Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Tẹsalonikanu lẹ 2:1-17

2  Ṣigba, mẹmẹsunnu lẹ emi, na nuhe dù tintin tofi Oklunọ mítọn Jesu Klisti tọn podọ yinyin bibẹpli dopọ míwlẹ tọn nado tin po ewọ po, mí to bibiọ to mì si  ma nado yawu hẹn lẹnpọn dagbe mìtọn bu kavi yin whinwhàn gbọn ohó gbọdo de dali kavi gbọn owẹ̀n nùmẹ tọn de dali kavi gbọn wekanhlanmẹ de he taidi nuhe wá sọn míwlẹ dè dali, he to didohia dọ azán Jehovah tọn ko wá.  Mì dike mẹde klọ mì to aliho depope mẹ blo, na e ma na wá adavo atẹṣiṣi* lọ wá whẹ́ bọ dawe sẹ́nhẹngbatọ lọ yin didehia, yèdọ ovi vasudo tọn.  Agọjẹdomẹtọ de wẹ ewọ bo nọ ze ede daga do mẹdepope he nọ yin yiylọdọ “yẹwhe” kavi nudepope he yin numẹsẹ̀n ji, bo gbọnmọ dali sinai to tẹmpli Jiwheyẹwhe tọn mẹ, bo to ede dohia to gbangba nado yin yẹwhe de.  Be mì ma flindọ, to whenue yẹn gbẹ́ pò to mì dè, yẹn nọ saba dọ onú ehelẹ na mì ya?  Podọ na enẹwutu todin, mìwlẹ yọ́n nuhe nọ yinuwa taidi aliglọnnamẹnu de, na e nido yin didehia to ojlẹ sisọ etọn mẹ.  Nugbo wẹ dọ nudabla sẹ́nhẹngba ehe tọn ko to azọ́nwa to alọnu; ṣigba kiki kakajẹ whenue ewọ he to nuyiwa to alọnu din taidi aliglọnnamẹnu de na tọ́n sọn aimẹ.  Na nugbo tọn, to whenẹnu wẹ sẹ́nhẹngbatọ lọ na yin didehia, mẹhe Oklunọ Jesu na yí gbigbọ onù etọn mẹ tọn do husudo bo na yí awusọhia tintin tofi etọn tọn do hẹn zun ovọ́.  Ṣigba, tintin tofi sẹ́nhẹngbatọ lọ tọn yin gbọn nuyiwa Satani tọn dali, yèdọ gbọn azọ́n huhlọnnọ lẹpo gọna ohia po nudabla lalo lẹ po dali 10  podọ gbọn oklọ mawadodo tọn lẹpo dali na mẹhe to dindọn lẹ taidi ahọsumẹ de, na yé ma kẹalọyi owanyi nugbo lọ tọn nado sọgan yin whinwhlẹngán wutu. 11  Enẹ wẹ zọ́n bọ Jiwheyẹwhe do dike yé ni yin kiklọ, na yé nido sọgan yí lalo sè, 12  na yemẹpo nido yin whẹdana na yé ma yí nugbo lọ sè wutu, ṣigba nọ hùnhomẹ to mawadodo mẹ. 13  Ṣigba, mì mẹmẹsunnu he Jehovah yiwanna lẹ emi, dandannu wẹ e yin na mí nado nọ dopẹna Jiwheyẹwhe do ota mìtọn mẹ to whepoponu, na Jiwheyẹwhe ko de mì sọn bẹjẹeji na whlẹngán gbọn gbigbọ yíyí do hẹn mì zun wiwe dali podọ gbọn yise mìtọn to nugbo lọ mẹ dali. 14  Na ehe tọn wutu wẹ ewọ do ylọ mì gbọn wẹndagbe he mí lá na mì lọ gblamẹ, nado mọ gigo Oklunọ mítọn Jesu Klisti tọn yí. 15  Enẹwutu, to whelọnu lo, mẹmẹsunnu lẹ emi, mì nọtegli bo tẹdo aṣa he mì ko yin pinplọn lẹ go, vlavo e yin gbọn owẹ̀n nùmẹ tọn gblamẹ kavi gbọn wekanhlanmẹ mítọn lẹ gblamẹ. 16  Humọ, na Oklunọ mítọn Jesu Klisti lọsu podọ Jiwheyẹwhe Otọ́ mítọn, yèdọ mẹhe yiwanna mí bo na mí homẹmimiọn madopodo po todido dagbe po gbọn nukundagbe majẹhẹ dali, 17  ni miọnhomẹna mì bo hẹn mì lodo to walọ po ohó dagbe lẹpo po mẹ.

Nudọnamẹ Odò Tọn

2Tẹ 2:3* Kavi, “mẹhe ko lẹgodo do sinsẹ̀n-bibasi nugbo lọ lẹ.”