Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 8:1-13

8  Todin, gando núdùdù he yin yíyí do sanvọ́ hlan boṣiọ lẹ go: mí yọnẹn dọ mímẹpo wẹ tindo oyọnẹn gando whẹho ehe go. Oyọnẹn nọ kla, ṣigba owanyi nọ jlọmẹdote.  Eyin mẹdepope lẹndọ emi tindo oyọnẹn gando nude go, be ewọ ma ko yọ́n ẹn dile e dona yọ́n ẹn do.  Ṣigba, eyin mẹde yiwanna Jiwheyẹwhe, omẹ ehe wẹ ewọ yọnẹn.  Todin, gando núdùdù he yin yíyí do sanvọ́ hlan boṣiọ lẹ dùdù go, mí yọnẹn dọ boṣiọ ma yin nude to aihọn lọ mẹ, podọ Jiwheyẹwhe devo de ma tin adavo dopo.  Na dile etlẹ yindọ omẹ delẹ tin he nọ yin yiylọdọ “yẹwhe lẹ,” vlavo to olọn mẹ kavi to aigba ji, kẹdẹdile “yẹwhe lẹ” sù bọ “oklunọ lẹ” sù do,  na taun tọn, Jiwheyẹwhe dopo wẹ tin na míwlẹ, yèdọ Otọ́, mẹhe mẹ onú lẹpo wá sọn, podọ míwlẹ na ewọ; podọ Oklunọ dopo wẹ tin, yèdọ Jesu Klisti, mẹhe gblamẹ onú lẹpo wá aimẹ te, podọ míwlẹ gbọn ewọ gblamẹ.  Etomọṣo, e ma yin mẹlẹpo wẹ tindo oyọnẹn ehe; ṣigba dile e ko yin aṣa mẹdelẹ tọn do, yé gbẹ́ nọ lẹnnupọn dogbọn boṣiọ lẹ dali kakajẹ din, podọ to whenue yé to núdù, yé nọ to pinpọn ẹn taidi nuhe yin yíyí do sanvọ́ hlan boṣiọ, bọ ayihadawhẹnamẹnu yetọn he yin madogánnọ ko yin hinhẹnflu.  Ṣigba, núdùdù ma na hẹn mí dọnsẹpọ Jiwheyẹwhe; eyin mí ma dù, nude ma na gú mí, podọ, eyin mí dù, e ma na hẹn ale de wá na mí.  Ṣigba, mì payi dọ jlọjẹ he mì tindo ehe ni ma lẹzun zannu ahlìda tọn to aliho de mẹ na mẹhe yin madogánnọ lẹ blo. 10  Na eyin mẹdepope mọ hiẹ, he tindo oyọnẹn jagla to núdùdù kọ̀n to tẹmpli boṣiọ tọn de mẹ, be ayihadawhẹnamẹnu omẹ enẹ he yin madogánnọ lọ tọn ma na yin nuyiwadeji sọmọ bọ e na nọ dù núdùdù he yin yíyí do sanvọ́ hlan boṣiọ lẹ ya? 11  Na taun tọn, gbọn oyọnẹn towe dali, mẹhe yin madogánnọ lọ to yinyin huhusudo, yèdọ mẹmẹsunnu towe he tamẹ Klisti kú do. 12  Ṣigba, to whenuena mìwlẹ gbọnmọ dali waylando sọta mẹmẹsunnu mìtọn lẹ bo gbleawuna ayihadawhẹnamẹnu yetọn he yin madogánnọ, Klisti wẹ mì to ylando wà sọta. 13  Enẹwutu, eyin núdùdù hẹn mẹmẹsunnu ṣie dahli, yẹn ma nasọ dù olàn gbede ba, na yẹn nikaa hẹn mẹmẹsunnu ṣie dahli.

Nudọnamẹ Odò Tọn