Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Nulẹ Yin Didá Wẹ Ya Kavi Yé Wá Gbẹ̀mẹ Na Yede?—Adà 1: Naegbọn N’Nado Yise to Jiwheyẹwhe Mẹ?

Nulẹ Yin Didá Wẹ Ya Kavi Yé Wá Gbẹ̀mẹ Na Yede?—Adà 1: Naegbọn N’Nado Yise to Jiwheyẹwhe Mẹ?

 Nulẹ yin didá wẹ ya kavi yé wá gbẹ̀mẹ na yede?

Be a yise dọ Jiwheyẹwhe wẹ dá nulẹpo ya? Eyin mọ wẹ, yọnẹn dọ e ma yin hiẹ kẹdẹ; jọja (gọna mẹho) susu devo lẹ yí enẹ sè ga. Ṣigba, mẹdevo lẹ nọ dọ dọ ogbẹ̀ po wẹkẹ lọ blebu po wá aimẹ na yede wẹ—bọ “Nupojipetọ” de ma tin he dá yé.

Be a yọnẹn ya? Mẹhe tindo nuyise voovo awe ehelẹ nọ saba dọ nuyise yetọn poun wẹ, amọ́ yelọsu ma tlẹ nọ yọ́n nuhewutu yé do yí onú mọnkọtọn sè taun.

  • Mẹdelẹ yise dọ nulẹ yin didá, na nuhe yé plọn to ṣọṣi ján niyẹn.

  • Mẹsusu devo lẹ yise dọ nulẹ wá gbẹ̀mẹ na yede, na nuhe yé plọn to wehọmẹ ján niyẹn.

Hosọ debọdo-dego ehelẹ na gọalọna we nado kudo nuyise he a tindo dọ nulẹ yin didá ji dogọ, bo basi zẹẹmẹ etọn na mẹdevo lẹ. Amọ́ jẹnukọn whẹ́, a dona kàn kanbiọ tangan de sè dewe:

 Naegbọn n’do yise to Jiwheyẹwhe mẹ?

Etẹwutu kanbiọ ehe do yin nujọnu? Na Biblu na we tuli nado nọ yí “huhlọn nulẹnpọn tọn” towe zan wutu wẹ. (Lomunu lẹ 12:1) Enẹ zẹẹmẹdo dọ yise towe to Jiwheyẹwhe mẹ ma dona sinai poun

  • do numọtolanmẹ ji (N’nọ mọdọ mẹde dona tin he dohuhlọn hugan to ogbẹ̀ lọ mẹ)

  • do nuyiwadomẹji mẹdevo lẹ tọn ji (Nuhe mẹlẹ yise to lẹdo ṣie mẹ niyẹn)

  • do kọgbidinamẹ mẹdevo lẹ tọn ji (Mẹjitọ ṣie lẹ wẹ hẹn mi nado yise to Jiwheyẹwhe mẹ—bọ n’ma gán gbẹ́)

Kakatimọ, hiẹ lọsu titi wẹ dona kudeji dọ Jiwheyẹwhe tin, podọ a dona tindo whẹwhinwhẹ́n nujọnu tọn lẹ he wutu a do yí enẹ sè.

Todin, etẹwẹ hẹn we kudeji dọ Jiwheyẹwhe tin? Azọ́nwema lọ “Naegbọn N’Yise dọ Jiwheyẹwhe Tin?” na gọalọna we nado hẹn yise towe lodo. Dogbigbapọnna gblọndo he jọja devo lẹ na do kanbiọ lọ ji sọgan sọ hẹn ale wá na we.

“Eyin n’to klasi bọ mẹplọntọ mítọn to zẹẹmẹ basi do lehe agbasa mítọn nọ yinuwa do ji, e nọ họnwun na mi dọ Jiwheyẹwhe tin. Adà agbasa mítọn tọn dopodopo wẹ do azọ́n he e nọ wà, kakajẹ azọ́n pẹvi pete lẹ ji, podọ mí ma tlẹ nọ yọ́n whenue yé nọ to azọ́n ehelẹ wà. Agbasa gbẹtọ tọn gẹdẹ taun!”—Teresa.

