Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Tẹsalonikanu lẹ 4:1-18

4  To popolẹpo mẹ, mẹmẹsunnu lẹ emi, mí ko na mì anademẹ gando lehe mì dona nọ yinuwa bo na nọ hẹn homẹ Jiwheyẹwhe tọn hùn do go, podọ na nugbo tọn, mìwlẹ to enẹ wà. Todin, mí jlo nado dotuhomẹna mì bo to bibiọ to mì si to oyín Oklunọ Jesu tọn mẹ nado zindonukọn nado to ehe wà to gigọ́ mẹ dogọ.  Na mìwlẹ yọ́n gbedide he mí na mì gbọn Oklunọ Jesu gblamẹ lẹ.  Na ehe wẹ ojlo Jiwheyẹwhe tọn, dọ mì ni yin hinhẹn zun wiwe, dọ mì ni nọla na galilọ;  dọ dopodopo mìtọn ni yọ́n lehe e na nọ deanana núzinzan etọn titi do to wiwe-yinyin po gbégbò po mẹ,  e ma yin to ojlo zanhẹmẹ nukunkẹn tọn mẹ taidi ehe akọta he ma yọ́n Jiwheyẹwhe enẹlẹ tindo nkọ;  dọ mẹdepope ni ma yì jẹ obá awugbigblena podọ jlọjẹ mẹmẹsunnu etọn tọn hihòyi to whẹho ehe mẹ tọn mẹ blo, na Jehovah wẹ omẹ lọ he nọ sayanamẹ na onú ehe lẹpo, kẹdẹdile mí ko dọna mì jẹnukọn bo ko sọ dekunnu mlẹnmlẹn na mì do.  Na Jiwheyẹwhe ylọ mí, e ma yin do mawé kọ̀n, ṣigba do wiwe-yinyin mẹ.  Enẹwutu, to whenẹnu, mẹhe yí nukunpẹvi do pọ́n, ma to nukunpẹvi yí do pọ́n gbẹtọ gba, ṣigba Jiwheyẹwhe, yèdọ mẹhe yí gbigbọ wiwe etọn do mì mẹ.  Ṣigba, na nuhe dù owanyi mẹmẹsunnu tọn, nuhudo ma tin dọ mí ni kanwehlan mì, na mìlọsu lẹ ko yin pinplọn gbọn Jiwheyẹwhe dali nado nọ yiwanna ode awetọ; 10  podọ, na nugbo tọn, mì to bibasi i hlan mẹmẹsunnu lẹpo he tin to Makedonia pete. Ṣigba, mẹmẹsunnu lẹ emi, mí to tudohomẹna mì, nado nọ to bibasi i to gigọ́ mẹ dogọ, 11  podọ nado hẹn ẹn zun yanwle mìtọn nado nọ zan gbẹzan abọẹ-abọẹ podọ ma nado nọ dádo whẹho mẹdevo lẹ tọn mẹ bo nọ yí alọ mìtọn lẹ do wazọ́n, kẹdẹdile mí degbè etọn na mì do; 12  na mì nido sọgan to zọnlin jijlọ zìn to nukun mẹhe to gbonu lẹ tọn mẹ bo ma gbọagba nudepope tọn. 13  Humọ, mẹmẹsunnu lẹ emi, mí ma jlo dọ mì ni tin to wunvi mẹ gando mẹhe to amlọndọ to okú mẹ lẹ go gba; na mìwlẹ nikaa blawu kẹdẹdile mẹhe pò bo ma tindo todido lẹ nọ wà do. 14  Na eyin yise mítọn wẹ yindọ Jesu kú bosọ fọ́n, mọdopolọ ga, Jiwheyẹwhe na hẹn mẹhe ko damlọn to okú mẹ gbọn Jesu gblamẹ lẹ wá ogbẹ̀ na yé nido sọgan nọ po e po. 15  Na ehe wẹ nuhe mí dọna mì sọgbe hẹ ohó Jehovah tọn, dọ mẹhe na pò to ogbẹ̀ to mí mẹ to tintin tofi Oklunọ tọn whenu lẹ ma na jẹnukọn to aliho depope mẹ na mẹhe ko damlọn to okú mẹ lẹ; 16  na Oklunọ lọsu na jẹte sọn olọn mẹ po awhá gbedide tọn de po, po ogbè angẹligán tọn de po gọna opẹ̀n Jiwheyẹwhe tọn, bọ mẹhe ko kú to kọndopọ mẹ hẹ Klisti lẹ na fọ́n jẹnukọn. 17  Enẹgodo, mẹhe pò to ogbẹ̀ to mí mẹ lẹ na yin zize sọyi aslọ mẹ, to pọmẹ hẹ yé, nado pé Oklunọ to jẹhọn mẹ; podọ gbọnmọ dali, mí na tin po Oklunọ po to whepoponu. 18  Enẹwutu, mì nọ yí ohó ehelẹ do to homẹmiọnna ode awetọ zọnmii.

Nudọnamẹ Odò Tọn