Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

1 Kọlintinu lẹ 1:1-31

1  Paulu, he yin yiylọ nado yin apọsteli Jesu Klisti tọn de gbọn ojlo Jiwheyẹwhe tọn dali, podọ Sọstene mẹmẹsunnu mítọn  to wekanhlan agun Jiwheyẹwhe tọn he to Kọlinti, hlan mìwlẹ mẹhe ko yin hinhẹn zun wiwe to kọndopọ mẹ hẹ Klisti Jesu, bo yin yiylọ nado yin omẹ wiwe lẹ, to pọmẹ hẹ mẹlẹpo he to oyín Oklunọ mítọn, Jesu Klisti, Oklunọ yetọn po míwlẹ tọn po ylọ to filẹpo:  Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn po Oklunọ Jesu Klisti po dè.  Yẹn nọ dopẹna Jiwheyẹwhe to whepoponu do ota mìtọn mẹ na nukundagbe majẹhẹ Jiwheyẹwhe tọn he yin nina mì to Klisti Jesu mẹ wutu;  dọ to onú lẹpo mẹ, mì ko yin hinhẹn zun adọkunnọ to ewọ mẹ, to nugopipe gigọ́ nado dọho mẹ podọ to oyọnẹn gigọ́ mẹ,  yèdọ dile kunnudide gando Klisti go ko yin hinhẹn lodo to ṣẹnṣẹn mìtọn do,  sọmọ bọ mìwlẹ ma do gboawupo to nunina depope mẹ, dile mì yí jejejininọ do to tenọpọn osọhia Oklunọ mítọn Jesu Klisti tọn.  Ewọ nasọ hẹn mì lodo kakajẹ opodo, na mì nikaa hùn dotẹnmẹ dote na whẹsadokọnamẹ depope to azán Oklunọ mítọn Jesu Klisti tọn gbè.  Nugbonọ wẹ Jiwheyẹwhe, mẹhe gblamẹ mìwlẹ yin yiylọ nado tindo mimá hẹ Visunnu etọn Jesu Klisti Oklunọ mítọn te. 10  Todin, mẹmẹsunnu lẹ emi, yẹn vẹ̀ mì gbọn oyín Oklunọ mítọn Jesu Klisti tọn gblamẹ dọ mìmẹpo ni nọ dọ onú dopolọ, podọ kinklan ni ma tin to ṣẹnṣẹn mìtọn blo, ṣigba dọ mì nido sọgan gbọn gbesisọ dali tin to kọndopọ mẹ to ayiha dopolọ mẹ podọ to aliho nulẹnpọn tọn dopolọ mẹ. 11  Mẹmẹsunnu lẹ emi, mẹdelẹ sọn whédo Kloe tọn mẹ ko hẹn zun yinyọnẹn na mi gando mì go dọ gbemanọpọ lẹ tin to ṣẹnṣẹn mìtọn. 12  Nuhe dọ yẹn te wẹ yindọ dopodopo mìtọn to didọ dọmọ: “Paulu tọn wẹ yẹn,” “Ṣigba Apolo tọn wẹ yẹn,” “Ṣigba Kefa tọn wẹ yẹn,” “Ṣigba Klisti tọn wẹ yẹn.” 13  Bọ Klisti yin mimá. Paulu ma yin whiwhè do núgo na mì, kavi e yin mọ wẹ? Kavi mì yin bibaptizi to oyín Paulu tọn mẹ wẹ? 14  Yẹn dopẹ́ dọ yẹn ma baptizi mẹdepope to mì mẹ adavo Klispu po Gaiu po, 15  na mẹdepope nikaa dọ dọ mì yin bibaptizi to oyín ṣie mẹ. 16  Mọwẹ, yẹn sọ baptizi whédo Stefana tọn ga. Na mẹhe pò lẹ tọn, yẹn ma yọnẹn eyin yẹn baptizi mẹdevo depope. 