Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Timoti 6:1-21

6  Gbọ afanumẹ he to zẹgẹ de glọ lẹpo ni nọ pọ́n klunọ yetọn lẹ hlan di mẹhe jẹna gbégbò mlẹnmlẹn, na oyín Jiwheyẹwhe tọn po nuplọnmẹ lọ po ma nado yin ohó ylankan dọ do e go gbede.  Humọ, gbọ mẹhe tindo klunọ he yin yisenọ lẹ ni ma nọ yí nukunpẹvi do pọ́n yé na yé yin mẹmẹsunnu lẹ wutu blo. Kakatimọ, gbọ yé ni tlẹ nọ yí ojlo vẹkuvẹku do sẹ̀n, na mẹhe yé to devizọn dagbe wà na lẹ yin yisenọ lẹ po mẹyiwanna lẹ po wutu. Nọ to onú ehelẹ plọnmẹ bo nọ to tudohomẹnamẹ ehelẹ namẹ.  Eyin omẹ depope nọ plọnmẹ nuplọnmẹ devo bo ma kọngbedopọ hẹ ohó he pegan lẹ, yèdọ dehe yin Oklunọ mítọn Jesu Klisti tọn, kavi dehe yin nuplọnmẹ he sọgbe hẹ mẹdezejo na Jiwheyẹwhe,  ewọ ko gbọn kikla dali yigo bo ma mọnukunnujẹ nudepope mẹ, ṣigba to apọ̀nmẹzọ̀n jẹ gando kanbiọ lẹ po nudindọn dogbọn hogbe lẹ dali po go. Onú enẹlẹ mẹ wẹ onú ehelẹ nọ wá sọn, yèdọ nuvẹun, avùn, mẹzunzun, nuvẹdomẹ ylankan,  nudindọn sinsinyẹn lẹ gando numadinu lẹ go sọn mẹhe ko gblezọn to ayiha mẹ bo ko gbọagba nugbo lọ tọn lẹ dè, he nọ to linlẹn dọ mẹdezejo na Jiwheyẹwhe nọ hẹn ale mẹdetiti tọn wá.  Nugbo wẹ dọ e nọ hẹn ale daho wá, eyin mẹdezejo na Jiwheyẹwhe ehe yin tintindo to pọmẹ po pekọ po.  Na mí ma hẹn nudepope wá aihọn mẹ, mọjanwẹ mí ma sọgan sọ ze nudepope tọ́nyi do niyẹn.  Enẹwutu, eyin mí tindo núdùdù, avọ̀ po adọtẹn po, onú ehelẹ na pekọna mí.  Ṣigba, mẹhe magbe nado yin adọkunnọ lẹ jai jẹ whlepọn po omọ̀ po gọna ojlo gúgú tọn po ojlo ylankan susu po mẹ, ehe nọ tlọ omẹ do vasudo po dindọn po mẹ. 10  Na wanyina akuẹ wẹ yin adọ̀ onú ylankan wunmẹ lẹpo tọn, podọ gbọn afọdidona owanyi ehe dali, mẹdelẹ ko yin hinhẹn buali sọn yise lọ mẹ bo ko yí awufiẹsa susu do sọwhán yede gbọn filẹpo. 11  Ṣigba, hiẹ omẹ Jiwheyẹwhe tọn E, nọ họ̀nna onú ehe lẹpo. Nọ doafọna dodowiwa, mẹdezejo na Jiwheyẹwhe, yise, owanyi, akọndonanu po walọmimiọn po. 12  Nọ hoavùn dagbe yise tọn, tẹdo ogbẹ̀ madopodo lọ go gligli, ehe hiẹ yin yiylọ na podọ ehe hiẹ ko basi gbeyiyi gbangba tọn etọn to kunnudetọ susu nukọn. 13  To Jiwheyẹwhe nukọn, mẹhe nọ hẹn onú lẹpo do ogbẹ̀, podọ to Klisti Jesu nukọn, mẹhe taidi kunnudetọ de ko dekunnu dagbe to gbangba to Pọntiu Pilati nukọn, yẹn degbena we 14  dọ hiẹ ni payi gbedide lọ go to aliho mado mọdọ podọ matin ovlẹ tọn de mẹ kakajẹ awusọhia Oklunọ mítọn Jesu Klisti tọn whenu. 15  Omẹ ayajẹnọ podọ Huhlọnnọ dopo kẹdẹ lọ na hẹn ede sọawuhia to ojlẹ dide etọn titi mẹ, yèdọ ewọ he yin Ahọlu mẹhe to gandu taidi ahọlu lẹ tọn podọ Oklunọ mẹhe to gandu taidi oklunọ lẹ tọn, 16  omẹ lọ he ewọ kẹdẹ wẹ tindo jọmaku, mẹhe nọ nọ̀ hinhọ́n he ma yọ́n dọnsẹpọ mẹ, mẹhe gbẹtọ depope ma ko mọ pọ́n kavi ma sọgan mọ. Gbégbò po hlọnhlọn madopodo po ni tin hlan ewọ. Niṣẹ.* 17  Gbẹnuna mẹhe yin adọkunnọ to titonu ehe mẹ lẹ ma nado nọ yigo, podọ ma nado ze todido yetọn sinai do adọkun he ma tindo jidide lẹ ji, ṣigba do Jiwheyẹwhe, mẹhe nọ na mí onú lẹpo susugege na mí nido duvivi etọn lọ ji; 18  nado nọ wà dagbe, nado nọ sudeji to azọ́n dagbe lẹ mẹ, nado yin alọtlútọ, bo wleawu nado mánamẹ, 19  bosọ nọ bẹ adọkunnu whlá na yede, yèdọ dodonu dagbe de he ji yé na dó do to sọgodo, na yé nido sọgan tẹdo ogbẹ̀ nujọnu tọn lọ go gligli. 20  Timoti E, basi hihọ́na nuhe yin zizedo alọmẹ na we lọ, bo nọ dapana ohó ovọ́ lẹ he nọ kọnmasin do onú wiwe go podọ na ohó agọjẹdomẹ tọn he yè nọ yí lalo do ylọdọ “oyọnẹn” lẹ. 21  Na gbọn oyọnẹn mọnkọtọn lẹ jijlá dali, mẹdelẹ ko jo yise lọ do. Na nukundagbe majẹhẹ ni tin hẹ mì.

Nudọnamẹ Odò Tọn

1Ti  6:16* Pọ́n Lo 1:25, nudọnamẹ odò tọn.