Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 9:1-27

9  Be yẹn ma vò nado wà nuhe jlo mi wẹ ya? Be e ma yin apọsteli de wẹ yẹn yin ya? Be yẹn ma ko mọ Jesu Oklunọ mítọn wẹ ya? Be e ma yin kọdetọn azọ́n ṣie to Oklunọ mẹ tọn wẹ mìwlẹ yin ya?  Eyin yẹn ma yin apọsteli de na mẹdevo lẹ, e họnwun hezeheze dọ yẹn yinmọ na mìwlẹ, na mìwlẹ wẹ hiadonu he do apọsteli-yinyin ṣie hia to Oklunọ mẹ.  Avùnlọyiyi ṣie hlan mẹhe to dodinna mi lẹ die:  Mí tindo jlọjẹ nado dù bo nù, kavi e ma yin mọ wẹ?  Mí tindo jlọjẹ nado wlealọ hẹ mẹmẹyọnnu de bo nọ plan ẹn hẹn taidi asi, yèdọ kẹdẹdi apọsteli he pò lẹ podọ nọvisunnu Oklunọ tọn lẹ po Kefa po, kavi e ma yin mọ wẹ?  Kavi be Balnaba po yẹn po kẹdẹ wẹ ma tindo jlọjẹ nado gọ̀n agbasazọ́n ma wà ya?  Mẹnu wẹ tin he nọ wazọ́n taidi awhànfuntọ bo nọ penukundo ede go po akuẹ edetiti tọn po? Mẹnu wẹ nọ dó vẹngle bo ma nọ dù sinsẹ́n etọn? Kavi mẹnu wẹ nọ yìn lẹngbọpa bo ma nọ nù sọn anọ́sin etọn mẹ?  Be nujinọtedo gbẹtọ tọn lẹ mẹ wẹ yẹn to onú ehelẹ dọ sọn ya? Kavi be Osẹ́n lọ lọsu ma dọ onú ehelẹ ya?  Na e yin kinkàndai to osẹ́n Mose tọn mẹ dọmọ: “Hiẹ ma dona doajànuna oyìnsú de to whenue e to likun tùn.” Be oyìnsú lẹ tọn hòpọn wẹ Jiwheyẹwhe te ya? 10  Kavi na taun tọn, be na míwlẹ tọn wutu wẹ e do dọ ehe ya? Na nugbo tọn, na mítọn wutu wẹ e yin kinkàndai, na mẹhe to aigba-jlo dona wàmọ po todido po podọ mẹhe to likun tùn dona wàmọ po todido po nado dù sọn likun lọ lẹ mẹ. 11  Eyin mí ko dó onú gbigbọ tọn lẹ na mì, be onú daho de wẹ, eyin mí na gbẹ̀n onú agbasa tọn lẹ sọn mì dè ya? 12  Eyin mẹdevo lẹ tindo jlọjẹ ehe do mì ji, be míwlẹ ma dona tindo humọ ya? Etomọṣo, míwlẹ ma ko yí jlọjẹ ehe zan, ṣigba mí to akọndona onú lẹpo, na mí nikaa hẹn aliglọnnamẹnu depope wá na wẹndagbe he gando Klisti go lọ. 13  Be mì ma yọnẹn dọ mẹhe to azọngban wiwe hẹndi lẹ nọ dù sọn nuhe to tẹmpli mẹ lẹ mẹ wẹ, podọ mẹhe nọ wadevizọn to whepoponu to agbà lọ kọ̀n lẹ nọ tindo mimá de na yede hẹ agbà lọ ya? 14  Mọdopolọ ga, Oklunọ degbena mẹhe to wẹndagbe lọ lá lẹ nado nọ nọgbẹ̀ gbọn wẹndagbe lọ gblamẹ. 