Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

2 Kọlintinu lẹ 1:1-24

1  Paulu, apọsteli Klisti Jesu tọn de gbọn ojlo Jiwheyẹwhe tọn gblamẹ, podọ Timoti mẹmẹsunnu mítọn, to wekanhlan agun Jiwheyẹwhe tọn he to Kọlinti, gọna omẹ wiwe lẹpo he to Akaia pete:  Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn po Oklunọ Jesu Klisti po dè.  Donanọ wẹ Jiwheyẹwhe podọ Otọ́ Oklunọ mítọn Jesu Klisti tọn, Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn,  he nọ miọnhomẹna mí to nukunbibia mítọn lẹpo mẹ, na mí nido sọgan penugo nado miọnhomẹna mẹhe tin to whlepọn wunmẹ depope mẹ gbọn homẹmimiọn he Jiwheyẹwhe to yíyí do miọnhomẹna mílọsu lẹ dali.  Na kẹdẹdile yajiji mítọn na Klisti tọn wutu sù taun do, mọ wẹ homẹmimiọn he mí nọ mọyi gbọn Klisti gblamẹ lọsu sù do ga.  Todin, eyin mí tin to nukunbibia mẹ, na homẹmimiọn po whlẹngán mìtọn po wutu wẹ; kavi eyin mí to yinyin homẹmiọnna, na homẹmimiọn mìtọn wutu wẹ, ehe nọ yinuwa nado hẹn mì penugo nado doakọnna oyà dopolọ lẹ he mílọsu to jiji.  Podọ, mọdopolọ wẹ todido mítọn gando mì go ma whàngo, to yinyọnẹn mẹ dọ, kẹdẹdile mì yin mimátọ to yajiji lẹ mẹ do, mọdopolọ wẹ mì nasọ tindo mimá to homẹmimiọn lọ mẹ do ga.  Mẹmẹsunnu lẹ emi, na mí ma jlo dọ mìwlẹ ni to wunvi mẹ gando nukunbibia he wá mí ji to agbegbe Asia* tọn mẹ lẹ go, dọ mí nọ kọgbidinamẹ sinsinyẹn he zẹ̀ huhlọn mítọn go glọ, sọmọ bọ mí ma tlẹ yọnẹn dọ mí na gán.  Na nugbo tọn, mí mọ to mídelẹ mẹ dọ mí ko mọ whẹdida okú tọn yí. Ehe yinmọ na mí nido sọgan ze jidide mítọn, e ma yin do mídelẹ mẹ gba, ṣigba do Jiwheyẹwhe he nọ fọ́n oṣiọ lẹ lọ mẹ. 10  Ewọ ko whlẹn mí sọn onú daho mọnkọtọn taidi okú si bo nasọ whlẹn mí; podọ todido mítọn tin to ewọ mẹ dọ ewọ nasọ vọ́ whlẹn mí. 11  Mìlọsu ga sọgan gọalọ gbọn ovẹvivẹ mìtọn do ota mítọn mẹ dali, na opẹ́ lẹ nido sọgan yin nina gbọn mẹsusu dali do ota mítọn mẹ na nuhe yin nina mí gbọn homẹdagbe dali na odẹ̀ mẹsusu tọn wutu. 12  Na ehe mẹ wẹ mí to awagundo te, ehe go ayihadawhẹnamẹnu mítọn nọ dekunnu gando, dọ wiwe-yinyin po ahundoponọ-yinyin he Jiwheyẹwhe nọ namẹ po wẹ, e ma yin nuyọnẹn gbẹtọ tọn ṣigba nukundagbe majẹhẹ Jiwheyẹwhe tọn wẹ mí ko yí do yinuwa to aihọn lọ mẹ, ṣigba na taun tọn, hlan mì. 13  Na nugbo tọn, mí ma to nudevo lẹ kàn hlan mì adavo nuhe ko họnwun ganji na mì lẹ kavi nuhe mì ko sọ yọnẹn lẹ; podọ ehe yẹn tindo todido dọ mì na to yinyọnẹn zọnmii kakajẹ opodo, 14  kẹdẹdile mẹdelẹ to mì mẹ ko yọnẹn do ga, dọ míwlẹ yin whẹwhinwhẹ́n de na mì nado doawagun, kẹdẹdile mìlọsu na yin na mí to azán Oklunọ mítọn Jesu tọn gbè do. 15  Enẹwutu, po jidide ehe po, yẹn to linlẹn dai nado wá mì dè, na mì nido sọgan tindo whẹwhinwhẹ́n awetọ nado jaya, 16  podọ to whenue yẹn na ko zẹ̀ mì dè dile yẹn jei Makedonia, podọ to whenue yẹn na lẹkọ sọn Makedonia wá mì dè bọ mìwlẹ na ko yìn mi vude jẹ aliho ji to whenue yẹn jei Jude. 17  Todin, to whenue yẹn tindo linlẹn mọnkọtọn, yẹn ma yinuwa po vọdonanu depope po, kavi yẹn wàmọ wẹ? Kavi nuhe yẹn lẹn lẹ, be yẹn lẹn yé sọgbe hẹ agbasalan wẹ, dọ to yẹn dè “Mọwẹ,” nido yin “Mọwẹ” podọ “Lala,” ni yin “Lala”? 18  Ṣigba, dile Jiwheyẹwhe sọgan yin jidedego do, ohó he mí dọna mì ma yin Mọwẹ podọ to enẹgodo Lala gba. 19  Na Visunnu Jiwheyẹwhe tọn, Klisti Jesu, mẹhe go yẹn po Silvanu* po gọna Timoti dọyẹwheho gando to ṣẹnṣẹn mìtọn, ma lẹzun Mọwẹ podọ to enẹgodo Lala gba, ṣigba Mọwẹ ko lẹzun Mọwẹ to whẹho etọn mẹ. 20  Na mahopọnna lehe opagbe Jiwheyẹwhe tọn lẹ sù sọ, yé ko lẹzun Mọwẹ gbọn ewọ gblamẹ. Enẹwutu, gbọn ewọ gblamẹ ga wẹ “Niṣẹ”* nọ yin didọ hlan Jiwheyẹwhe te na gigo gbọn míwlẹ gblamẹ. 21  Ṣigba, ewọ he nọ hẹnmẹ deji dọ mìwlẹ po míwlẹ po yin Klisti tọn podọ ewọ he ko yiamisisadode mí wẹ Jiwheyẹwhe. 22  E ko sọ yí hiadonu etọn do mí go bo ko na mí ohia nuhe na wá jọ lẹ tọn, enẹ wẹ, gbigbọ lọ, to ahun mítọn lẹ mẹ. 23  Todin, yẹn ylọ Jiwheyẹwhe nado dekunnu sọta alindọn ṣie dọ nado whlá mì sọn awubla yinukọn dogọ mẹ wutu wẹ yẹn ma ko wá Kọlinti kakajẹ din. 24  E ma yindọ mí duklunọ do yise mìtọn ji wẹ gba, ṣigba azọ́nwatọ hatọ mìtọn lẹ wẹ mí yin na ayajẹ mìtọn, na gbọn yise mìtọn dali wẹ mì do to ote.

Nudọnamẹ Odò Tọn

2Kọ 1:8* Pọ́n Ow 2:9, nudọnamẹ odò tọn.
2Kọ 1:19* Kavi, “Sila.”
2Kọ 1:20* Pọ́n Lo 1:25, nudọnamẹ odò tọn.