Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 4:1-21

4  Mì gbọ gbẹtọ ni pọ́n míwlẹ hlan taidi mẹmẹglọ Klisti tọn lẹ podọ họ̀nkọnsi aṣli wiwe Jiwheyẹwhe tọn lẹ tọn.  Humọ, to whẹho ehe mẹ, nuhe yè nọ donukun to họ̀nkọnsi lẹ si wẹ yindọ omẹ lọ ni yin mimọ nado yin nugbonọ.  Todin, onú pẹvi tlala de wẹ e yin na yẹn, dọ yẹn ni yin dodinna gbọn mìwlẹ dali kavi gbọn whẹdọtẹn gbẹtọ tọn de dali. Yẹnlọsu ma tlẹ nọ dindona dee.  Na ayihadawhẹnamẹnu ṣie wé. Ṣogan, ehe ma do mi hia di dodonọ, ṣigba ewọ he nọ dindona mi wẹ Jehovah.  Enẹwutu, mì dawhẹ nudepope tọn jẹnukọnna ojlẹ sisọ lọ blo, kakajẹ whenue Oklunọ na wá, mẹhe na hẹn onú whiwhla he to zinvlu mẹ lẹ jẹ hinhọ́n nù bo na hẹn linlẹn ahun mẹ tọn lẹ sọawuhia, podọ to whenẹnu wẹ omẹ dopodopo na mọ pipà etọn yí sọn Jiwheyẹwhe dè.  Todin, mẹmẹsunnu lẹ emi, onú ehelẹ wẹ yẹn ko dọ gbọn dee titi po Apolo po yiyizan taidi apajlẹ lẹ dali na dagbe mìtọn, dọ to whẹho mítọn mẹ mìwlẹ nido sọgan plọn osẹ́n lọ he dọmọ: “Mì yì zẹ̀ nuhe yin kinkàndai lẹ go blo,” na dopodopo mìtọn nikaa kla bo na nọ do nukundagbe hia mẹde hú mẹdevo.  Na mẹnu wẹ hẹn we gbọnvo na mẹdevo? Na nugbo tọn, etẹwẹ hiẹ tindo bọ e ma yindọ hiẹ mọyi wẹ? Todin, na nugbo tọn, eyin hiẹ mọ ẹn yí wẹ, naegbọn hiẹ do to awagundo taidi dọ e ma yin hiẹ mọ ẹn yí wẹ?  Mìwlẹ ko tindo pekọ, kavi e ma yin mọ wẹ? Mìwlẹ ko lẹzun adọkunnọ, kavi e ma yin mọ wẹ? Mìwlẹ ko jẹ gandu ji taidi ahọlu matin míwlẹ, kavi e ma yin mọ wẹ? Podọ na nugbo tọn, yẹn jlo dọ mìwlẹ ni ko jẹ gandu ji taidi ahọlu, na mílọsu nido sọgan dugán hẹ mì taidi ahọlu lẹ.  Na e taidi na mi dọ Jiwheyẹwhe ko do mí apọsteli lẹ hia gbọngodo taidi mẹhe yin didedovo na okú, na mí ko lẹzun nupinpọn de na aihọn lọ, podọ na angẹli lẹ, podọ na gbẹtọ lẹ. 10  Mí yin nulunọ lẹ na Klisti tọn wutu, ṣigba mìwlẹ yin nuyọnẹntọ to Klisti mẹ; mí yin madogánnọ, ṣigba mìwlẹ yin huhlọnnọ; mìwlẹ tindo oyín dagbe, ṣigba míwlẹ yin winyando. 11  Kakajẹ ojlẹ ehe mẹ, huvẹ gbẹ́ to mí hù podọ nùgbla sọ to mí hù podọ po huhlọn po wẹ mí nọ mọ avọ̀ dó podọ yè nọ linú mí to filẹpo podọ mí ma tindo owhé 12  podọ mí nọ jẹtukla gbọn alọ mítọn lẹ yíyí do wazọ́n dali. To whenue yè to mí vlẹ, mí nọ dona; to whenue yè to homẹkẹndo mí, mí nọ doakọnna; 13  to whenue yè to oyín mítọn hẹngble, mí nọ vẹvẹ; mí ko wá taidi ogbó aihọn lọ tọn, yèdọ nugbẹdai onú lẹpo tọn kakajẹ din. 14  Yẹn to onú ehelẹ kàn, e ma yin nado dowinyan mì gba, ṣigba nado dotuhomẹna mì taidi ovi yiwanna ṣie lẹ. 15  Na dile etlẹ yindọ mì sọgan tindo anademẹtọ degba-awe-foo to Klisti mẹ, na taun tọn, mì ma tindo otọ́ susu gba; na yẹn ko lẹzun otọ́ mìtọn to Klisti Jesu mẹ gbọn wẹndagbe lọ gblamẹ. 16  Enẹwutu, yẹn vẹ̀ mì dọ mì ni nọ hodo apajlẹ ṣie. 17  Enẹwutu wẹ yẹn to Timoti dohlan mì dè, na ewọ wẹ ovi yiwanna podọ nugbonọ ṣie to Oklunọ mẹ; ewọ nasọ flinnu mì gando aliho nuyiwa tọn ṣie lẹ go to kọndopọ mẹ hẹ Klisti Jesu, kẹdẹdile yẹn to mẹplọn to filẹpo to agun lẹpo mẹ do. 18  Mẹdelẹ to kikla taidi dọ yẹn ma ja mì dè na nugbo tọn wẹ nkọ. 19  Ṣigba, yẹn na wá mì dè to madẹnmẹ, eyin Jehovah jlo, podọ yẹn ma jlo na yọ́n hodidọ mẹhe to kikla lẹ tọn gba, adavo huhlọn yetọn. 20  Na ahọluduta Jiwheyẹwhe tọn ma sinai do hodidọ ji gba, ṣigba do huhlọn ji. 21  Etẹwẹ mìwlẹ jlo? Be yẹn ni wá mì dè po opò de po wẹ, kavi po owanyi po, podọ to gbigbọ walọmimiọn tọn mẹ?

Nudọnamẹ Odò Tọn