Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Eyin Họntọnmẹninọ Gble, Nawẹ N’Sọgan Yinuwa Gbọn?

Eyin Họntọnmẹninọ Gble, Nawẹ N’Sọgan Yinuwa Gbọn?

“To whenue yẹn po họntọn ṣie yọnnu po gble, wẹ Steven dọ “n’jẹflumẹ sinsinyẹn. N’ma ko sè vivẹ́ to numọtolanmẹ-liho sọmọ pọ́n to gbẹzan ṣie mẹ.”

Be nudopolọ ko jọ do hiẹ lọsu go pọ́n ya? Eyin mọ wẹ, hosọ ehe sọgan gọalọna we.

 Numọtolanmẹ he yè nọ tindo

Eyin họntọnmẹninọ gble, omẹ awe lẹ wẹ nọ sè vivẹ́.

  • Eyin hiẹ wẹ zọ́n bọ họntọnmẹninọ lọ do gble, vlavo a sọgan tindo numọtolanmẹ Jasmine tọn nkọ, mẹhe dọmọ: “N’mọdọ n’gbleawuna mẹhe n’yiwanna dai de, podọ enẹ dotukla ayihadawhẹnamẹnu ṣie sọmọ bọ n’masọ jlo na tindo numimọ mọnkọ gbede ba.”

  • Eyin e ma yin hiẹ wẹ zọ́n bọ họntọnmẹninọ lọ do gble, a sọgan mọ nuhewutu mẹdelẹ do nọ pọ́n ẹn hlan taidi mẹyiwanna de hinhẹnbu to okú mẹ. Jọja yọnnu de he nọ yin Janet dọmọ: “Na nugbo tọn, ojlẹ awubla sinsinyẹn tọn mẹ wẹ n’jugbọn, e nọ vẹawuna mi nado yise, n’nọ gblehomẹ, n’nọ tẹnpọn nado diọlinlẹnna ẹn, n’sọ nọ mọ apọ̀ bọ to godo mẹ, yèdọ to nudi owhe dopo godo, n’gbọ bo wá kẹalọyi domọ.”

Nuagokun lọ die: Eyin họntọnmẹninọ de gble, a sọgan jẹflumẹ bo gbọjọ. Dile Biblu-kantọ de dọ ẹ do, “Ayiha he jẹflumẹ nọ hẹnmẹ gbọjọ.”​—Howhinwhẹn lẹ 17:22.

 Nuhe a sọgan wà

  • Dọho hẹ mẹhe whèwhín de. Biblu dọmọ: “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.” (Howhinwhẹn lẹ 17:17) Numọtolanmẹ towe lẹ didọna mẹjitọ kavi họntọn he whèwhín de sọgan gọalọna we nado hẹn pọndohlan dagbe go.

    “Na osun susu, n’klan dee dovo bo ma dọ numọtolanmẹ ṣie lẹ na mẹdepope. Amọ́, họntọn lẹ sọgan gọalọ taun. Whenue n’wá dọ nue to ahun ji na mi lẹ na yé wẹ n’mọ dee mẹ vude.”​—Janet.

  • Plọnnu sọn nuhe jọ lọ mẹ. Howhinwhẹn Biblu tọn devo dọmọ: “Tindo nuyọnẹn, tindo nukunnumọjẹnumẹ.” (Howhinwhẹn lẹ 4:5) Numimọ ylankan he mí tindo lẹ sọgan plọn mí nususu gando gbẹtọ-yinyin mítọn go podọ lehe mí na yinuwa gbọn eyin mí jẹflumẹ.

    “To whenue họntọnmẹninọ mítọn gble, họntọn de kanse mi dọ, ‘Etẹwẹ a plọn sọn họntọnmẹninọ lọ mẹ, podọ nawẹ a gán yí nuhe a plọn lọ zan gbọn eyin a wá biọ họntọn mẹ hẹ mẹdevo?’ ”​—Steven.

  • Nọ hodẹ̀. Biblu dọmọ: “Ze agbàn pinpẹn towe dlan Jehovah ji, ewọ nasọ penukundo gowe.” (Salmu lẹ 55:22) Odẹ̀ sọgan gọalọna we nado duto flumẹjijẹ towe ji bo tindo pọndohlan dagbe gando họntọnmẹninọ he gble lọ go.

    “Nọ hodẹ̀ whẹwhẹ. Jehovah nọ mọ vivẹ́ he sè a te bo nọ mọnukunnujẹ ninọmẹ towe mẹ hugan hiẹ lọsu.”​—Marcia.

  • Nọ gọalọna mẹdevo lẹ. Biblu na ayinamẹ ma nado “nọ ze ayidonugo do ale mẹdetiti tọn [towe] lẹ kẹdẹ ji, ṣigba do ale mẹdevo lẹ tọn ji ga.” (Filipinu lẹ 2:4) Lehe a to dewe zejo nado gọalọna mẹdevo lẹ do, mọ wẹ a na penugo nado yawu gọjẹ gángán do.

    “Eyin họntọnmẹninọ de gble, e nọ di dọ ogbẹ̀ vọ̀ wẹ nkọ, podọ e nọ vẹ́ hugan awufiẹsa agbasa tọn. N’wá doayi e go dọ e ma nọ nọ̀ mọ sọyi. Dile ojlẹ to yìyì, mọ wẹ awufiẹsa ṣie wá depò do.”​—Evelyn.