Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Pita 3:1-22

3  Mọkẹdẹ wẹ, mì asi lẹ ni nọ yin mẹmẹglọ hlan asu mìtọn titi lẹ, gbọnmọ dali, eyin mẹde ma setonuna ohó lọ, yé sọgan yin dindọn gbọn walọyizan asi yetọn lẹ tọn dali matin ohó depope didọ,  na yé yí nukun do mọ walọ wiwe mìtọn to pọmẹ po sisi sisosiso po wutu.  Podọ mì dike aṣọ́dido mìtọn yin aṣọ́ gbonu tọn blo, yèdọ oda biblá po aṣọ́donu sika tọn lẹ zize dogo po tọn kavi awugbó lẹ didó tọn blo,  ṣigba mì dike e ni yin omẹ whiwhla ahun mẹ tọn to nusisọ́ he ma nọ gble he yin gbigbọ abọẹninọ po walọmimiọn tọn po mẹ, ehe yin nuhọakuẹ taun to nukun Jiwheyẹwhe tọn mẹ.  Na mọ wẹ yọnnu wiwe hohowhenu tọn he tindo todido to Jiwheyẹwhe mẹ lẹ nọ doaṣọ́na yedelẹ do ga, bo nọ yin mẹmẹglọ na asu yetọn titi lẹ,  dile Sala setonuna Ablaham do bo nọ ylọ ẹ dọ “oklunọ.” Podọ mì ko lẹzun ovi etọn lẹ, eyin mì zindonukọn nado nọ wà dagbe bo ma dibuna nuhe nọ dobunamẹ depope.  Mọdopolọ, mì asu lẹ emi, mì zindonukọn nado nọ yí oyọnẹn do nọhẹ yé, bo nọ na yé gbégbò di hlan núzinzan madogánnọ de, yèdọ yọnnu, to whenuena e yindọ mì yin gudutọ nukundagbe majẹhẹ ogbẹ̀ tọn hẹ yé ga, na odẹ̀ mìtọn lẹ ma nado yin aliglọnna.  To popolẹpo mẹ, mìmẹpo ni nọ tindo linlẹn dopolọ, mì nọ do mẹtọnhopọn hia, mì nọ tindo owanyi mẹmẹsunnu tọn, po awuvẹmẹ sisosiso po, bo yin whiwhẹnọ,  mì nọ yí oylan do sú oylan họ́ blo kavi mẹvivlẹ do sú mẹvivlẹ blo, ṣigba, kakatimọ, mì nọ dona omẹ, na aliho ehe ji wẹ mì yin yiylọ do, na mì nido sọgan dugu dona tọn. 10  Na, “ewọ he jlo na yiwanna ogbẹ̀ bo mọ azán dagbe lẹ, gbọ e ni de odẹ́ etọn sọn nuhe yin oylan mẹ podọ nùflo etọn lẹ sọn oklọ didọ mẹ, 11  ṣigba gbọ e ni gbẹ́ nuhe yin oylan dai bo wà nuhe yin dagbe; gbọ e ni nọ dín jijọho bosọ nọ doafọna ẹn. 12  Na nukun Jehovah tọn lẹ tin to dodonọ lẹ ji, podọ otó etọn lẹ hùn hlan ovẹ̀ yetọn; ṣigba nukunmẹ Jehovah tọn jẹagọdo mẹhe to onú ylankan wà lẹ.” 13  Na nugbo tọn, mẹnu wẹ omẹ lọ he na waylan do mì eyin mì lẹzun zohunhunnọ na nuhe yin dagbe? 14  Ṣigba eyin etlẹ biọ dọ mì ni jiya na dodowiwa wutu, ayajẹnọ wẹ mì. Etomọṣo, mì dibuna nuhe nọ dobuna yé blo, podọ mì sọ biọ bẹwlu mẹ blo. 15  Ṣigba mì klan Klisti do wiwe taidi Oklunọ to ahun mìtọn lẹ mẹ, bo nọ wleawu to whepoponu nado yiavunlọ to mẹlẹpo nukọn he to nukanbiọ mì gando whẹwhinwhẹ́n todido he tin to mì mẹ lọ tọn go, ṣigba mì nọ wàmọ to walọmimiọn po sisi sisosiso po mẹ. 16  Mì hẹn ayihadawhẹnamẹnu dagbe de go, dọ, to onú lọ taun he mẹ yè to hodọ jẹagọdo mì te mẹ, winyan nido hù yé he to ohó mẹhẹngble tọn dọ gando walọ dagbe mìtọn taidi hodotọ Klisti tọn go lẹ. 17  Na e pọnte, eyin ojlo Jiwheyẹwhe tọn wẹ e yin, dọ mì ni jiya na dagbe wiwà hú na ylanwiwa. 18  Yèdọ, Klisti tlẹ kú whladopo kẹdẹ na ylando lẹ, omẹ dodonọ de na mawadodonọ lẹ, na e nido sọgan deanana mì yì Jiwheyẹwhe dè, ewọ yin hùhù to agbasalan mẹ, ṣigba yin hinhẹnwa ogbẹ̀ to gbigbọ mẹ. 19  To ninọmẹ ehe mẹ ga, e yì bo dọyẹwheho na gbigbọ he to gànpamẹ lẹ, 20  he ko vẹtoli dai to whenuena homẹfa Jiwheyẹwhe tọn to ote to azán Noa tọn lẹ gbè, dile aki lọ to yinyin gbigbá, to ehe mẹ omẹ vude, enẹ wẹ, alindọn ṣinatọ̀n, yin hinhẹn luntọ́n awuyẹyẹ-afọyẹyẹ gbọn osin lọ gblamẹ. 21  Nuhe sọzẹn hẹ ehe sọ to mì whlẹngán todin ga, enẹ wẹ, baptẹm, (e ma yin dihó agbasalan tọn didesẹ gba, ṣigba obiọ he yin bibasi hlan Jiwheyẹwhe nado tindo ayihadawhẹnamẹnu dagbe de,) gbọn fọnsọnku Jesu Klisti tọn gblamẹ. 22  Ewọ tin to adusilọ Jiwheyẹwhe tọn mẹ, na e ko yì olọn mẹ; podọ angẹli lẹ, aṣẹpipa lẹ po huhlọn lẹ po ko yin hinhẹn yin mẹmẹglọ hlan ẹn.

Nudọnamẹ Odò Tọn