Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 15:1-58

15  Todin, mẹmẹsunnu lẹ emi, yẹn hẹn wẹndagbe lọ zun yinyọnẹn na mì, ehe yẹn lá na mì, he mìwlẹ sọ kẹalọyi, to ehe mẹ mì to ote te ga,  gbọn wẹndagbe ehe, he yẹn lá na mì lọ gblamẹ wẹ mìwlẹ sọ to yinyin whinwhlẹngán te, eyin mì nọ tẹdo e go gligli, eyin e ma yinmọ, na nugbo tọn, be mì lẹzun yisenọ lẹ to ovọ́ mẹ.  Na dopo to onú tintan he yẹn zedo alọmẹ na mì lẹ mẹ wẹ enẹ he yẹnlọsu mọyi, dọ Klisti kú na ylando mítọn lẹ dile Owe-wiwe lẹ dọ do;  podọ ewọ yin dìdì, mọwẹ, dọ e ko yin finfọn to azán atọ̀ntọ gbè dile Owe-wiwe lẹ dọ do;  podọ e sọawuhia Kefa, enẹgodo, omẹ wiawe lẹ.  Enẹgodo, e sọawuhia nuhe hugan mẹmẹsunnu fowe-kanweko to ojlẹ dopo mẹ, mẹhe suhugan yetọn gbẹ́ pò to ogbẹ̀ kakajẹ din, ṣigba delẹ ko damlọn to okú mẹ.  Enẹgodo, e sọawuhia Jakọbu, enẹgodo apọsteli lẹpo;  ṣigba to godo mẹ pete, e sọawuhia yẹnlọsu ga taidi mẹhe yè ji jẹnukọnna ojlẹ etọn.  Na yẹn wẹ yin pẹvi pete to apọsteli lẹ mẹ, podọ yẹn ma jẹ nado yin yiylọdọ apọsteli de, na yẹn dohomẹkẹn agun Jiwheyẹwhe tọn wutu. 10  Ṣigba, gbọn nukundagbe majẹhẹ Jiwheyẹwhe tọn dali wẹ yẹn do yin nuhe yẹn yin. Podọ nukundagbe majẹhẹ etọn he yin didohia mi ma yin to ovọ́ mẹ, ṣigba yẹn jẹtukla hú yemẹpo, ṣogan e ma yin yẹn ṣigba nukundagbe majẹhẹ Jiwheyẹwhe tọn he tin hẹ mi lọ wẹ. 11  Etomọṣo, vlavo yẹn kavi yewlẹ, mọ wẹ mí to yẹwhehodọ do, mọ wẹ mìwlẹ yise do. 12  Todin, eyin yè to yẹwhehodọ gando Klisti go dọ e ko yin finfọn sọn oṣiọ lẹ mẹ, naegbọn delẹ to mì mẹ do dọ dọ fọnsọnku oṣiọ lẹ tọn de ma tin? 13  Na nugbo tọn, eyin fọnsọnku oṣiọ lẹ tọn ma tin, be mọjanwẹ Klisti ma ko yin finfọn do niyẹn. 14  Ṣigba, eyin Klisti ma ko yin finfọn, na nugbo tọn, ovọ́ wẹ yẹwhehodidọ mítọn, podọ yise mítọn yin ovọ́. 15  Mọdopolọ, eyin nugbo wẹ dọ oṣiọ lẹ ma na yin finfọn, be míwlẹ sọ yin mimọ di mẹhe to kunnu lalo de sọta Jiwheyẹwhe, na mí ko dekunnu sọta Jiwheyẹwhe dọ ewọ fọ́n Klisti, ṣigba mẹhe ewọ ma fọ́n. 16  Na eyin oṣiọ lẹ ma na yin finfọn, be Klisti lọsu ma ko yin finfọn. 17  Humọ, eyin Klisti ma ko yin finfọn, be onú tata wẹ yise mìtọn; bọ mìwlẹ gbẹ́ pò to ylando mìtọn lẹ mẹ. 18  Podọ, na nugbo tọn, mẹhe damlọn to okú mẹ to kọndopọ mẹ hẹ Klisti lẹ ko dọ̀n. 19  Eyin to ogbẹ̀ ehe mẹ kẹdẹ wẹ mí tindo todido to Klisti mẹ te, be onú mítọn wẹ blawu hugan to gbẹtọ lẹpo mẹ. 20  Ṣigba, todin, Klisti ko yin finfọn sọn oṣiọ lẹ mẹ, yèdọ sinsẹ́n tintan mẹhe ko damlọn to okú mẹ lẹ tọn lẹ. 21  Na to whenuena e yindọ omẹ dopo gblamẹ wẹ okú gbọn wá, omẹ dopo gblamẹ wẹ fọnsọnku oṣiọ lẹ tọn lọsu gbọn wá ga. 22  Na kẹdẹdile mẹlẹpo to kúkú to Adam mẹ, mọdopolọ wẹ mẹlẹpo na yin hinhẹnwa ogbẹ̀ to Klisti mẹ do ga. 23  Ṣigba, omẹ dopodopo to aliho he to kannukannu de mẹ: Klisti sinsẹ́n tintan lẹ, enẹgodo mẹhe yin Klisti tọn lẹ to tintin tofi etọn whenu. 