Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Johanu 3:1-24

3  Mì pọ́n owanyi he nkọ Otọ́ lọ ko dohia mí, na mí nido yin yiylọdọ ovi Jiwheyẹwhe tọn lẹ; podọ nuhe mí yin lọ niyẹn. Enẹ wẹ zọ́n bọ aihọn lọ ma do yọ́n mí, na e ma ko wá yọ́n ewọ wutu.  Mẹyiwanna lẹ emi, ovi Jiwheyẹwhe tọn lẹ wẹ mí yin todin, ṣogan nuhe mí na wá yin ma ko yin didohia. Ṣigba mí yọnẹn dọ whedepopenu he ewọ na sọawuhia, mí na taidi ewọ, na mí na mọ ẹn kẹdẹdile e te do.  Podọ mẹdepope he tindo todido he sinai do ewọ ji ehe, nọ lẹ̀ ede wé kẹdẹdile ewọ wé-ṣeke do.  Mẹdepope he hẹn ylando zun aṣa sọ to sẹ́nhẹngba hẹn zun aṣa ga, enẹwutu ylando wẹ sẹ́nhẹngba yin.  Mìwlẹ yọnẹn ga dọ ewọ yin hinhẹn sọawuhia nado de ylando mìtọn lẹ sẹ̀, podọ ylando de ma tin to ewọ mẹ.  Mẹdepope he gbọṣi kọndopọ mẹ hẹ ẹ ma nọ hẹn ylando zun aṣa; mẹdepope he hẹn ylando zun aṣa ma ko mọ ẹn, mọjanwẹ e ma ko wá yọ́n ewọ do niyẹn.  Yọpọ lẹ emi, mì dike mẹdepope hẹn mì buali blo; mẹhe zindonukọn to dodowiwa mẹ yin dodonọ, kẹdẹdile ewọ yin dodonọ do.  Ewọ he zindonukọn to ylando mẹ wá sọn Lẹgba dè, na Lẹgba ko to ylando wà sọn whẹwhẹwhenu. Na lẹndai ehe wutu wẹ Visunnu Jiwheyẹwhe tọn ko yin hinhẹn sọawuhia, yèdọ, nado gbà azọ́n Lẹgba tọn lẹ.  Mẹdepope he yin jiji sọn Jiwheyẹwhe dè ma nọ zindonukọn to ylando mẹ, na okún Etọn nọ gbọṣi omẹ mọnkọtọn mẹ, podọ e ma sọgan hẹn ylando zun aṣa, na e ko yin jiji sọn Jiwheyẹwhe dè wutu. 10  Lehe ovi Jiwheyẹwhe tọn lẹ po ovi Lẹgba tọn lẹ po nọ yin didohia gbọn die: Mẹdepope he ma zindonukọn to dodowiwa mẹ ma wá sọn Jiwheyẹwhe dè, mọkẹdẹ wẹ e yin na mẹhe ma yiwanna mẹmẹsunnu etọn. 11  Na ehe wẹ owẹ̀n he mì ko sè sọn whẹwhẹwhenu, dọ mí dona yiwanna ode awetọ; 12  e ma yin taidi Kaini, mẹhe wá sọn mẹylankan lọ dè bo hù nọvisunnu etọn. Podọ etẹwutu wẹ e do hù i? Na azọ́n etọn lẹ yin ylankan wutu, ṣigba nọvisunnu etọn tọn lẹ yin dodo. 13  Mẹmẹsunnu lẹ emi, ni ma paṣa mì blo dọ aihọn gbẹwanna mì. 14  Mí yọnẹn dọ mí ko tọ́n sọn okú mẹ biọ ogbẹ̀ mẹ, na mí yiwanna mẹmẹsunnu lẹ wutu. Ewọ he ma tindo owanyi gbọṣi okú mẹ. 15  Hlọnhutọ de wẹ mẹdepope he gbẹwanna mẹmẹsunnu etọn, podọ mì yọnẹn dọ ogbẹ̀ madopodo ma nọ gbọṣi hlọnhutọ de mẹ gba. 16  Gbọn ehe dali wẹ míwlẹ ko wá yọ́n owanyi, na ewọ ko ze alindọn etọn jo na mítọn wutu; podọ míwlẹ tin to dandannu glọ nado ze alindọn mítọn lẹ jo na mẹmẹsunnu mítọn lẹ tọn wutu. 17  Ṣigba mẹdepope he tindo nutindo aihọn ehe tọn lẹ bo mọ mẹmẹsunnu etọn tin to nuhudo mẹ, ṣogan bo sú ohọ̀n awuvẹmẹ sisosiso etọn tọn do e, nawẹ owanyi Jiwheyẹwhe tọn gbọṣi ewọ mẹ gbọn lo? 18  Yọpọ lẹ emi, mì gbọ mí ni yiwannamẹ, e ma yin to ohó mẹ kavi po odẹ́ po gba, ṣigba to walọ po nugbo po mẹ. 19  Gbọn ehe dali wẹ mí na yọnẹn dọ mí wá sọn nugbo lọ mẹ, podọ mí na hẹn ahun mítọn deji to ewọ nukọn 20  to nudepope he mẹ ahun mítọn sọgan gblewhẹdo mí te mẹ, na Jiwheyẹwhe klohu ahun mítọn bosọ yọ́n onú lẹpo. 21  Mẹyiwanna lẹ emi, eyin ahun mítọn ma gblewhẹdo mí, mí tindo awuvivo hodidọ tọn hẹ Jiwheyẹwhe; 22  podọ nudepope he mí biọ mí nọ mọyi sọn ewọ dè, na mí nọ payi gbedide etọn lẹ go bo to nuhe sọgbe to nukun etọn mẹ lẹ wà wutu. 23  Na nugbo tọn, ehe wẹ gbedide etọn, dọ mí ni tindo yise to oyín Visunnu etọn Jesu Klisti tọn mẹ bo nọ yiwanna ode awetọ, kẹdẹdile e ko degbè etọn na mí do. 24  Humọ, ewọ he nọ payi gbedide etọn lẹ go nọ gbọṣi kọndopọ mẹ hẹ ẹ, podọ ewọ to kọndopọ mẹ hẹ omẹ mọnkọtọn; gbọn ehe dali wẹ mí nọ yọnẹn dọ ewọ gbọṣi kọndopọ mẹ hẹ mí, gbọn gbigbọ he e na mí gblamẹ.

Nudọnamẹ Odò Tọn