Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Tẹsalonikanu lẹ 5:1-28

5  Todin, mẹmẹsunnu lẹ emi, nuhudo depope ma tin nado kanwehlan mì gando ojlẹ lẹ po osaa lẹ po go.  Na mìlọsu lẹ yọnẹn hezeheze dọ azán Jehovah tọn ja kẹdẹdi ajotọ de to zánmẹ.  To whenue yé na to didọmọ: “Jijọho po hihọ́ po!” whenẹnu wẹ vasudo ajiji na wá yé ji to afọdopolọji kẹdẹdile awufiẹsa ajipanu tọn nọ wá yọnnu he to ohò de ji do; yé ma nasọ họ̀ngán to aliho depope mẹ.  Ṣigba, mì mẹmẹsunnu lẹ emi, mì ma tin to zinvlu mẹ, bọ azán enẹ nado wá mì ji dile e nọ yin do na ajotọ lẹ,  na mìmẹpo wẹ ovi hinhọ́n tọn lẹ podọ ovi okle tọn lẹ. Mí ma yin ozán tọn kavi zinvlu tọn gba.  Enẹwutu, to whelọnu lo, mì dike mí damlọn dile mẹhe pò lẹ nọ wà do blo, ṣigba mì gbọ mí ni nọ nukle bo gbọṣi lẹnpọn dagbenọ-yinyin mítọn mẹ.  Na mẹhe nọ damlọn lẹ nọ saba damlọn to zánmẹ, podọ mẹhe nọ nùahànmú lẹ nọ saba nùahànmú to zánmẹ.  Ṣigba, na mí mẹhe yin okle tọn lẹ, mì gbọ mí ni gbọṣi lẹnpọn dagbenọ-yinyin mítọn mẹ bo ze tùnudo yise po owanyi tọn po dó podọ todido whlẹngán tọn taidi ogangbakun de;  na Jiwheyẹwhe ma de mí na homẹgble gba, ṣigba nado mọ whlẹngán yí gbọn Oklunọ mítọn Jesu Klisti gblamẹ. 10  Ewọ kú na mí, bọ eyin vlavo mí to nukle wẹo kavi damlọn wẹo, mí na nọgbẹ̀ to pọmẹ hẹ ẹ. 11  Enẹwutu, mì nọ to homẹmiọnna ode awetọ bo nọ to ode awetọ hẹn lodo, kẹdẹdile mìwlẹ to wiwà do na taun tọn. 12  Todin, mẹmẹsunnu lẹ emi, mí to bibiọ to mì si nado nọ na sisi mẹhe to azọ́n sinsinyẹn wà to mì ṣẹnṣẹn lẹ bo to nukunpedo mì go to azọ́n Oklunọ tọn mẹ lẹ bosọ to tudohomẹna mì lẹ; 13  podọ nado nọ na yé sisi tlala to owanyi mẹ na azọ́n yetọn wutu. Mì nọ nọ̀ jijọho mẹ hẹ ode awetọ. 14  Humọ, mẹmẹsunnu lẹ emi, mí to tulina mì nado nọ dotuhomẹna bẹwlunọ lẹ, nado nọ dọho homẹmiọnnamẹ tọn na alindọn he jẹflumẹ lẹ, nado nọ gọalọna madogánnọ lẹ, bo nọ sinyẹnlin hẹ mẹlẹpo. 15  Mì hẹn ẹn diun dọ mẹdepope to mì mẹ yí oylan do sú oylan họ́ to mẹde go blo, ṣigba mì nọ doafọna nuhe yin dagbe na ode awetọ podọ na mẹhe pò lẹpo to whepoponu. 16  Mì nọ jaya to whepoponu. 17  Mì nọ hodẹ̀ to whepoponu. 18  Mì nọ dopẹ́ to onú lẹpo mẹ. Na ehe wẹ ojlo Jiwheyẹwhe tọn na mì to kọndopọ mẹ hẹ Klisti Jesu. 19  Mì ṣí miyọ́n gbigbọ tọn blo. 20  Mì nọ yinuwa hẹ dọdai didọ lẹ po vlẹko po blo. 21  Mì dindona onú lẹpo; bo tẹdo nuhe yin dagbe go gligli. 22  Mì nọla na kanyinylan wunmẹ lẹpo. 23  Na Jiwheyẹwhe jijọho tọn ni hẹn mì zun wiwe mlẹnmlẹn. Na gbigbọ, alindọn po agbasa mì mẹmẹsunnu lẹ tọn po ni yin whiwhla madoblọ bo pegan mlẹnmlẹn to tintin tofi Oklunọ mítọn Jesu Klisti tọn whenu. 24  Nugbonọ wẹ ewọ he to yiylọ mì, podọ ewọ nasọ basi i. 25  Mẹmẹsunnu lẹ emi, mì gbọṣi odẹ̀ mẹ na mí. 26  Mì yí nùdonùgo wiwe do dọnudo mẹmẹsunnu lẹpo. 27  Yẹn to bibiọ to mì si vẹkuvẹku gbọn Oklunọ dali dọ wekanhlanmẹ ehe ni yin hihia na mẹmẹsunnu lẹpo. 28  Na nukundagbe majẹhẹ Oklunọ mítọn Jesu Klisti tọn ni tin hẹ mì.

Nudọnamẹ Odò Tọn