Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 14:1-40

14  Mì doafọna owanyi, ṣogan mì nọ yí zohunhun do dín nunina gbigbọ tọn lẹ, ṣigba e na pọnte hú dọ mì ni nọ dọ dọdai.  Na ewọ he nọ yí ogbè devo do dọho, nọ dọho, e ma yin na gbẹtọ, ṣigba na Jiwheyẹwhe, na mẹdepope ma nọ dotoai, ṣigba ewọ nọ dọho aṣli wiwe lẹ tọn gbọn gbigbọ dali.  Etomọṣo, ewọ he nọ dọ dọdai lẹ nọ hẹnmẹ lodo bo nọ na tulimẹ bosọ nọ miọnhomẹna gbẹtọ lẹ gbọn ohó etọn dali.  Ewọ he nọ yí ogbè devo do dọho nọ hẹn edetiti lodo, ṣigba ewọ he nọ dọ dọdai lẹ nọ hẹn agun lodo.  Todin, yẹn na ko jlo dọ mìmẹpo ni nọ yí ogbè devo lẹ do dọho, ṣigba nuhe jlo mi hugan wẹ yindọ mì ni nọ dọ dọdai. Na nugbo tọn, ewọ he nọ dọ dọdai lẹ klohu mẹhe nọ yí ogbè devo lẹ do dọho, adavo eyin ewọ, na taun tọn, nọ basi lẹdogbedevomẹ, na agun lọ nido sọgan yin hinhẹn lodo.  Ṣigba, mẹmẹsunnu lẹ emi, eyin yẹn wá mì dè to ojlẹ ehe mẹ bo yí ogbè devo lẹ do to hodọ, dagbe tẹwẹ yẹn wà na mì, eyin yẹn ma yí osọhia kavi oyọnẹn kavi dọdai didọ kavi mẹpinplọn do dọhona mì?  Nalete, nuhe ma tindo gbọfufu lẹ vlavo ován kavi ajalẹn de nọ dọnú; eyin vogbingbọn ma tin to nudidọ yetọn lẹ mẹ, nawẹ nuhe to yinyin hihò to ován kavi ajalẹn ji sọgan yin yinyọnẹn gbọn?  Na nugbo tọn, eyin nudidọ opẹ̀n tọn ma họnwun hezeheze, mẹnu wẹ na wleawudaina awhàn?  Mọdopolọ ga, eyin mìwlẹ ma yí odẹ́ mìtọn do dọho to aliho he na yin nukunnumọjẹemẹ po awubibọ po mẹ, nawẹ nuhe to yinyin didọ lọ na yin yinyọnẹn gbọn? Mìwlẹ na to hodọ, na taun tọn, do jẹhọn mẹ. 10  E sọgan yindọ ogbè voovo lẹ wẹ to aihọn mẹ, ṣogan depope to yé mẹ ma nọma tindo zẹẹmẹ. 11  To whelọnu lo, eyin yẹn ma mọnukunnujẹ nuhe dọ ogbè lọ te mẹ, be yẹn yin jonọ de na mẹhe to hodọ, bọ mẹhe to hodọ lọ yin jonọ de na mi. 12  Mọdopolọ ga, mìlọsu lẹ, to whenuena e yindọ mì yí zohunhun do to nunina gbigbọ tọn lẹ jlo, mì nọ dín nado sù to yé mẹ na hinhẹn lodo agun lọ tọn. 13  Enẹwutu, mì gbọ ewọ he nọ yí ogbè devo do dọho ni hodẹ̀ na ewọ nido sọgan basi lẹdogbedevomẹ. 14  Na eyin yẹn nọ yí ogbè devo do hodẹ̀, nunina gbigbọ tọn he yin nina mi lọ wẹ to dẹ̀ho, ṣigba ayiha ṣie ma tindo sinsẹ́n. 15  To whelọnu lo, etẹwẹ dona yin wiwà? Yẹn na yí nunina gbigbọ tọn lọ do hodẹ̀, ṣigba yẹn nasọ yí ayiha ṣie do hodẹ̀ ga. Yẹn na yí nunina gbigbọ tọn lọ do jihàn pipà tọn, ṣigba yẹn nasọ yí ayiha ṣie do jihàn pipà tọn ga. 16  Eyin e ma yinmọ, eyin hiẹ yí nunina gbigbọ tọn de do na pipà, nawẹ mẹhe sinai to azinpo omẹ paa lẹ tọn ji lọ na dọ “Niṣẹ”* na pẹdido towe lẹ gbọn, to whenue ewọ ma yọ́n nuhe dọ hiẹ te? 17  Nugbo wẹ dọ hiẹ dopẹ́ to aliho dagbe de mẹ, ṣigba omẹ diẹ ma yin hinhẹn lodo. 18  Yẹn dopẹna Jiwheyẹwhe dọ yẹn nọ yí ogbè susu do dọho hú mìmẹpo. 