Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 10:1-33

10  Todin, mẹmẹsunnu lẹ emi, yẹn ma jlo dọ mì ni to wunvi mẹ gba, dọ tọgbo mítọn lẹpo wẹ nọ aslọ lọ glọ podọ yemẹpo wẹ gbọn ohù lọ mẹ wayi  podọ yemẹpo wẹ yin bibaptizi to Mose mẹ gbọn aslọ lọ po ohù lọ po gblamẹ;  yemẹpo wẹ sọ dù núdùdù gbigbọmẹ tọn dopolọ  podọ yemẹpo wẹ nù núnùnù gbigbọmẹ tọn dopolọ. Na osé gángán gbigbọmẹ tọn he hodo yé lọ mẹ wẹ yé ko nọ nù sọn dai, podọ osé gángán enẹ nọtena Klisti.  Etomọṣo, Jiwheyẹwhe ma kẹalọyi suhugan yetọn, na yé yin hùhù to danfafa lọ ji.  Todin, onú ehelẹ lẹzun apajlẹ lẹ na mí, na míwlẹ ma nado nọ tindo ojlo to onú ylankan lẹ mẹ, yèdọ dile yewlẹ tindo ojlo to yé mẹ do.  Mọdopolọ, mì lẹzun boṣiọ-sẹ̀ntọ lẹ blo, dile delẹ to yé mẹ basi do; kẹdẹdile e ko yin kinkàndai do dọmọ: “Gbẹtọ lọ lẹ sinai nado dù bo nù, podọ yé fọ́n nado daihun.”  Mọdopolọ, mì gbọ mí ni ma nọ lọga blo, dile delẹ to yé mẹ lọga do, bọ fọtọ́n donu ko-nukunatọ̀n to yé mẹ jai to gbèdopo.  Mọdopolọ, mì gbọ mí ni ma whlé Jehovah pọ́n blo, dile delẹ to yé mẹ whlé e pọ́n do, bo dọ̀n gbọn odàn lẹ dali. 10  Mọdopolọ, mì yin nuhlundọtọ lẹ blo, kẹdẹdile delẹ to yé mẹ hlunnudọ do, bo dọ̀n gbọn mẹvasudotọ lọ dali. 11  Todin, onú ehelẹ jọ do yé go taidi apajlẹ lẹ, podọ yé yin kinkàndai taidi avase de na míwlẹ, mẹhe ji opodo titonu lẹ tọn ko wá. 12  Enẹwutu, mì gbọ ewọ he lẹndọ e to ote ni payi na e nikaa jai. 13  Whlepọn depope ma ko wá mì ji adavo dehe to paa mẹ na gbẹtọ lẹ. Ṣigba, nugbonọ wẹ Jiwheyẹwhe, podọ ewọ ma na dike mì ni yin whiwhlepọn zẹ̀ nuhe mì sọgan doakọnna go, ṣigba eyin whlepọn lọ wá, ewọ nasọ deali na mìwlẹ nido penugo nado doakọnna ẹn. 14  Enẹwutu, mẹyiwanna ṣie lẹ emi, mì họ̀nna boṣiọ-sinsẹ̀n. 15  Yẹn to hodọ taidi na mẹhe tindo wuntuntun lẹ; mì lẹn nuhe yẹn to didọ lẹ pọ́n na mìde. 16  Kọfo dona tọn he ji mí nọ hodẹ̀ do lọ, be e ma yin mahẹ tintindo to ohùn Klisti tọn mẹ wẹ e yin ya? Akla he mí nọ wẹ́n lọ, be e ma yin mahẹ tintindo to agbasa Klisti tọn mẹ wẹ e yin ya? 17  Na akla dopo wẹ tin, dile etlẹ yindọ míwlẹ sù, agbasa dopo wẹ mí yin, na mímẹpo wẹ to mahẹ tindo to akla dopo enẹ mẹ wutu. 18  Mì pọ́n mẹhe yin Islaeli to agbasa-liho lẹ: Be mẹhe dù to nuhe yin yíyí do sanvọ́ lọ lẹ mẹ ma yin mimátọ lẹ hẹ agbà lọ ya? 19  To whelọnu lo, etẹwẹ yẹn na dọ? Dọ nuhe yin yíyí do sanvọ́ hlan boṣiọ de yin nude, kavi dọ boṣiọ de yin nude wẹ ya? 20  Lala; ṣigba yẹn dọ dọ nuhe akọta lẹ yí do sanvọ́, aovi lẹ wẹ yé yí yé do sanvọ́ hlan, e ma yin hlan Jiwheyẹwhe gba; podọ yẹn ma jlo dọ mì ni lẹzun mimátọ lẹ hẹ aovi lẹ gba. 21  Mì ma sọgan to nùnù to kọfo Jehovah tọn mẹ podọ to kọfo aovi lẹ tọn mẹ gba; mì ma sọgan to mahẹ tindo to “tafo Jehovah tọn” ji podọ to tafo aovi lẹ tọn ji gba. 22  Kavi “mí to awuwhàn Jehovah tọn fọndote wẹ ya”? Mí ma dohuhlọn hú i, kavi mí wàmọ wẹ? 23  Onú lẹpo wẹ sọgbe hẹ osẹ́n; ṣigba e ma yin onú lẹpo wẹ tindo ale. Onú lẹpo wẹ sọgbe hẹ osẹ́n; ṣigba e ma yin onú lẹpo wẹ nọ jlọmẹdote. 24  Mì gbọ omẹ dopodopo ni nọ dín, e ma yin ale edetiti tọn gba, ṣigba dehe yin mẹdevo tọn. 25  Mì nọ dù nulẹpo he nọ yin sisà to olàn-himẹ lẹ bo ma nọ kàn nudepope biọ na ayihadawhẹnamẹnu mìtọn wutu blo; 26  na “Jehovah tọn wẹ aigba po nuhe gọ́ e ji lẹ po.” 27  Eyin mẹdepope to mayisenọ lẹ mẹ basi oylọna mì bọ e jlo mì nado yì, mì dù nudepope he yin zizedonukọnna mì bo ma nọ kàn nudepope biọ na ayihadawhẹnamẹnu mìtọn wutu blo. 28  Ṣigba, eyin mẹdepope dọna mì dọmọ: “Nuhe yin yíyí do sanvọ́ de wẹ ehe,” mì dù blo, na mẹhe hẹn ẹn zun yinyọnẹn na mì tọn wutu podọ na ayihadawhẹnamẹnu wutu. 29  E ma yin “ayihadawhẹnamẹnu” mìtọn titi hodọ wẹ yẹn te gba, ṣigba mẹdevo tọn. Na naegbọn mẹdekannujẹ ṣie dona yin whẹdana gbọn ayihadawhẹnamẹnu mẹdevo tọn dali? 30  Eyin yẹn to mahẹ tindo po pẹdido po, naegbọn yè nado to onú agọ̀ dọ gando go e na enẹ he yẹn to pẹdona lọ wutu? 31  Enẹwutu, vlavo mì to dùdù kavi to nùnù kavi nudevo depope he mì to wiwà, mì nọ wà onú lẹpo na gigo Jiwheyẹwhe tọn. 32  Mì lẹzun ahlidanu na Ju lẹ kavi Glẹkinu lẹ podọ na agun Jiwheyẹwhe tọn blo, 33  yèdọ dile yẹn nọ to homẹ mẹlẹpo tọn hẹn hùn to onú lẹpo mẹ do, bo ma nọ to ale dee titi tọn dín adavo mẹsusu tọn, na yé nido sọgan yin whinwhlẹngán.

Nudọnamẹ Odò Tọn