Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 11:1-34

11  Mì nọ hodo apajlẹ ṣie, yèdọ dile yẹn nọ hodo Klisti tọn do.  Todin, yẹn pà mì na mì hẹn mi do ayiha mẹ to onú lẹpo mẹ podọ mì nọ tẹdo aṣa lẹ go gligli kẹdẹdile yẹn ze yé do alọmẹ na mì do.  Ṣigba, yẹn jlo dọ mì ni yọnẹn dọ Klisti wẹ ota sunnu dopodopo tọn; podọ sunnu wẹ ota yọnnu tọn; podọ Jiwheyẹwhe wẹ ota Klisti tọn.  Sunnu depope he to dẹ̀ho kavi to dọdai dọ bo ṣinyọnnudo ota, dowinyan ota etọn;  ṣigba yọnnu depope he to dẹ̀ho kavi to dọdai dọ bo ma ṣinyọnnudo ota, dowinyan ota etọn, na e yin nudopolọ taidi eyin yọnnu de whlẹ́ ota.  Na eyin yọnnu de ma nọ ṣinyọnnudo ota, mì gbọ ewọ ni bo pà oda etọn yìdo; ṣigba eyin winyannu wẹ e yin na yọnnu de nado pà oda yìdo kavi whlẹ́ ota, mì gbọ ewọ ni ṣinyọnnudo ota.  Na e ma jẹ dọ sunnu ni ṣinyọnnudo ota, na apajlẹ po gigo Jiwheyẹwhe tọn po wẹ ewọ yin wutu; ṣigba yọnnu wẹ gigo sunnu tọn.  Na sunnu ma wá sọn yọnnu mẹ, ṣigba yọnnu wẹ wá sọn sunnu mẹ;  podọ, humọ, sunnu ma yin didá na yọnnu wutu, ṣigba yọnnu na sunnu. 10  Enẹwutu wẹ e jẹ dọ yọnnu ni tindo ohia mẹmẹglọ tọn de to ota, na angẹli lẹ wutu. 11  Etomọṣo, to kọndopọ mẹ hẹ Oklunọ, yọnnu ma tin matin sunnu, mọjanwẹ sunnu ma tin matin yọnnu do niyẹn. 12  Na kẹdẹdile yọnnu wá sọn sunnu mẹ do, mọdopolọ wẹ sunnu wá gbọn yọnnu gblamẹ do; ṣigba Jiwheyẹwhe dè wẹ onú lẹpo wá sọn. 13  Mìlọsu lẹ ni lẹnpọn: Be e jẹ dọ yọnnu ni hodẹ̀ hlan Jiwheyẹwhe matin nuṣinyọndo ota ya? 14  Be mì ma ko plọn to jọwamọ-liho dọ eyin sunnu tindo oda gaa, winyan wẹ e yin na ẹn; 15  ṣigba eyin yọnnu tindo oda gaa, gigo wẹ e yin na ẹn ya? Na oda wẹ yin nina ẹn do otẹn tabla tọn mẹ. 16  Ṣigba, eyin e sọawuhia dọ mẹde to núdọ̀n nado hodo aṣa devo lẹ, míwlẹ ma tindo devo, mọjanwẹ agun Jiwheyẹwhe tọn lẹ lọsu ga. 17  Ṣigba, dile yẹn to anademẹ ehelẹ na, yẹn ma pà mì, na pipli dopọ mìtọn nọ hẹnnugble hú nado jla onú do. 18  Na jẹnukọn whẹ́, to whenue mì pli dopọ to agun de mẹ, yẹn sè dọ kinklan lẹ tin to ṣẹnṣẹn mìtọn; yẹn sọ yí i sè jẹ obá de mẹ. 19  Na hagbẹ klandovo lẹ dona tin to ṣẹnṣẹn mìtọn, na mẹhe yin alọkẹyi lẹ nido sọgan họnwun to ṣẹnṣẹn mìtọn ga. 20  Enẹwutu, to whenue mì pli dopọ do fidopo, e ma nọ yọnbasi nado dù tenu-núdùdù Oklunọ tọn to aliho he sọgbe mẹ. 21  Na to whenue mì to dùdù i, omẹ dopodopo nọ dù núdùdù whèjai tọn etọn titi jẹnukọn, bọ huvẹ nọ to mẹde hù ṣigba mẹdevo ko nọ nùmú. 22  E họnwun dọ mì tindo owhé mìtọn lẹ he gbè mì sọgan dù bo nù te, kavi e ma yin mọ wẹ? Kavi agun Jiwheyẹwhe tọn vlẹ wẹ mì te bo to winyando mẹhe ma tindo nude lẹ ya? Etẹwẹ yẹn na dọna mì? Be yẹn ni pà mì wẹ? Yẹn ma pà mì to ehe mẹ gba. 23  Na nuhe yẹn mọyi sọn Oklunọ lọ dè wẹ yẹn ko sọ ze do alọmẹ na mì, dọ to ozán he mẹ Oklunọ Jesu na yin didehia, e yí akla de 24  podọ to whenue e ko dopẹ́ godo, e wẹ́n ẹn bo dọmọ: “Ehe nọtena agbasa ṣie he yin nina do ota mìtọn mẹ. Mì nọ wà ehe to oflin ṣie mẹ.” 25  E wà nudopolọ gando kọfo lọ go ga, to whenue e ko dù tenu-núdùdù lọ, e dọmọ: “Kọfo ehe nọtena alẹnu yọyọ lọ to dodonu ohùn ṣie tọn ji. Mì nọ wà ehe, to whedepopenu he mì to nùnù in, to oflin ṣie mẹ.” 26  Na whedepopenu he mì to akla ehe dù bo to kọfo ehe nù, mì to okú Oklunọ tọn lá kaka e nado wá. 27  Enẹwutu, mẹdepope he nọ dù akla lọ kavi nọ nù kọfo Oklunọ tọn lọ to aliho agọ̀ mẹ na hùwhẹ gando agbasa po ohùn Oklunọ tọn po go. 28  Jẹnukọn whẹ́, mì gbọ ewọ ni gbeje ede pọ́n kitokito eyin e jẹ, podọ enẹgodo, mì gbọ ewọ ni dù akla lọ bo nù kọfo lọ. 29  Na ewọ he nọ dù bo nọ nù, dù bosọ nù whẹgbledo sọta ede eyin e ma yọ́n nuhe agbasa lọ nọtena. 30  Enẹwutu wẹ mẹsusu to mì mẹ yin madogánnọ podọ azìnzọ̀nnọ, bọ omẹ vude to amlọndọ to okú mẹ. 31  Ṣigba, eyin mí yọ́n mẹhe nkọ mílọsu lẹ yin, mí ma na yin whẹdana. 32  Etomọṣo, eyin mí yin whẹdana, Jehovah wẹ domẹplọnlọ mí go, na mí nikaa yin whẹgbledo hẹ aihọn lọ. 33  Enẹwutu, mẹmẹsunnu ṣie lẹ emi, to whenue mì pli dopọ nado dù i, mì nọ nọtepọn ode awetọ. 34  Eyin huvẹ to mẹde hù, mì gbọ ewọ ni dùnú to whégbè, bọ mì ma nado pli dopọ nado yin whẹdana. Ṣigba, whẹho he pò lẹ wẹ yẹn na didẹ to whenue yẹn na wá.

Nudọnamẹ Odò Tọn