Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Timoti 5:1-25

5  A gbẹnuna sunnu mẹhomẹ de sinsinyẹn blo. Kakatimọ, nọ vẹ̀ ẹ taidi otọ́ de, sunnu jọja lẹ taidi nọvisunnu,  yọnnu mẹhomẹ lẹ taidi onọ̀, yọnnu jọja lẹ taidi nọviyọnnu to walọ wiwe lẹpo mẹ.  Nọ gbògbéna asuṣiọsi he yin asuṣiọsi nugbonugbo lẹ.  Ṣigba, eyin asuṣiọsi de tindo ovi lẹ kavi ovivi lẹ, gbọ ehelẹ ni plọn nado nọ do mẹdezejo na Jiwheyẹwhe hia to whédo yetọn titi lẹ mẹ whẹ́ podọ nado nọ sú dagbe họ́ mẹjitọ yetọn lẹ po mẹjitọ daho yetọn lẹ po, na ehe wẹ yin alọkẹyi to nukun Jiwheyẹwhe tọn mẹ.  Todin, yọnnu he yin asuṣiọsi nugbonugbo bo yin jijodo taidi agbátọnọ ko ze todido etọn do Jiwheyẹwhe mẹ bosọ gbọṣi ovẹvivẹ po odẹ̀ po mẹ to ozán po okle po.  Ṣigba, ewọ he pò na gbẹdudu ko yin oṣiọ dile etlẹ yindọ ewọ pò to ogbẹ̀.  Enẹwutu, nọ to tudohomẹnamẹ ehelẹ na yé, na yé nido sọgan tin matin ovlẹ.  Na nugbo tọn, eyin mẹdepope ma wleawudaina mẹhe yin etọn titi lẹ, podọ titengbe na mẹhe yin hagbẹ whédo etọn tọn lẹ, ewọ ko mọ́n yise lọ bosọ ylanhu mayisenọ.  Gbọ asuṣiọsi de ni yin zizedo todohukanji lọ mẹ eyin ewọ ko tindo e whè gbau owhe kandeko, bo yin asi sunnu dopo tọn, 10  he yè dekunnu gando azọ́n dagbe etọn lẹ go, eyin ewọ ko pọ́n ovi lẹ go whẹ́n, eyin ewọ ko nọ yí jonọ lẹ, eyin ewọ ko nọ klọ́ afọ na omẹ wiwe lẹ, eyin ewọ ko nọ hẹn kọgbọ wá na mẹhe tin to nukunbibia mẹ lẹ, eyin ewọ ko nọ yí sọwhiwhe do wà azọ́n dagbe lẹpo. 11  Humọ, a yí asuṣiọsi he gbẹ́ pò to jọja mẹ lẹ do e mẹ blo, na eyin ojlo zanhẹmẹ tọn yetọn wá lẹzun aliglọnnamẹnu de na haṣinṣan yetọn hẹ Klisti, yé na jlo nado wlealọ, 12  bo na yin whẹgbledo na yé ko yí nukunpẹvi do pọ́n dohia yise yetọn tintan tọn wutu. 13  Mọdopolọ, yé ko sọ plọn nado nọ hẹn alọnu yetọn vò, bo nọ to dindanpe gbọn owhé lẹ gbè; mọwẹ, e ma yindọ yé hẹn alọnu yetọn vò kẹdẹ wẹ gba, ṣigba yé sọ yin mẹnudọtọ lẹ bo nọ dádo whẹho mẹdevo lẹ tọn mẹ, bosọ nọ to ohó he yé ma dona dọ lẹ dọ. 14  Enẹwutu, yẹn jlo dọ asuṣiọsi he gbẹ́ pò to jọja mẹ lẹ ni wlealọ, bo ji ovi lẹ, nado penukundo whédo de go, ma nado na dotẹnmẹ depope nukundiọsọmẹtọ nado vlẹ mí. 15  Na nugbo tọn, mẹdelẹ tlẹ ko lẹkọ nado hodo Satani. 16  Eyin yọnnu yisenọ depope tindo asuṣiọsi lẹ, gbọ ewọ ni gọalọna yé, bo gbọ agbàn lọ ni ma tin to agun lọ ji blo. To whenẹnu, agun lọ sọgan gọalọna mẹhe yin asuṣiọsi nugbonugbo lẹ. 17  Gbọ sunnu mẹho he nọ penukundonugo to aliho dagbe mẹ lẹ ni yin pinpọn nado jẹna gbégbò whla awe, titengbe yé mẹhe nọ wazọ́n sinsinyẹn to hodidọ po mẹpinplọn po mẹ lẹ. 18  Na adà Owe-wiwe tọn de dọmọ: “Hiẹ ma dona doajànuna oyìnsú de to whenue e to likun tùn”; mọdopolọ: “Azọ́nwatọ jẹna azọ́nkuẹ etọn.” 19  A kẹalọyi whẹsadokọnamẹ de sọta sunnu mẹho de blo, adavo kunnudide lọ yin kunnudetọ awe kavi atọ̀n tọn. 20  Nọ wọhẹ mẹhe hẹn ylando zun aṣa lẹ to gbẹtọ lẹpo nukọn, na mẹhe pò lẹ nido sọgan dibu ga. 21  Yẹn degbena we vivẹvivẹ to Jiwheyẹwhe podọ Klisti Jesu podọ angẹli dide lẹ nukọn ma nado nọ dawhẹ aplà gando onú ehelẹ go, ma nado yí gbigbọ mẹnukuntahihopọn tọn do wà nudepope. 22  A yawu nado ze alọ towe do sunnu depope ji gbede blo; mọdopolọ a yin mimátọ to ylando mẹdevo lẹ tọn mẹ blo; hẹn dewe do wiweji. 23  A sọ nù osin ba blo, ṣigba nọ yí ovẹn vude zan na homẹ towe tọn wutu podọ na azọ̀n whẹwhẹ towe tọn wutu. 24  Ylando mẹdelẹ tọn nọ sọawuhia to gbangba, bo nọ dekọtọn do whẹdida mẹ tlọlọ, ṣigba na mẹdevo lẹ tọn, ylando yetọn nọ wá sọawuhia to godo mẹ. 25  Mọdopolọ ga, azọ́n dagbe lẹ nọ sọawuhia to gbangba podọ dehe ma wàmọ lẹ ma sọgan yin whiwhla.

Nudọnamẹ Odò Tọn