Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Kọlintinu lẹ 8:1-24

8  Todin, mẹmẹsunnu lẹ emi, mí jlo dọ mì ni yọnẹn gando nukundagbe majẹhẹ Jiwheyẹwhe tọn he ko yin nina agun Makedonia tọn lẹ lọ go,  dọ to whenue yé to yaji to whlepọn daho de glọ, ayajẹ yetọn he gọfla po hẹ́njijẹ sinsinyẹn yetọn po hẹn alọtútlú susugege yetọn yin daho tlala.  Na sọgbe hẹ nugopipe yetọn, mọwẹ, yẹn dekunnu dọ ehe zẹ̀ nugopipe yetọn titi go,  dile yelọsu lẹ na yede to mí vẹ̀ vẹkuvẹku mapote nado mọ lẹblanulọkẹyi lọ yí nado yí homẹdagbe do na nunina podọ nado tindo mahẹ to lizọnyizọn* he na yin bibasi na omẹ wiwe lẹ lọ mẹ.  Podọ e ma yin kẹdẹdile míwlẹ lẹn do poun gba, ṣigba jẹnukọn whẹ́, yé ze yede jo na Oklunọ podọ na míwlẹ gbọn ojlo Jiwheyẹwhe tọn gblamẹ.  Ehe wutu wẹ mí na tuli Titu dọ, kẹdẹdile e ko yindọ ewọ wẹ bẹ ehe jẹeji to ṣẹnṣẹn mìtọn, mọdopolọ ga ewọ wẹ ni dotana nunina homẹdagbe tọn mìtọn ehe dopolọ.  Etomọṣo, kẹdẹdile mì nọ to susudeji to onú lẹpo mẹ do, yèdọ to yise mẹ, to ohó mẹ, to oyọnẹn mẹ, to vivẹnudido lẹpo mẹ, podọ to owanyi mítọn he mí tindo na mì ehe mẹ, na mì nisọ sudeji to nunina homẹdagbe tọn ehe mẹ ga.  E ma yin gbedide de wẹ yẹn to nina mì gba, ṣigba to pọndohlan mẹ na vivẹnudido mẹdevo lẹ tọn podọ nado tẹ́n nugbo-yinyin owanyi mìtọn tọn pọ́n wutu wẹ yẹn do to hodọ.  Na mìwlẹ yọ́n nukundagbe majẹhẹ Oklunọ mítọn Jesu Klisti tọn, dọ dile ewọ tlẹ yin adọkunnọ, e lẹzun wamọnọ na mìtọn wutu, na mì nido sọgan lẹzun adọkunnọ gbọn hẹ́njijẹ etọn gblamẹ. 10  Podọ pọndohlan ṣie dọ wẹ yẹn te gando ehe go: na whẹho ehe yin alenu na mì, na yẹn mọdọ sọn owhe dopo die wẹ mìwlẹ ko bẹjẹeji e ma yin nado wà kẹdẹ gba ṣigba ojlo lọ nado wà ga; 11  to whenẹnu, todin, mì sọ wà ẹ dotana, na kẹdẹdile mì ko tindo ojlo vẹkuvẹku nado wà do, mọdopolọ mì dona wà ẹ dotana sọn nuhe mì tindo lẹ mẹ ga. 12  Na eyin ojlo lọ tin to finẹ jẹnukọn, na taun tọn e nọ yin alọkẹyi sọgbe hẹ nuhe mẹlọ tindo, e ma yin sọgbe hẹ nuhe mẹlọ ma tindo gba. 13  Na yẹn ma jlo dọ e ni bọawuna mẹdevo lẹ, ṣigba bo vẹawuna mìwlẹ gba; 14  ṣigba dọ gbọn hinhẹn sọzẹn dali, lankan mìtọn todin nido sọgan sú odò nuhe whèdo yé tọn, na lankan yetọn nido sọgan wá sú odò nuhe whèdo mìwlẹ tọn ga, na zẹ́nsisọ nido sọgan tin. 15  Kẹdẹdile e ko yin kinkàndai do dọmọ: “Mẹhe tindo susu ma tindo hugan, podọ mẹhe tindo vude ma tindo whè hugan.” 16  Todin, opẹ́ wẹ na Jiwheyẹwhe na zize vivẹnudido dopolọ he míwlẹ tindo na mì do ahun Titu tọn mẹ, 17  na e ko yigbe na tulinamẹ lọ nugbonugbo, ṣigba, na vivẹnudido tlala etọn wutu sọn ojlo etọn titi mẹ wẹ e ja mì dè. 18  Ṣigba, mí sọ to mẹmẹsunnu he pipà etọn gando wẹndagbe lọ go ko gbayipe gbọn agun lẹpo mẹ lọ dohlan po e po. 19  E ma yin enẹ kẹdẹ, ṣigba ewọ sọ yin dide gbọn agun lẹ dali nado yin tomẹyitọ hatọ mítọn to kọndopọ mẹ hẹ nunina homẹdagbe tọn ehe, he mí na penukundego na gigo Oklunọ tọn podọ nado dohia dọ mí ko wleawufo nado gọalọna mẹdevo lẹ. 20  Enẹwutu, mí ma jlo dọ mẹdepope ni mọhodọdo mí go gando nunina alọtútlú tọn he go mí na penukundo lọ go gba. 21  Na míwlẹ “yí ahundopo do penukundo onú lẹpo go, e ma yin to nukun Jehovah tọn kẹdẹ mẹ gba, ṣigba to nukun gbẹtọ lẹ tọn mẹ ga.” 22  Humọ, mí sọ to mẹmẹsunnu mítọn he mí ko tẹnpọn whlasusu to onú susu mẹ bo mọdọ e yin vivẹnunọ lọ dohlan po yé po, ṣigba ewọ sọ yin vivẹnunọ tlala todin na jidide mlẹnmlẹn etọn to mì mẹ wutu. 23  Nalete, eyin kanbiọ depope tin gando Titu go, lizọnyizọnwatọ hatọ de wẹ ewọ yin hẹ mi podọ azọ́nwatọ hatọ de na ale mìtọn; kavi eyin gando mẹmẹsunnu mítọn lẹ go wẹ, apọsteli agun lẹ tọn podọ gigo Klisti tọn wẹ yé yin. 24  Enẹwutu, mì do nugbo-yinyin owanyi mìtọn tọn hia yé podọ nuhe mí ko doawagun etọn gando mì go to agun lẹ nukọn.

Nudọnamẹ Odò Tọn

2Kọ 8:4* Kavi, “alọgọ.”