Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Kọlintinu lẹ 9:1-15

9  Todin, gando lizọnyizọn* he tin na omẹ wiwe lẹ lọ go, e ma yin dandan na mi nado kanwehlan mì gba,  na yẹn yọ́n ojlo ayiha mẹ tọn mìtọn, ehe mẹ yẹn to awagundo te gando mì go na Makedonianu lẹ, dọ Akaia ko wleawufo todin sọn owhe dopo die, podọ zohunhun mìtọn ko dozolanmẹna suhugan yetọn.  Ṣigba, yẹn to mẹmẹsunnu lẹ dohlan, dọ awagundido mítọn gando mì go ma nado sọawuhia nado yin ovọ́ to whẹho ehe mẹ, ṣigba dọ mì nido sọgan wleawudai na taun tọn, kẹdẹdile yẹn ko nọ dọ dọ mìwlẹ na wà do.  Eyin e ma yinmọ, eyin e wá jọ bọ Makedonianu lẹ hodo mi wá bo mọdọ mì ma wleawudai, mìwlẹ po mí po wẹ na duwinyan to pọmẹ na jidenamẹ mítọn ehe wutu.  Enẹwutu, yẹn lẹndọ dandannu wẹ e yin nado na tuli mẹmẹsunnu lọ lẹ nado wá mì dè jẹnukọn podọ nado wleawudaina nunina alọtútlú tọn mìtọn he mì ko dopagbe etọn dai, dọ gbọnmọ dali ehe nido sọgan yin awuwlena dote taidi nunina alọtútlú tọn de bọ e ma na yin nuhe yin yíyí gbọn alọslonamẹ dali.  Ṣigba, gando ehe go, ewọ he tẹalọpò do dó nasọ tẹalọpò do gbẹ̀n; podọ ewọ he dó susugege nasọ gbẹ̀n susugege.  Mì gbọ omẹ dopodopo ni basi kẹdẹdile e ko magbe etọn to ahun etọn mẹ do, e ma yin po awuwhiwhle po kavi po huhlọn yí do hẹnmẹ po gba, na Jiwheyẹwhe nọ yiwanna nunamẹtọ homẹhunnọ.  Humọ, Jiwheyẹwhe penugo nado hẹn nukundagbe majẹhẹ etọn lẹpo sudeji dohlan mì, dọ dile mì nọ tindo pekọ mlẹnmlẹn to whepoponu to onú lẹpo mẹ do, mì nido sọgan tindo susugege nuhe mì tindo nuhudo etọn lẹ tọn nado wà azọ́n dagbe lẹpo.  (Kẹdẹdile e ko yin kinkàndai do dọmọ: “Ewọ ko namẹ nunina susu, e ko na wamọnọ lẹ, dodowiwa etọn zindonukọn kakadoi.” 10  Todin, ewọ he nọ na okún susugege nudotọ podọ núdùdù na dùdù na na mì okún bo na hẹn ẹn sudeji nado dó bo nasọ hẹn sinsẹ́n dodowiwa mìtọn tọn jideji.) 11  Mì to yinyin hinhẹn zun adọkunnọ to onú lẹpo mẹ na mì nido sọgan nọ yí alọtútlú do na to aliho lẹpo mẹ, podọ gbọn vivẹnudido mítọn lẹ gblamẹ, alọtútlú mọnkọtọn nọ whàn gbẹtọ lẹ nado dopẹna Jiwheyẹwhe; 12  na lizọnyizọn* sinsẹ̀nzọn gbangba tọn ehe ma yin nado wleawuna onú susugege na nuhudo omẹ wiwe lẹ tọn poun gba ṣigba nado sudeji ga to pẹdido na Jiwheyẹwhe mẹ. 13  Gbọn kunnudenu he lizọnyizọn* ehe nọ na lọ gblamẹ, yé pagigona Jiwheyẹwhe na mìwlẹ litaina wẹndagbe he gando Klisti go lọ wutu, dile mìwlẹ lá to gbangba dọ mì wàmọ do, podọ na mì yin alọtlútọ to nunina he mì basi hlan yé podọ hlan mẹlẹpo lọ mẹ wutu; 14  podọ gbọn ovẹvivẹ na mìwlẹ dali, yé tindo ojlo vẹkuvẹku na mì na nukundagbe majẹhẹ mayọnjlẹ Jiwheyẹwhe tọn do mì ji wutu. 15  Opẹ́ wẹ na Jiwheyẹwhe na nunina vọnu mayọnjlẹ etọn.

Nudọnamẹ Odò Tọn

2Kọ 9:1* Kavi, “alọgọ.”
2Kọ 9:12* Pọ́n wefọ 1, nudọnamẹ odò tọn.
2Kọ 9:13* Pọ́n wefọ 1, nudọnamẹ odò tọn.