Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 12:1-31

12  Todin, mẹmẹsunnu lẹ emi, yẹn ma jlo dọ mì ni tin to wunvi mẹ gando nunina gbigbọ tọn lẹ go.  Mìwlẹ yọnẹn dọ whenuena mì gbẹ́ yin omẹ akọta lẹ tọn, mì nọ yin hinhẹn buali nado hodo boṣiọ enẹlẹ he ma nọ dọho kẹdẹdile mì ko yin anadena do.  Enẹwutu, yẹn jlo na hẹn mì yọnẹn dọ mẹdepope he to hodọ gbọn gbigbọ Jiwheyẹwhe tọn dali ma nọ dọmọ: “Mẹhodẹ̀do wẹ Jesu!” podọ mẹdepope ma sọgan dọmọ: “Jesu wẹ Oklunọ!” eyin e ma yin gbọn gbigbọ wiwe dali.  Todin, nunina voovo lẹ wẹ tin, ṣigba gbigbọ dopolọ wẹ tin;  podọ lizọnyizọn voovo lẹ wẹ tin, ṣogan Oklunọ dopolọ wẹ;  podọ aliho nuyiwa tọn voovo lẹ wẹ tin, ṣogan Jiwheyẹwhe dopolọ wẹ nọ yí aliho nuyiwa tọn lọ lẹpo zan to gbẹtọ lẹpo mẹ.  Ṣigba, awusọhia gbigbọ lọ tọn yin nina omẹ dopodopo na lẹndai he nọ hẹn ale wá.  Di apajlẹ, nuyọnẹn yí do dọho yin nina mẹde gbọn gbigbọ dali, oyọnẹn yí do dọho yin nina mẹdevo sọgbe hẹ gbigbọ dopolọ,  yise yin nina mẹdevo gbọn gbigbọ dopolọ dali, nunina azọ̀nhẹngbọ tọn lẹ yin nina mẹdevo gbọn gbigbọ enẹ dopolọ dali, 10  ṣogan azọ́n huhlọnnọ lẹ wiwà yin nina mẹdevo, dọdai didọ yin nina mẹdevo, ohó gbọdo lẹ yinyọnẹn yin nina mẹdevo, ogbè voovo lẹ yin nina mẹdevo, podọ tadena ogbè lẹ tọn yin nina mẹdevo. 11  Ṣigba, gbigbọ ehe dopolọ wẹ nọ yí aliho nuyiwa tọn ehe lẹpo zan, bo nọ má na omẹ dopodopo kẹdẹdile e jlo e do. 12  Na kẹdẹdile agbasa yin dopo ṣigba bo tindo awutugonu susu do, podọ awutugonu agbasa enẹ tọn lẹpo, dile yé tlẹ sù sọ, agbasa dopo wẹ yé, mọ wẹ Klisti lọsu te ga. 13  Na nugbo tọn, gbọn gbigbọ dopo dali wẹ mímẹpo yin bibaptizi te do agbasa dopo mẹ, vlavo Ju lẹ kavi Glẹkinu lẹ, vlavo afanumẹ lẹ kavi mẹhe to yedekannu lẹ, podọ mímẹpo wẹ yin hinhẹn nado nù gbigbọ dopo. 14  Na nugbo tọn, agbasa lọ ma yin awutugonu dopo gba, ṣigba susu wẹ. 15  Eyin afọ na dọmọ: “Na yẹn ma yin alọ wutu, yẹn ma yin apadewhe agbasa lọ tọn,” ehe ma zọ́n bọ e ma yin apadewhe agbasa lọ tọn gba. 16  Podọ eyin otó na dọmọ: “Na yẹn ma yin nukun wutu, yẹn ma yin apadewhe agbasa lọ tọn,” ehe ma zọ́n bọ e ma yin apadewhe agbasa lọ tọn gba. 17  Eyin agbasa lọ pete wẹ na yin nukun, fie wẹ nugopipe nusise tọn na te? Eyin agbasa lọ pete wẹ nọ sènu, fie wẹ owán sisè na te? 18  Ṣigba, todin, Jiwheyẹwhe ko yí awutugonu lọ lẹ do agbasa lọ go, yèdọ dopodopo yetọn, kẹdẹdile e jlo e do. 19  Eyin yemẹpo wẹ yin awutugonu dopo, fie wẹ agbasa lọ na te? 20  Ṣigba, todin, yé yin awutugonu susu, ṣogan yin agbasa dopo. 21  Nukun ma sọgan dọna alọ dọmọ: “Yẹn ma tindo nuhudo towe”; kavi, humọ, ota ma sọgan dọna afọ lẹ dọmọ: “Yẹn ma tindo nuhudo mìtọn.” 22  Ṣigba kakatimọ, awutugonu agbasa tọn lẹ he taidi nuhe yin madogánnọ wẹ nọ yin dandannu, 23  podọ nugonu agbasa lọ tọn lẹ he mí lẹndọ yé ma tindo yẹyi sọmọ, ehelẹ wẹ mí nọ na yẹyi hugan, podọ nugonu mítọn he ma yọnwhanpẹ lẹ wẹ nọ yọnwhanpẹ hugan, 24  to whenuena e yindọ nugonu mítọn he yọnwhanpẹ lẹ ma nọ tindo nuhudo nudepope tọn. Etomọṣo, Jiwheyẹwhe kọ̀n agbasa lọ dopọ, bo nọ na yẹyi nugonu he tindo nuhudo lẹ hugan, 25  sọmọ bọ kinklan de ma na tin to agbasa lọ mẹ, ṣigba awutugonu etọn lẹ na nọ tindo mẹtọnhopọn dopolọ na ode awetọ. 26  Podọ eyin awutugonu dopo to yaji, awutugonu he pò lẹpo nọ jiya hẹ ẹ; kavi eyin awutugonu dopo yin gigopana, awutugonu he pò lẹpo nọ jaya hẹ ẹ. 27  Todin, agbasa Klisti tọn wẹ mìwlẹ yin, podọ dopodopo mìtọn yin awutugonu lẹ. 28  Podọ Jiwheyẹwhe ko yí omẹ dopodopo do agun lọ mẹ, tintan, apọsteli lẹ; awetọ, yẹwhegán lẹ; atọ̀ntọ, mẹplọntọ lẹ; enẹgodo, azọ́n huhlọnnọ lẹ; enẹgodo, nunina azọ̀nhẹngbọ tọn lẹ; sinsẹ̀nzọn alọgọnamẹ tọn lẹ, nugopipe lẹ nado deanana onú, ogbè voovo lẹ. 29  E ma yin yemẹpo wẹ yin apọsteli lẹ, kavi e ma yin mọ wẹ? E ma yin yemẹpo wẹ yin yẹwhegán lẹ, kavi e ma yin mọ wẹ? E ma yin yemẹpo wẹ yin mẹplọntọ lẹ, kavi e ma yin mọ wẹ? E ma yin yemẹpo wẹ nọ wà azọ́n huhlọnnọ lẹ, kavi e ma yin mọ wẹ? 30  E ma yin yemẹpo wẹ tindo nunina azọ̀nhẹngbọ tọn lẹ, kavi e ma yin mọ wẹ? E ma yin yemẹpo wẹ nọ yí ogbè devo lẹ do dọho, kavi e ma yin mọ wẹ? E ma yin yemẹpo wẹ yin lẹdogbedevomẹtọ lẹ, kavi e ma yin mọ wẹ? 31  Ṣigba, mì nọ yí zohunhun do dín nunina daho hugan lẹ. Ṣogan, yẹn do aliho he yiaga hugan lọ hia mì.

Nudọnamẹ Odò Tọn