Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Kọlintinu lẹ 3:1-18

3  Be mí nasọ vọ́ jẹ mídelẹ pà ji wẹ ya? Kavi vlavo, taidi omẹ delẹ, be míwlẹ tindo nuhudo wekanhlanmẹ mẹpipa tọn lẹ tọn hlan mì kavi sọn mì dè wẹ?  Mìwlẹ lọsu wẹ yin wekanhlanmẹ mítọn, he yin kinkàn do ahun mítọn mẹ, bọ gbẹtọvi lẹpo yọnẹn bosọ nọ hia.  Na e họnwun dọ mìwlẹ wẹ yin wekanhlanmẹ Klisti tọn de he míwlẹ he yin lizọnyizọnwatọ lẹ kàn, e ma yin kinkàn po wesin po gba, ṣigba po gbigbọ Jiwheyẹwhe ogbẹ̀nọ tọn po, e ma yin do zannu paa lẹ ji gba, ṣigba do zannu he yè yí agbasalan do basi lẹ ji, yèdọ do ahun lẹ ji.  Todin, gbọn Klisti gblamẹ wẹ mí tindo wunmẹ jidide ehe tọn to Jiwheyẹwhe mẹ.  E ma yindọ mílọsu lẹ pegan mlẹnmlẹn nado pọ́n nudepope hlan taidi nuhe to wiwá sọn mídetiti dè wẹ gba, ṣigba pipegan mlẹnmlẹn mítọn wá sọn Jiwheyẹwhe dè,  mẹhe, na nugbo tọn, ko hẹn mí pegan mlẹnmlẹn nado yin lizọnyizọnwatọ alẹnu yọyọ de tọn lẹ, e ma yin kandai osẹ́n tọn de tọn gba, ṣigba gbigbọ tọn; na kandai osẹ́n tọn lọ nọ gblewhẹ okú tọn do omẹ, ṣigba gbigbọ nọ hẹnmẹ wá ogbẹ̀.  Humọ, eyin todohukanji osẹ́n tọn he nọ hẹn okú wá podọ he yin kinkàn po wekun lẹ po do zannu lẹ ji wá aimẹ to gigo mẹ, sọmọ bọ ovi Islaeli tọn lẹ ma sọgan pọ́n nukunmẹ Mose tọn tlintlin, na gigo nukunmẹ etọn tọn wutu, yèdọ gigo de he na busẹ,  naegbọn lizọnyizọn gbigbọ tọn ma nado tindo gigo hugan?  Na eyin todohukanji osẹ́n tọn he nọ hẹn whẹgbledomẹ wá yin gigonọ, nẹmunẹmu wẹ dehe nọ hẹn dodowiwa wá ma nado sù to gigo mẹ hugan. 10  Na nugbo tọn, yèdọ enẹ he ko yin hinhẹn zun gigonọ wayi ko yin gigo desọn e go to aliho ehe mẹ, na gigo he yiaga hugan ẹn lọ wutu. 11  Na eyin enẹ he na busẹ lọ yin hinhẹnwa to gigo mẹ, nẹmunẹmu wẹ gigo onú he na gbọṣi aimẹ lọ tọn. 12  Enẹwutu, dile mí tindo todido mọnkọtọn, mí to awuvivo hodidọ tọn daho de yizan, 13  podọ e ma yin dile Mose nọ yí nukunmẹṣinyọnnu de ṣinyọ́n nukun etọn mẹ do, bọ ovi Islaeli tọn lẹ ma nado sọgan pọ́n opodo nuhe na busẹ lọ tọn tlintlin. 14  Ṣigba, huhlọn nugopipe apọ̀nmẹ tọn yetọn lẹ ko depò. Na kakajẹ azán ehe gbè, nukunmẹṣinyọnnu dopolọ gbọṣi aimẹ to alẹnu* hoho lọ hihia whenu, na e ko busẹ gbọn Klisti gblamẹ wutu. 15  Na nugbo tọn, kakajẹ egbé, whedepopenu he kandai Mose tọn lẹ yin hihia, nukunmẹṣinyọnnu de nọ ṣinyọ́n ahun yetọn lẹ ji. 16  Ṣigba, to whenue yè lẹhlan Jehovah dè, nukunmẹṣinyọnnu lọ nọ yin didesẹ. 17  Todin, Jehovah wẹ Gbigbọ lọ; podọ fie gbigbọ Jehovah tọn te, mẹdekannujẹ nọ tin to finẹ. 18  Podọ mímẹpo, to whenue nukunmẹ mítọn he ma tindo nukunmẹṣinyọnnu do gigo Jehovah tọn hia taidi mẹpọnnu lẹ, mí nọ yin adadiọna nado yin apajlẹ dopolọ sọn gigo mẹ jẹ gigo mẹ, yèdọ pẹpẹ dile Jehovah, Gbigbọ lọ nọ basi do.

Nudọnamẹ Odò Tọn

2Kọ 3:14 Na nudọnamẹ gigọ́ gando hodidọ ehelẹ “Alẹnu Hoho” po “Alẹnu Yọyọ” po go, pọ́n Nudọnamẹ Dogọ 10.