15  Ṣigba, yẹn ma ko yí dopo tata to onú ehelẹ mẹ zan gba. Na nugbo tọn, yẹn ma to onú ehelẹ kàn na yẹn nido sọgan wàmọ gba, na e na pọnte na mi hú nado kú—mẹdepope ma na hẹn whẹwhinwhẹ́n ṣie nado doawagun zun ovọ́ gba! 16  Todin, eyin yẹn to wẹndagbe lọ lá, e ma yin whẹwhinwhẹ́n de na mi nado doawagun gba, na dandannu wẹ e yin na mi. Na taun tọn, dindọn wẹ e na yin na mi eyin yẹn ma lá wẹndagbe lọ! 17  Eyin yẹn wà ehe sọn ojlo mẹ wá, yẹn tindo ale de; ṣigba eyin yẹn wà ẹ jẹagọdo ojlo ṣie, depope he e na yin, yẹn tindo họ̀nkọnsi-zọ́n de he ko yin zizedo alọmẹ na mi. 18  To whelọnu lo, etẹwẹ yin ale ṣie? Dọ dile yẹn to wẹndagbe lọ lá, yẹn nido sọgan ze wẹndagbe lọ donukọnnamẹ ma yí akuẹ, na yẹn nikaa ṣì jlọjẹ ṣie zan to wẹndagbe lọ mẹ. 19  Na dile etlẹ yindọ yẹn tin to mẹdekannu sọn mẹlẹpo dè, yẹn yí dee do basi afanumẹ na mẹlẹpo, na yẹn nido sọgan duale suhugan gbẹtọ lẹ tọn. 20  Podọ, enẹwutu, na Ju lẹ, yẹn taidi Ju de, na yẹn nido duale Ju lẹ tọn; na mẹhe to osẹ́n glọ lẹ, yẹn taidi mẹhe to osẹ́n glọ, dile etlẹ yindọ yẹnlọsu ma to osẹ́n glọ, na yẹn nido duale mẹhe to osẹ́n glọ lẹ tọn. 21  Na mẹhe ma tindo osẹ́n lẹ, yẹn taidi mẹhe ma tindo osẹ́n, dile etlẹ yindọ yẹn ma nọma tindo osẹ́n Jiwheyẹwhe tọn ṣigba yẹn to osẹ́n Klisti tọn glọ, na yẹn nido duale mẹhe ma tindo osẹ́n lẹ tọn. 22  Na madogánnọ lẹ, yẹn lẹzun madogánnọ, na yẹn nido duale madogánnọ lẹ tọn. Yẹn ko lẹzun onú lẹpo na gbẹtọ wunmẹ lẹpo, na yẹn nido gbọn aliho lẹpo mẹ whlẹn mẹdelẹ gán. 23  Ṣigba, yẹn wà onú lẹpo na wẹndagbe lọ tọn wutu, na yẹn nido má ẹn hẹ mẹdevo lẹ. 24  Be mì ma yọnẹn dọ wezundotọ lẹpo wẹ nọ dowezun to alèwezun de mẹ, ṣigba omẹ dopo poun wẹ nọ mọ ale lọ yí ya? Mì dowezun to aliho he mẹ mì sọgan mọ ẹn yí te. 25  Humọ, mẹhe to mahẹ tindo to agbàwhinwhlẹn de mẹ lẹpo wẹ nọ yí mawazẹjlẹgo zan to onú lẹpo mẹ. Todin, na nugbo tọn, yewlẹ nọ wà ẹ na yé nido sọgan mọ jẹgbakun he nọ gble de yí, ṣigba míwlẹ, dehe ma nọ gble de. 26  Enẹwutu, aliho he mẹ yẹn to wezundo te ma yin po nujikudo matindo po gba; aliho he mẹ yẹn to akotokún ṣie lẹ yìn te ma yin nado to nuli jẹhọn gba; 27  ṣigba yẹn nọ to nutun agbasa ṣie bo nọ hẹn ẹn di afanumẹ de, na to whenue yẹn ko dọyẹwheho na mẹdevo lẹ godo, yẹnlọsu ni ma yin gbigbẹdai to aliho de mẹ blo.

Nudọnamẹ Odò Tọn