Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Pita 1:1-25

1  Pita, apọsteli Jesu Klisti tọn, hlan gbéjinọtọ ojlẹ gli tọn he gbàpe gbọn Pọntu, Galatia, Kapadokia, Asia, po Bitinia po lẹ, hlan mẹhe yin dide lẹ  sọgbe hẹ oyọnẹn jẹnukọn Jiwheyẹwhe Otọ́ tọn, po klandowiwe gbọn gbigbọ dali po, na yé nido setonu bo yin kiklọwé po ohùn Jesu Klisti tọn po: Na nukundagbe majẹhẹ po jijọho po ni yin hinhẹn sudeji hlan mì.  Donanọ wẹ Jiwheyẹwhe podọ Otọ́ Oklunọ mítọn Jesu Klisti tọn, na to gbesisọ mẹ hẹ lẹblanu daho etọn e vọ́ mí ji yọyọ hlan todido he to ogbẹ̀ gbọn fọnsọnku Jesu Klisti tọn sọn oṣiọ lẹ mẹ dali,  hlan ogú he ma sọgan gble bo ma nọ flu bo masọ nọ kupẹ́ de. E yin whiwhla do olọn mẹ na mì,  mẹhe huhlọn Jiwheyẹwhe tọn to hihọ́-basina gbọn yise dali na whlẹngán he whenu etọn ko sọ̀ nado yin didehia to ojlẹ godo tọn mẹ.  To nugbo ehe mẹ wẹ mìwlẹ to ayajẹ te tlala, dile etlẹ yindọ na ojlẹ kleun de todin, eyin e biọ domọ, mì ko yin hinhẹn blawu gbọn whlepọn voovo lẹ dali,  na nuhọakuẹ-yinyin yise mìtọn tọn he yin whiwhlepọn, he họakuẹ tlala hú sika he nọ gble mahopọnna dọ e nọ yin whiwhlepọn gbọn miyọ́n dali, nido sọgan yin mimọ taidi dodonu de na pipà, gigo, po gbégbò po to osọhia Jesu Klisti tọn whenu.  Dile etlẹ yindọ mì ma mọ ẹn pọ́n, mì yiwanna ẹn. Dile etlẹ yindọ mì ma to mimọ ẹn to alọnu din, ṣogan mì do yise hia to ewọ mẹ bosọ to homẹhun tlala po ayajẹ mayọnjlẹ he tindo gigo po,  dile mì to opodo yise mìtọn tọn mọyi, yèdọ whlẹngán alindọn mìtọn lẹ tọn. 10  Gando whlẹngán ehe lọ taun go wẹ dogbapọnnanu sisosiso po dodinnanu sọwhiwhe tọn po ko yin bibasi gbọn yẹwhegán lẹ dali, mẹhe dọ dọdai gando nukundagbe majẹhẹ he ko yin awú etọn wle na mì go. 11  Yé zindonukọn nado dindona ojlẹ lọ taun kavi ojlẹ he nkọtọn gbigbọ he to yé mẹ lọ to alọdlẹndo gando Klisti go to whenuena e to kunnude jẹnukọn dogbọn oyà he Klisti na ji lẹ dali podọ dogbọn gigo he na bọdo ehelẹ go lẹ dali. 12  E yin didehia yé dọ, yé ma to lizọnyina yedetiti gba. Kakatimọ, yé to awuwlena onú lọ lẹ he ko yin lilá hlan mì todin gbọn yé mẹhe ko lá wẹndagbe hlan mì lẹ po gbigbọ wiwe he yin didohlan sọn olọn mẹ po dali. Onú ehelẹ taun mẹ wẹ angẹli lẹ to jijlo nado zín nukun do. 13  Enẹwutu, mì wleawuna ayiha mìtọn lẹ na nuwiwa, mì gbọṣi lẹnpọn dagbenọ-yinyin mẹ mlẹnmlẹn; mì ze todido mìtọn do nukundagbe majẹhẹ he na yin hinhẹnwa na mì to osọhia Jesu Klisti tọn whenu ji. 14  Taidi ovi tonusetọ lẹ, mì sọ yinuwa sọgbe hẹ ojlo he mì tindo dai lẹ to wunvi mìtọn mẹ ba blo, 15  ṣigba, to kọndopọ mẹ hẹ Omẹ Wiwe lọ he ylọ mì, mìlọsu ga ni lẹzun wiwe to walọyizan mìtọn lẹpo mẹ, 16  na e yin winwlan dọmọ: “Mì dona yin wiwe, na wiwe wẹ yẹn.” 17  Humọ, eyin mì to awhádo ylọ Otọ́ he nọ dawhẹ sọgbe hẹ azọ́n mẹdopodopo tọn matin mẹnukuntahihopọn, mìwlẹ lọsu ni nọ yinuwa po budisi po to ojlẹ jonọ-gbéji ninọ tọn mìtọn whenu. 18  Na mì yọnẹn dọ e ma yin onú he sọgan gble lẹ, di fataka kavi sika, wẹ yè yí do whlẹn mì sọn walọyizan mado sinsẹ́n mìtọn he mì mọyi gbọn aṣa dali sọn tọgbo mìtọn lẹ dè mẹ gba. 19  Ṣigba po ohùn họakuẹ de po wẹ, taidi lẹngbọvu madoblọ podọ madodiho de tọn, yèdọ Klisti tọn. 20  Nugbo, ewọ ko yin yinyọnẹn jẹnukọn whẹpo aihọn do yin didoai, ṣigba e yin hinhẹn sọawuhia to opodo ojlẹ lẹ tọn na mìwlẹ tọn wutu 21  mì mẹhe gbọn ewọ dali yin yisenọ to Jiwheyẹwhe mẹ, yèdọ mẹhe fọ́n ẹn sọn oṣiọ lẹ mẹ bo na ẹn gigo; na yise po todido mìtọn po nido tin to Jiwheyẹwhe mẹ. 22  Todin he mì ko lẹ̀ alindọn mìtọn lẹ wé gbọn tonusise mìtọn na nugbo lọ dali ehe dekọtọn do owanyi mẹmẹsunnu tọn matin yẹnuwiwa mẹ, mì yiwanna ode awetọ mìtọn sisosiso sọn ahun mẹ wá. 23  Na yè ko vọ́ mì ji yọyọ, e ma yin gbọn okún he sọgan gble dali, ṣigba gbọn ehe ma sọgan gble dali, gbọn ohó Jiwheyẹwhe ogbẹ̀nọ he tin kakadoi lọ tọn gblamẹ. 24  Na “agbasalan lẹpo taidi ogbé, podọ gigo etọn lẹpo taidi osẹ́ ogbé tọn; ogbé nọ yọ́, podọ vounvoun nọ ja kọnyinai, 25  ṣigba ohó he Jehovah dọ nọ nọte kakadoi.” Mọwẹ, “ohó” lọ die, ehe ko yin lilá hlan mì taidi wẹndagbe.

Nudọnamẹ Odò Tọn