Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Kọlintinu lẹ 4:1-18

4  Enẹwutu wẹ, to whenuena e yindọ míwlẹ tindo lizọnyizọn ehe sọgbe hẹ lẹblanu he yin didohia mí, mí ma gbọjọ;  ṣigba mí ko gbẹ́ onú whiwhla he huwinyan lẹ dai, bo ma nọ yí ayiha gigẹdẹ do zinzọnlin, mọdopolọ mí ma nọ hẹn ohó Jiwheyẹwhe tọn flusọ́, ṣigba to Jiwheyẹwhe nukọn, mí nọ do mídelẹ hia gbẹtọ lẹpo to aliho he na dọ̀n ayihadawhẹnamẹnu yetọn dogo de mẹ gbọn nugbo lọ hinhẹn họnwun dali.  Todin, na nugbo tọn, eyin wẹndagbe he lá mí te whlá, be to mẹhe to dindọn lẹ ṣẹnṣẹn wẹ e whlá* te,  yèdọ to mayisenọ lẹ ṣẹnṣẹn, ayiha mẹhe tọn yẹwhe titonu ehe tọn ko tọ́nnukunna lẹ, na hinhọ́n wẹndagbe gigonọ he gando Klisti go, mẹhe tin to apajlẹ Jiwheyẹwhe tọn mẹ lọ tọn ma nado họnwun do yé ji.  Na mí ma to yẹwheho mídetiti tọn dọ gba, ṣigba Klisti Jesu tọn taidi Oklunọ, podọ mílọsu lẹ taidi afanumẹ mìtọn na Jesu tọn wutu.  Na Jiwheyẹwhe wẹ omẹ lọ he dọmọ: “Gbọ hinhọ́n ni họnwun sọn zinvlu mẹ,” podọ ewọ ko họnwun do ahun mítọn lẹ ji nado yí oyọnẹn gigonọ Jiwheyẹwhe tọn do họ́n do yé ji gbọn nukunmẹ Klisti tọn dali.  Ṣigba, míwlẹ tindo adọkunnu ehe to núzinzan okọ́ tọn lẹ mẹ, na huhlọn he hú jọwamọ tọn nido sọgan yin Jiwheyẹwhe tọn bọ e ma yin mítọn titi gba.  Mí yin finfinyọ́n to aliho lẹpo mẹ, ṣigba mí ma yin ginglọn mlẹnmlẹn ma nado sẹtẹn gba; mí jẹflumẹ, ṣigba e ma yindọ mí ma tindo ali họ̀ngán tọn depope wẹ gba;  mí yin homẹkẹndo, ṣigba mí ma yin gbigbẹdai; mí yin zinzindai, ṣigba mí ma yin huhusudo. 10  To whepoponu wẹ mí nọ doakọnna to filẹpo to agbasa mítọn mẹ nuyiwahẹmẹ he nọ hẹn okú wá he yè hẹnwa Jesu ji, na ogbẹ̀ Jesu tọn nido sọgan yin hinhẹn sọawuhia to agbasa mítọn mẹ ga. 11  Na míwlẹ he to ogbẹ̀ nọ to yinyin hinhẹn pannukọn okú to whepoponu na Jesu tọn wutu, na ogbẹ̀ Jesu tọn nido sọgan yin hinhẹn sọawuhia to agbasalan mítọn he nọ kú lọ mẹ ga. 12  Enẹwutu, okú to azọ́nwa to míwlẹ mẹ, ṣigba ogbẹ̀ to mìwlẹ mẹ. 13  Todin, na mí tindo gbigbọ yise tọn dopolọ taidi enẹ he go e yin kinkàn gando dọmọ: “Yẹn do yise hia, enẹwutu wẹ yẹn dọho,” mílọsu do yise hia podọ enẹwutu wẹ mí dọho, 14  to yinyọnẹn mẹ dọ ewọ he fọ́n Jesu na fọ́n mí dopọ hẹ Jesu ga bo nasọ hẹn míwlẹ to pọmẹ po mìwlẹ po wá nukọn etọn. 15  Na onú lẹpo wẹ yin na mìtọn wutu, na nukundagbe majẹhẹ he yin hinhẹn jideji lọ nido sọgan gọfla na pẹdido mẹsusu tọn wutu nado na gigo Jiwheyẹwhe. 16  Enẹwutu, mí ma gbọjọ, ṣigba eyin gbẹtọ he mí yin to gbonu tlẹ to kukupẹ́, e họnwun dọ gbẹtọ he mí yin to homẹ to yinyin hinhẹn jẹ yọyọ egbesọegbesọ. 17  Na dile etlẹ yindọ ojlẹ gli wẹ homẹkẹn tin na bosọ fua, gigo he pinpẹn etọn ma yọnjlẹ mẹ wẹ e nọ dekọtọn do na mí bosọ yin madopodo; 18  dile mí ze nukun mítọn lẹ, e ma yin do nuhe nọ yin mimọ lẹ ji, ṣigba do nuhe ma nọ yin mimọ lẹ ji. Na nuhe nọ yin mimọ lẹ yin ojlẹ gli tọn, ṣigba nuhe ma nọ yin mimọ lẹ yin madopodo tọn.

Nudọnamẹ Odò Tọn

2Kọ 4:3* Kavi, “yin nuṣinyọndo nukunmẹ na.”