17  Na Klisti do mi hlan, e ma yin nado yì baptizi, ṣigba nado yì lá wẹndagbe lọ, e ma yin po hogbe nuyọnẹn tọn po gba, na yatin Klisti tọn ma nado yin hinhẹn zun ovọ́. 18  Na nulunu wẹ hodidọ gando yatin lọ go yin na mẹhe to dindọn lẹ, ṣigba huhlọn Jiwheyẹwhe tọn wẹ e yin na míwlẹ he to yinyin whinwhlẹngán. 19  Na e ko yin kinkàndai dọmọ: “Yẹn na hẹn nuyọnẹn nuyọnẹntọ lẹ tọn gble, podọ zinzin weyọnẹntọ lẹ tọn wẹ yẹn na sisẹ́ do apadopo.” 20  Fie wẹ nuyọnẹntọ lọ te? Fie wẹ wekantọ lọ te? Fie wẹ nudọ̀ntọ titonu ehe tọn lọ te? Be Jiwheyẹwhe ma ko hẹn nuyọnẹn aihọn tọn zun nulú ya? 21  Na to whenuena e yindọ, to nuyọnẹn Jiwheyẹwhe tọn mẹ, aihọn lọ ma ko gbọn nuyọnẹn etọn titi dali yọ́n Jiwheyẹwhe, Jiwheyẹwhe mọdọ e yọ́n nado whlẹn mẹhe to yiyise lẹ gán gbọn nulunu he yin yẹwheho etọn dọ lọ dali. 22  Na Ju lẹ to ohia lẹ biọ podọ Glẹkinu lẹ to nuyọnẹn dín; 23  ṣigba míwlẹ dọyẹwheho Klisti he yin whiwhè do núgo tọn, ehe yin ahlidanu de na Ju lẹ ṣigba nulunu na akọta lẹ; 24  etomọṣo, na mẹhe yin yiylọ lẹ, yèdọ Ju lẹ po Glẹkinu lẹ po, Klisti yin huhlọn Jiwheyẹwhe tọn podọ nuyọnẹn Jiwheyẹwhe tọn. 25  Na nuhe nọ yin pinpọnhlan di nulunu Jiwheyẹwhe tọn yọnnuin hú gbẹtọ lẹ, podọ nuhe nọ yin pinpọnhlan di madogánnọ Jiwheyẹwhe tọn dohuhlọn hú gbẹtọ lẹ. 26  Mẹmẹsunnu lẹ emi, na mìwlẹ mọdọ e ma yin susu mẹhe yin nuyọnẹntọ to agbasa-liho lẹ tọn wẹ yin yiylọ, e ma yin susu to huhlọnnọ lẹ mẹ, podọ e ma yin susu to mẹhe tọ́n sọn whẹndo he diyin lẹ mẹ; 27  ṣigba Jiwheyẹwhe de nuhe aihọn nọ pọnhlan di nulunu lẹ, na ewọ nido dowinyan nuyọnẹntọ lẹ; podọ Jiwheyẹwhe de nuhe aihọn nọ pọnhlan di madogánnọ lẹ, na ewọ nido dowinyan nuhe yin huhlọnnọ lẹ; 28  podọ Jiwheyẹwhe de nuhe aihọn nọ pọnhlan di nuhe ma yin nujọnu lẹ podọ nuhe nọ yin nukunpẹvi yí do pọ́n lẹ podọ nuhe ma tin lẹ, na ewọ nido sọgan hẹn nuhe tin lẹ zun ovọ́, 29  na agbasalan depope nikaa doawagun to Jiwheyẹwhe nukọn. 30  Ṣigba, na ewọ tọn wutu wẹ mìwlẹ do tin to kọndopọ mẹ hẹ Klisti Jesu, mẹhe ko lẹzun nuyọnẹn sọn Jiwheyẹwhe dè na mí, podọ dodowiwa, hinhẹn zun wiwe po tundote gbọn ofligọ dali po; 31  na e nido sọgan yin kẹdẹdile e ko yin kinkàndai do dọmọ: “Ewọ he to awagundo, gbọ e ni doawagun to Jehovah mẹ.”

Nudọnamẹ Odò Tọn