, owanyi dogọ owanyi mẹmẹsunnu tọn mìtọn.  Na eyin onú ehelẹ tin to mì mẹ bo gọfla, yé na glọnalina mì ma nado gbọjọ kavi yin mẹhe ma tindo sinsẹ́n gando oyọnẹn he pegan Oklunọ mítọn Jesu Klisti tọn go.  Na eyin onú ehelẹ ma tin to mẹde mẹ, ewọ tọ́nnukun, bo miọn nukun etọn lẹ do hinhọ́n, bosọ wọn dọ emi ko yin kiklọwé sọn ylando hoho emitọn lẹ mẹ. 10  Mẹmẹsunnu lẹ emi, na whẹwhinwhẹ́n ehe wutu, mì wà nuhe go mì pé lẹpo pete nado hẹn oylọ po mẹdide mìtọn po họnwun na mìde; na eyin mì to onú ehelẹ wà zọnmii, mì ma na gboawupo to aliho depope mẹ gbede. 11  Gbọnmọ dali, na nugbo tọn, aliho lọ na yin hunhundonuvo na mì petepete nado biọ ahọluduta madopodo Oklunọ po Mẹwhlẹngántọ mítọn Jesu Klisti po tọn mẹ. 12  Na ehe wutu, yẹn ma na wọn nado nọ flinnu mì to whepoponu gando onú ehelẹ go, dile etlẹ yindọ mì ko yọ́n yé bo ko yin hinhẹn lodo gligli to nugbo lọ mẹ, he tin to mì mẹ. 13  Ṣigba yẹn mọdọ e sọgbe, dile e na dẹnsọ bọ yẹn na tin to gòhọtúntún ehe mẹ, nado nọ dozolanmẹna mì gbọn nuflinmẹ ṣie lẹ dali, 14  dile yẹn yọnẹn do dọ dide dai gòhọtúntún ṣie tọn na wá aimẹ to madẹnmẹ, kẹdẹdile Oklunọ mítọn Jesu Klisti ko dohia mi do ga. 15  Enẹwutu, yẹn na wà nuhe go yẹn pé lẹpo ga to ojlẹ lẹpo mẹ dọ, to yìyì ṣie godo, mìwlẹ nido sọgan penugo nado nọ vọ́ onú ehelẹ flin na mìde. 16  Lala, e ma yin gbọn hihodo otàn lalo he yè yí ayikinkan gigẹdẹ do doai lẹ dali wẹ mí hẹn huhlọn po tintin tofi Oklunọ mítọn Jesu Klisti tọn po zun yinyọnẹn na mì gba, ṣigba na mí lẹzun kunnudetọ he yí nukun do mọ gigo daho etọn wutu wẹ. 17  Na e mọ gbégbò po gigo po yí sọn Jiwheyẹwhe Otọ́ dè, to whenuena hogbe taidi ehelẹ yin didọ hlan ẹn gbọn gigo jiawu lọ dali dọmọ: “Ehe wẹ visunnu ṣie, mẹyiwanna ṣie, mẹhe yẹnlọsu ko kẹalọyi.” 18  Mọwẹ, mí sè hogbe ehelẹ yin didọ sọn olọn mẹ to whenuena mí tin po e po to osó wiwe lọ ji. 19  Taidi kọdetọn de, ohó dọdai tọn lọ yin hinhẹn họnwun dogọ na mí; podọ mì to dagbe wà nado nọ payi e go taidi hlan miyọ́ngbán de he to wunhọ́n to ofi dózin de, kaka owùn do kẹ̀n bọ sunwhlẹvu afọnnu tọn do zẹ̀, to ahun mìtọn lẹ mẹ. 20  Na mì yọ́n ehe whẹ́, dọ dọdai Owe-wiwe tọn depope ma nọ wá sọn tadena mẹdetiti tọn de mẹ gba. 21  Na dọdai ma ko gbọn ojlo gbẹtọ tọn dali wá to ojlẹ depope mẹ gba, ṣigba gbẹtọ lẹ dọho sọn Jiwheyẹwhe dè dile yé yin anadena gbọn gbigbọ wiwe dali do.

Nudọnamẹ Odò Tọn