Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Pita 4:1-19

4  Enẹwutu, to whenuena e yindọ Klisti jiya to agbasalan mẹ, mìlọsu ga ni yí ninọmẹ apọ̀nmẹ tọn dopolọ do blagbajana mìde; na mẹhe ko jiya to agbasalan mẹ ko dealọ sọn ylando lẹ mẹ,  na ewọ nido sọgan zan gbẹwhenu etọn he pò to agbasalan mẹ, e ma yin na ojlo gbẹtọvi tọn lẹ ba, ṣigba na ojlo Jiwheyẹwhe tọn.  Na ojlẹ he juwayi ko pé na mì nado ko wazọ́n ojlo akọta lẹ tọn to whenuena mì to zọnlinzin to azọ́n wantuntun tọn lẹ, ojlo ylankan lẹ, ovẹn nùnù zẹjlẹgo, paṣadudu, ahàn-gbẹdido, po boṣiọ-sinsẹ̀n he ylan lẹ po mẹ.  Na mì ma gbẹ́ pò to wezundo hẹ yé to aliho ehe ji jei abàbá walọ gblezọn tọn dopolọ mẹ, e nọ paṣa yé bọ yé nọ to mì zùn mapote.  Ṣigba omẹ ehelẹ na dogbè na omẹ lọ he ko wleawu nado dawhẹna mẹhe to ogbẹ̀ po mẹhe ko kú lẹ po.  Na nugbo tọn, na lẹndai ehe wutu wẹ wẹndagbe lọ yin lilá hlan oṣiọ lẹ ga, na yé nido yin whẹdana sọgbe hẹ agbasalan sọn pọndohlan gbẹtọvi lẹ tọn mẹ ṣigba na yé nido nọgbẹ̀ sọgbe hẹ gbigbọ sọn pọndohlan Jiwheyẹwhe tọn mẹ.  Ṣigba opodo onú lẹpo tọn ko sẹpọ. Enẹwutu, mì yin wùnzanọ, bo nọ to aṣeji nado nọ hodẹ̀.  Hú popolẹpo, mì tindo owanyi sisosiso na ode awetọ, na owanyi nọ ṣinyọnnudo ylando susugege.  Mì nọ hẹjó ode awetọ matin hùnhlún. 10  Kẹdẹdile omẹ dopodopo ko mọ nunina de yí do, mì nọ yí i zan to lizọnyina ode awetọ mẹ taidi họ̀nkọnsi dagbe nukundagbe majẹhẹ Jiwheyẹwhe tọn he yin didohia to aliho voovo mẹ tọn lẹ. 11  Eyin mẹde to hodọ, gbọ e ni nọ dọho taidi dọ nulila wiwe Jiwheyẹwhe tọn lẹ wẹ; eyin mẹde to lizọnyi, gbọ e ni nọ yilizọn taidi mẹhe ganjẹ huhlọn he Jiwheyẹwhe nọ namẹ go; na Jiwheyẹwhe nido yin gigopana to onú lẹpo mẹ gbọn Jesu Klisti gblamẹ. Ewọ tọn wẹ gigo po hlọnhlọn po kakadoi podọ doidoi. Niṣẹ.* 12  Mẹyiwanna lẹ emi, mì dike miyọ́n he to jiji to ṣẹnṣẹn mìtọn, ehe to jijọ do mì go nado whlé mì pọ́n paṣa mì taidi dọ onú yọyọ de wẹ to jijọ do mì go blo. 13  Kakatimọ, mì nọ jaya to whepoponu to whenuena e yindọ mì yin mimátọ to yajiji Klisti tọn lẹ mẹ, na mì nido jaya bosọ gọ́ na ayajẹ susu to osọhia gigo etọn tọn whenu. 14  Eyin yè to mì vlẹko na oyín Klisti tọn wutu, ayajẹnọ wẹ mì, na gbigbọ gigo tọn, yèdọ gbigbọ Jiwheyẹwhe tọn, tin to mì ji. 15  Ṣigba, mì dike depope to mì mẹ jiya taidi hlọnhutọ kavi ajotọ kavi ylanwatọ kavi taidi mẹhe nọ dádo whẹho mẹdevo lẹ tọn mẹ blo. 16  Etomọṣo, eyin ewọ jiya taidi Klistiani de, gbọ winyan ni ma hù i blo, ṣigba gbọ e ni zindonukọn nado nọ pagigona Jiwheyẹwhe to oyín ehe mẹ. 17  Na ojlẹ dide lọ die na whẹdida nido bẹjẹeji sọn owhé Jiwheyẹwhe tọn gbè. Todin eyin e bẹjẹeji sọn míwlẹ ji whẹ́, etẹwẹ na yin opodo mẹhe ma setonuna wẹndagbe Jiwheyẹwhe tọn lẹ tọn? 18  “Podọ eyin po huhlọn po wẹ dodonọ to yinyin whinwhlẹngán, fie wẹ gbẹtọ jijọ-madi-Jiwheyẹwhe tọn po ylandonọ po na te?” 19  Enẹwutu, to whelọnu lo, mì gbọ mẹhe to yaji sọgbe hẹ ojlo Jiwheyẹwhe tọn lẹ ni zindonukọn ga nado nọ ze alindọn yetọn lẹ do alọmẹ na Mẹdatọ nugbonọ dile yé to dagbe wà.

Nudọnamẹ Odò Tọn

1Pi 4:11* Pọ́n Lo 1:25, nudọnamẹ odò tọn.