19  Etomọṣo, e na pọnte na mi nado yí ayiha ṣie do dọ hogbe atọ́n to agun de mẹ, na yẹn nido sọgan yí onù do plọn mẹdevo lẹ ga, hú hogbe degba-awe-foo lẹ to ogbè devo mẹ. 20  Mẹmẹsunnu lẹ emi, mì lẹzun yọpọvu to huhlọn nukunnumọjẹnumẹ tọn lẹ mẹ blo, ṣigba mì yin ovivu lẹ to ylanwiwa mẹ; ṣogan mì ni lẹzun mẹhe whẹ́n ganji to huhlọn nukunnumọjẹnumẹ tọn lẹ mẹ. 21  E yin kinkàndai to Osẹ́n lọ mẹ dọmọ: “‘Odẹ́ jonọ lẹ tọn po nùflo jonọ lẹ tọn po wẹ yẹn na yí do dọhona omẹ ehelẹ, ṣogan yé ma na tlẹ dotoaina mi to whenẹnu,’ wẹ Jehovah dọ.” 22  Enẹwutu, ogbè devo lẹ yin ohia de, e ma yin na yisenọ lẹ gba, ṣigba na mayisenọ lẹ, to whenuena e yindọ dọdai didọ ma yin na mayisenọ lẹ, ṣigba na yisenọ lẹ. 23  Enẹwutu, eyin agun lọ pete pli dopọ do fidopo bọ yemẹpo yí ogbè devo lẹ do to hodọ, ṣigba bọ omẹ paa lẹ kavi mayisenọ lẹ biọ họmẹ, be yé ma na dọ dọ alẹ̀ wẹ mì hùn ya? 24  Ṣigba, eyin mìmẹpo to dọdai dọ bọ mayisenọ de kavi omẹ paa de biọ họmẹ, ewọ na yin wiwọhẹ gbọn ohó yemẹpo tọn dali, bo na yin whinwhàn nado dindona ede kitokito; 25  aṣli ahun etọn mẹ tọn lẹ na sọawuhia, bọ ewọ na ṣinyọ́n nukunmẹ etọn ai bo sẹ̀n Jiwheyẹwhe bosọ lá dọmọ: “Na nugbo tọn, Jiwheyẹwhe tin to ṣẹnṣẹn mìtọn.” 26  To whenẹnu, mẹmẹsunnu lẹ emi, etẹwẹ dona yin wiwà? To whenuena mì pli dopọ, bọ mẹde tindo psalm, mẹdevo tindo mẹpinplọn, mẹdevo tindo osọhia, mẹdevo tindo ogbè devo, bọ mẹdevo tindo tadena. Mì gbọ onú lẹpo ni yin wiwà na mẹhẹnlodo. 27  Podọ eyin mẹde to ogbè devo yí do dọho, mì gbọ ni ma zẹ̀ omẹ awe kavi e sù gbau atọ̀n go blo, podọ ni yin debọdo-dego; mì sọ gbọ mẹde ni basi lẹdogbedevomẹ. 28  Ṣigba, eyin lẹdogbedevomẹtọ ma tin, mì gbọ ewọ ni nabọẹ to agun mẹ bo dọhona ede podọ na Jiwheyẹwhe. 29  Humọ, mì gbọ yẹwhegán awe kavi atọ̀n ni dọho, podọ mì gbọ mẹhe pò lẹ ni tunwun zẹẹmẹ lọ go. 30  Ṣigba, eyin mẹdevo he to aisinsin to finẹ mọ osọhia de, mì gbọ omẹ tintan lọ ni nabọẹ whẹ́. 31  Na mìmẹpo nido sọgan dọ dọdai debọdo-dego, na mẹlẹpo nido sọgan plọnnu bọ mẹlẹpo na yin tulina. 32  Podọ nunina gbigbọ tọn lẹ na dọdai didọ na yin anadena gbọn yẹwhegán lẹ dali. 33  Na Jiwheyẹwhe ma yin Jiwheyẹwhe bẹwlu tọn de gba, ṣigba jijọho tọn. Dile e te do to agun omẹ wiwe lẹ tọn lẹpo mẹ, 34  mì gbọ yọnnu lẹ ni nọ gbọṣi abọẹ to agun lẹ mẹ, na e ma yin alọkẹyi dọ yé ni dọho, ṣigba mì gbọ yé ni yin mẹmẹglọ, yèdọ dile Osẹ́n lọ dọ do. 35  To whelọnu lo, eyin yé jlo na plọn nude, mì gbọ yé ni kàn ẹn biọ asu yetọn titi to whégbè, na winyannu wẹ e yin na yọnnu de nado dọho to agun mẹ. 36  Kavi mìwlẹ dè wẹ ohó Jiwheyẹwhe tọn wá sọn, kavi be mìwlẹ kẹdẹ dè wẹ e jẹ ya? 37  Eyin mẹde lẹndọ emi yin yẹwhegán de kavi tindo nunina gbigbọ tọn, mì gbọ ewọ ni kẹalọyi nuhe yẹn to kinkàn hlan mì lẹ, na gbedide Oklunọ tọn wẹ yé yin wutu. 38  Ṣigba, eyin mẹdepope yin wunvinọ, ewọ ni zindonukọn to wunvi etọn mẹ. 39  Enẹwutu, mẹmẹsunnu ṣie lẹ emi, mì nọ yí zohunhun do dín nunina dọdai didọ tọn, ṣogan mì gbẹ́ ogbè devo lẹ yíyí do dọho namẹ blo. 40  Ṣigba, mì gbọ onú lẹpo ni nọ yin wiwà dile e jẹ do podọ to titoji.

Nudọnamẹ Odò Tọn

1Kọ 14:16* Pọ́n Lo 1:25, nudọnamẹ odò tọn.