24  Enẹgodo, to opodo, whenuena e na ko ze ahọluduta do alọmẹ na Jiwheyẹwhe podọ Otọ́ etọn, to whenuena ewọ na ko hẹn gandudu lẹpo, aṣẹpipa lẹpo po huhlọn po zun ovọ́. 25  Na ewọ dona dugán taidi ahọlu kakajẹ whenue Jiwheyẹwhe na ko hẹn kẹntọ lẹpo wá afọ etọn lẹ glọ. 26  Taidi kẹntọ godo tọn, okú na yin hinhẹn zun ovọ́. 27  Na Jiwheyẹwhe “ko hẹn onú lẹpo zun mẹmẹglọ to afọ etọn lẹ glọ.” Ṣigba, to whenuena e dọ dọ ‘onú lẹpo ko yin hinhẹn zun mẹmẹglọ,’ e họnwun dọ ehe ma bẹ omẹ lọ he hẹn onú lẹpo zun mẹmẹglọ na ẹn hẹn gba. 28  Ṣigba, to whenue onú lẹpo na ko yin hinhẹn zun mẹmẹglọ na ẹn godo, to whenẹnu Visunnu lọ lọsu ga na hẹn ede zun mẹmẹglọ na Omẹ lọ he hẹn onú lẹpo zun mẹmẹglọ na ẹn, na Jiwheyẹwhe nido yin onú lẹpo na mẹlẹpo. 29  Eyin e ma yinmọ, etẹwẹ mẹhe to yinyin bibaptizi na lẹndai nado yin oṣiọ lẹ na wà? Eyin oṣiọ lẹ ma na yin finfọn paali, naegbọn yewlẹ ga do to yinyin bibaptizi na lẹndai mọnkọtọn? 30  Naegbọn mílọsu do to owù mẹ to ojlẹ lẹpo mẹ? 31  Mẹmẹsunnu lẹ emi, egbesọegbesọ wẹ yẹn nọ pannukọn okú kẹdẹdile e họnwun dọ yẹn nọ jẹaglin do mì ji to Klisti Jesu Oklunọ mítọn mẹ do. 32  Taidi gbẹtọ lẹ, eyin yẹn ko hoavùn hẹ gbekanlin lẹ to Efesu, ale tẹwẹ to e mẹ na mi? Eyin oṣiọ lẹ ma na yin finfọn, “mì gbọ mí ni dù bo nù, na osọ wẹ mí na kú.” 33  Yè klọ mì blo. Gbẹdido ylankan lẹ nọ hẹn walọ dagbe lẹ gble. 34  Mì fọ́n nọ nukle to aliho dodo tọn mẹ, mì sọ zindonukọn to ylando mẹ blo, na mẹdelẹ ma tindo oyọnẹn Jiwheyẹwhe tọn. Yẹn to hodọ nado hẹn winyan hù mì. 35  Etomọṣo, mẹde sọgan dọmọ: “Nawẹ oṣiọ lẹ na yin finfọn gbọn? Mọwẹ, agbasa nankọ mẹ wẹ yé na lẹkọwa te?” 36  Hiẹ nulunọ! Nuhe hiẹ dó ma nọ yin hinhẹnwa ogbẹ̀ adavo e kú whẹ́; 37  podọ gando nuhe hiẹ dó go, e ma yin agbasa he na whẹ́n wẹ hiẹ dó gba, ṣigba okún he to tata, e sọgan yin likun tọn kavi depope to nuhe pò lẹ mẹ tọn; 38  ṣigba Jiwheyẹwhe nọ na ẹn agbasa de kẹdẹdile ewọ jlo do, podọ e nọ na okún dopodopo sọgbe hẹ agbasa etọn titi. 39  Agbasalan lẹpo ma nọ yin agbasalan dopolọ gba, ṣigba ode nọ yin gbẹtọvi tọn, podọ devo nọ yin agbasalan kanlin tọn, podọ devo nọ yin agbasalan ohẹ̀ lẹ tọn, podọ devo nọ yin whèvi tọn. 40  Podọ agbasa olọn mẹ tọn lẹ tin, podọ agbasa aigba ji tọn lẹ tin; ṣigba gigo agbasa olọn mẹ tọn lẹ tọn gbọnvo, podọ dehe yin agbasa aigba ji tọn lẹ sọ gbọnvo. 