Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Kọlintinu lẹ 5:1-21

5  Na mí yọnẹn dọ eyin ohọ̀ aigba ji tọn mítọn, yèdọ gòhọ ehe, wá yin hihọliai, mí na wá tindo ohọ̀ de sọn Jiwheyẹwhe dè, ohọ̀ de he yè ma yí alọ lẹ do basi, yèdọ madopodo to olọn mẹ.  Na nugbo tọn, to ohọ̀ fininọ ehe mẹ wẹ mí to hunwẹn te, bo to jijlo vẹkuvẹku nado ze enẹ he yin mítọn sọn olọn lọ dó,  sọmọ bọ, to whenue mí na ko ze e dó na taun tọn, mí ma na yin mimọ to omẹ́.  Na nugbo tọn, míwlẹ he to gòhọ ehe mẹ nọ wẹnhun, na mí yin agbàn dó na; e ma yin na míwlẹ jlo nado de e dai wutu wẹ gba, ṣigba nado ze awetọ lọ dó, bọ ogbẹ̀ nido sọgan ze dehe nọ kú lọ mì.  Todin, ewọ he wleawu mítọn dai na onú ehe lọ wẹ Jiwheyẹwhe, mẹhe na mí ohia nuhe na wá jọ tọn, enẹ wẹ, gbigbọ lọ.  Enẹwutu, mí nọ gọ́ na adọgbigbo to whepoponu bo nọ yọnẹn dọ, dile e na dẹnsọ bọ fininọ mítọn na tin to agbasa lọ mẹ, mí ma tin hẹ Oklunọ,  na gbọn yise dali wẹ mí to zọnlinzin, e ma yin gbọn mimọ dali.  Ṣigba, mí nọ gọ́ na adọgbigbo bọ homẹ mítọn sọ nọ hùn ma nado nọ agbasa lọ mẹ ba podọ nado basi fininọ mítọn hẹ Oklunọ.  Enẹwutu, mí sọ to hinhẹn ẹn zun yanwle mítọn dọ, vlavo mí tindo fininọ mítọn hẹ ẹ wẹo kavi mí ma tin hẹ ẹ, mí nido sọgan yin alọkẹyi to ewọ dè. 10  Na mímẹpo wẹ dona yin hinhẹn sọawuhia to whẹdaján Klisti tọn nukọn, na omẹ dopodopo nido sọgan mọ ale etọn yí na nuhe e wà gbọn agbasa dali lẹ, sọgbe hẹ nuhe e ko wà lẹ, vlavo e yin dagbe kavi oylan. 11  Enẹwutu, to yinyọnẹn mẹ dọ mí dona tindo obu Oklunọ tọn, mí nọ to linlẹndiọna gbẹtọ lẹ, ṣigba mí ko yin hinhẹn sọawuhia Jiwheyẹwhe. Etomọṣo, yẹn tindo todido dọ ayihadawhẹnamẹnu mìtọn ko sọ gọalọna mì nado yọ́n mẹhe nkọ mí yin ga. 12  Mí masọ to mídelẹ vọ́ pà hlan mì gba, ṣigba dotẹnmẹ hundote na mì wẹ mí te nado doawagun gando mí go, na mì nido sọgan na gblọndo mẹhe nọ doawagun gando awusọhia gbonu tọn go lẹ bọ e ma yin gando ahun go lẹ. 13  Na eyin míwlẹ hùn tadu, be na Jiwheyẹwhe tọn wutu wẹ; eyin míwlẹ tindo wunza, be na mìwlẹ tọn wutu wẹ. 14  Na owanyi he Klisti tindo nọ whàn mí, na nujikudo míwlẹ tọn wẹ, dọ omẹ dopo kú na mẹlẹpo; enẹwutu, mẹlẹpo ko kú; 15  podọ ewọ kú na mẹlẹpo na mẹhe to ogbẹ̀ lẹ ma nado nọgbẹ̀ na yede ba, ṣigba na omẹ lọ he kú na yé bo yin finfọn. 16  Enẹwutu, bẹsọn din sọyi, mí ma nọ pọ́n mẹde hlan sọgbe hẹ agbasalan ba. Eyin mí tlẹ ko pọ́n Klisti hlan sọgbe hẹ agbasalan, e họnwun dọ mí masọ nọ pọ́n ẹn hlan domọ ba todin. 17  Enẹwutu, eyin mẹdepope tin to kọndopọ mẹ hẹ Klisti, ewọ yin nudida yọyọ de; onú hoho lẹ ko juwayi, mì pọ́n! onú yọyọ lẹ ko wá aimẹ. 18  Ṣigba, onú lẹpo wẹ wá sọn Jiwheyẹwhe dè, mẹhe hẹn mí gbọwhẹ hẹ ede gbọn Klisti gblamẹ bo na mí lizọnyizọn whẹgbigbọ tọn, 19  enẹ wẹ yindọ, Jiwheyẹwhe to aihọn de hẹn nado gbọwhẹ hẹ ede gbọn Klisti gblamẹ, bo ma nọ hia sẹ́nmẹjijẹ yetọn lẹ dokọna yé, podọ ewọ ze ohó whẹgbigbọ tọn lọ do alọmẹ na mí. 20  Enẹwutu, míwlẹ wẹ afọzedaitọ lẹ he to otẹn Klisti tọn mẹ, taidi dọ Jiwheyẹwhe to vẹvẹ gbọn míwlẹ gblamẹ nkọtọn. Taidi mẹhe to otẹn Klisti tọn mẹ lẹ, mí vẹvẹ dọmọ: “Mì gbọwhẹ hẹ Jiwheyẹwhe.” 21  Omẹ lọ he ma yọ́n ylando wẹ ewọ ko hẹn nado yin ylando na mí, na míwlẹ nido sọgan lẹzun dodonọ to nukun Jiwheyẹwhe tọn mẹ gbọn ewọ gblamẹ.

Nudọnamẹ Odò Tọn