Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Kọlintinu lẹ 13:1-14

13  Whla atọ̀ntọ die he yẹn ja mì dè. “To onù kunnudetọ awe kavi atọ̀n tọn mẹ wẹ whẹho lẹpo dona yin hinhẹn lodo te.”  Yẹn ko dọ wayi podọ taidi dọ yẹn tin to mì dè whla awetọ wẹ nkọ, ṣogan dile yẹn ma tin to finẹ todin, yẹn to didọ jẹnukọn hlan mẹhe ko waylando dai lẹ podọ hlan mẹhe pò lẹpo dọ eyin yẹn lẹkọwa gbede, yẹn ma na hlá mẹde dote,  to whenuena e yindọ mìwlẹ to kunnudenu he na dohia dọ Klisti wẹ to hodọ gbọn yẹn gblamẹ dín, yèdọ Klisti mẹhe ma yin madogánnọ dohlan mì ṣigba yin huhlọnnọ to ṣẹnṣẹn mìtọn.  Na taun tọn, nugbo wẹ dọ ewọ yin whiwhè do núgo na madogán wutu, ṣigba e to ogbẹ̀ na huhlọn Jiwheyẹwhe tọn wutu. Na nugbo tọn, humọ, míwlẹ yin madogánnọ hẹ ẹ, ṣigba mí nasọ nọgbẹ̀ dopọ hẹ ẹ na huhlọn Jiwheyẹwhe tọn he to mì ji wutu.  Mì nọ tẹ́n mìde pọ́n eyin mì to yise mẹ, mì nọ dindona mìde nado yọ́n mẹhe nkọ mìwlẹ yin. Kavi be mì ma yọnẹn dọ Jesu Klisti tin to kọndopọ mẹ hẹ mì wẹ ya? Eyin e ma yinmọ be mìwlẹ ma yin alọkẹyi.  Na nugbo tọn, todido ṣie wẹ yindọ mìwlẹ na wá yọnẹn dọ míwlẹ ma yin mẹhe yè ma kẹalọyi gba.  Todin, odẹ̀ mítọn hlan Jiwheyẹwhe wẹ yindọ mìwlẹ ni ma wà nuhe ylan depope blo, e ma yindọ míwlẹ lọsu nido sọgan sọawuhia nado yin alọkẹyi wẹ gba, ṣigba dọ mìwlẹ nido sọgan to nuhe yin dagbe wà, dile míwlẹ lọsu tlẹ sọgan sọawuhia nado yin mẹhe yè ma kẹalọyi lẹ.  Na mí ma sọgan wà nudepope jẹagọdo nugbo lọ, adavo na nugbo lọ.  E họnwun dọ míwlẹ nọ jaya to whedepopenu he mí yin madogánnọ ṣigba bọ mìwlẹ yin huhlọnnọ; podọ odẹ̀ he hò mí te wẹ yindọ mìwlẹ ni to vọjlado basi. 10  Enẹ wẹ zọ́n bọ yẹn to onú ehelẹ kàn hlan mì dile yẹn ma tin to finẹ, na to whenue yẹn na wá, yẹn ma nado yinuwa to aliho sinsinyẹn mẹ sọgbe hẹ aṣẹ he Oklunọ na mi nado jlọ mì dote, bọ e ma yin nado zìn mì dai. 11  To popolẹpo mẹ, mẹmẹsunnu lẹ emi, mì zindonukọn nado nọ jaya, nado nọ basi vọjlado, nado nọ yin homẹmiọnna, nado nọ lẹn onú dopolọ, nado nọ nọ̀ jijọho mẹ; Jiwheyẹwhe owanyi tọn po jijọho tọn po nasọ nọhẹ mì. 12  Mì yí nùdonùgo wiwe do dọnudo ode awetọ. 13  Omẹ wiwe lẹpo yí nudọdomẹ yetọn hlan mì. 14  Nukundagbe majẹhẹ Oklunọ Jesu Klisti tọn po owanyi Jiwheyẹwhe tọn po gọna gbigbọ wiwe he mẹ mí to mahẹ tindo te ni tin hẹ mìmẹpo.

Nudọnamẹ Odò Tọn