41  Gigo owhè tọn gbọnvo, podọ gigo osun tọn yin devo, podọ gigo sunwhlẹvu lẹ tọn yin devo; na nugbo tọn, sunwhlẹvu gbọnvona sunwhlẹvu to gigo mẹ. 42  Mọdopolọ wẹ fọnsọnku oṣiọ lẹ tọn ga. E yin didó to gbigble mẹ, e yin finfọn to magble mẹ. 43  E yin didó to madoyẹyi mẹ, e yin finfọn to gigo mẹ. E yin didó to madogán mẹ, e yin finfọn to huhlọn mẹ. 44  E yin didó to agbasalan mẹ, e yin finfọn to agbasa gbigbọnọ de mẹ. Eyin agbasalannọ de tin, be gbigbọnọ de tin ga. 45  E tlẹ ko yin kinkàndai domọ dọ: “Sunnu tintan Adam lẹzun alindọn gbẹ̀te.” Adam godo tọn lẹzun gbigbọ ogbẹ̀-namẹtọ. 46  Etomọṣo, tintan lọ ma yin dehe yin gbigbọnọ gba, ṣigba dehe yin agbasalannọ, enẹgodo, enẹ he yin gbigbọnọ. 47  Sunnu tintan wá sọn aigba mẹ bo yin bibasi sọn kọ́gudu mẹ; sunnu awetọ wá sọn olọn. 48  Dile ewọ he yin bibasi po kọ́gudu po lọ te, mọ wẹ mẹhe yin bibasi po kọ́gudu po lẹ te ga; podọ dile ewọ he sọn olọn lọ te, mọ wẹ mẹhe yin olọn tọn lẹ te ga. 49  Podọ kẹdẹdile mí ko ze awusọhia mẹhe yin bibasi sọn kọ́gudu mẹ lọ tọn dó do, mí nasọ ze awusọhia ewọ he wá sọn olọn lọ tọn dó ga. 50  Ṣigba, mẹmẹsunnu lẹ emi, yẹn dọ ehe dọ, agbasalan po ohùn po ma sọgan dugu ahọluduta Jiwheyẹwhe tọn, mọjanwẹ gbigble ma nọ dugu magble tọn do niyẹn. 51  Mì pọ́n! Yẹn na dọ aṣli wiwe de na mì: Mímẹpo ma na damlọn to okú mẹ gba, ṣigba mímẹpo wẹ na yin didiọ, 52  to ojlẹ dopo mẹ, yèdọ to nukunwhiwhe dopo mẹ, to opẹ̀n godo tọn lọ whenu. Na opẹ̀n lọ na dọnú bọ oṣiọ lẹ na yin finfọn do magble mẹ, bọ mí nasọ yin didiọ. 53  Na dehe sọgan gble ehe dona ze magble dó, podọ dehe nọ kú ehe dona ze ehe yin jọmaku dó. 54  Ṣigba, to whenue dehe sọgan gble ehe na ko ze magble dó bọ dehe nọ kú ehe na ko ze jọmaku dó, whenẹnu wẹ nuhe yin didọ lọ na jọ dọmọ: “Okú yin zize mì kakadoi.” 55  “Okú E, fie wẹ awhàngbigba towe te? Okú E, fie wẹ adí towe te?” 56  Ylando wẹ adí he nọ hẹn okú wá, ṣigba Osẹ́n lọ wẹ huhlọn ylando tọn. 57  Ṣigba, opẹ́ wẹ na Jiwheyẹwhe, na ewọ na mí awhàngbigba gbọn Oklunọ mítọn Jesu Klisti gblamẹ! 58  Enẹwutu, mẹmẹsunnu mẹyiwanna ṣie lẹ emi, mì nọte gligli, masẹafọ, bo nọ tindo onú susu nado wà to azọ́n Oklunọ tọn mẹ to whepoponu, to yinyọnẹn mẹ dọ tuklajijẹ mìtọn ma yin ovọ́ to Oklunọ mẹ.

Nudọnamẹ Odò Tọn