“Eyin n’mọ petlezìn daho gblẹlẹ de, bato blibata de, kavi mọto de, n’nọ kanse dee dọ, ‘Mẹnu wẹ basi ehe?’ Gbẹtọ nuyọnẹntọ de janwẹ sọgan basi mọto de, na onú flinflin he to mọto go lẹ ma whè, popolẹpo wẹ ka dona wazọ́n ganji whẹpo mọto lọ nido yì. Eyin e ka yindọ mẹde wẹ dona basi mọto, be nudopolọ wẹ na gbẹtọ.”—Richard.

“To whenue a wá mọnukunnujẹemẹ dọ owhe kanweko susu lẹ wẹ gbẹtọ nuyọnẹntọ daho hugan lẹ yizan nado mọdona adà pẹvi pete wẹkẹ lọ tọn de, e na họnwun na we dọ nulunu daho wẹ e yin nado lẹndọ wẹkẹ lọ lọsu wá aimẹ na ede wẹ, bo ma yin didá gbọn omẹ nuyọnẹntọ de dali!”—Karen.

“Lehe n’to nususu plọn gando lẹnunnuyọnẹn go do, mọ wẹ e to wunhọ́n na mi dogọ do dọ nulẹ ma sọgan ko wá aimẹ na yede. Di apajlẹ, n’lẹnnupọndo lehe nuhe to wẹkẹ lọ mẹ lẹ sọgbe bo tin to titoji do po lehe gbẹtọ yin didá to aliho vonọtaun mẹ do po ji, gọna ojlo mítọn nado yọ́n mẹhe mí yin, fie mí wá sọn, po nuhewutu mí do tin tofi po. Mẹhe yise dọ nulẹ wá gbẹ̀mẹ na yede lẹ nọ ze nulẹnpọn yetọn sinai do gbẹzan kanlin lẹ tọn ji nado tẹnpọn bo basi zẹẹmẹ onú ehelẹ tọn, amọ́ yé ma ko penugo gbede nado dọ nuhewutu gbẹtọvi lẹ do gbọnvo sọmọ. N’lẹndọ, e nọ biọ ‘yise’ susu nado kẹalọyi dọ nulẹ wá gbẹ̀mẹ na yede hugan nado kẹalọyi dọ Mẹdatọ de tin.”—Anthony.

 Lehe n’na basi zẹẹmẹ nuyise ṣie tọn do

Nawẹ a na yinuwa do eyin klasigbẹ́ towe lẹ nọ ṣàn we kò dọ nuhe a ma tlẹ sọgan mọ de mẹ wẹ a tindo yise te? Bọ eyin yé ka dọ dọ dodinnanu lẹnunnuyọnẹn tọn lẹ ko “dohia” dọ nulẹ wá aimẹ na yede wẹ lo?

Tintan, kudo nuyise towe ji. Ma kuwinyan kavi dibu blo. (Lomunu lẹ 1:16) To popolẹpo mẹ, nọ flindọ:

  1. E ma yin hiẹ kẹdẹ wẹ yise dọ Jiwheyẹwhe tin; mẹsusu devo lẹ yí enẹ sè ga. Etlẹ yin wesetọ gboogbo he tindo nuyọnẹn taun lẹ. Di apajlẹ, lẹnunnuyọnẹntọ delẹ yise dọ Jiwheyẹwhe tin.

  2. To whedelẹnu, eyin gbẹtọ lẹ dọ dọ emi ma yise to Jiwheyẹwhe mẹ, nuhe dọ yé te taun wẹ yindọ yé ma yọ́n mẹhe nkọ ewọ yin. Yé ma nọ na kunnudenu lẹ nado nọgodona pọndohlan yetọn, kakatimọ yé nọ fọ́n kanbiọ delẹ dote taidi, “Eyin Jiwheyẹwhe tin nugbo, naegbọn e dike bọ yajiji tin?” Nado dọ hójọhó, yé nọ jo whẹho nujọnu tọn lọ do bo nọ wá tẹdo whẹho numọtolanmẹ tọn de go.

  3. Gbẹtọvi lẹ tindo “nuhudo gbigbọmẹ tọn” de. (Matiu 5:3) Ehe bẹ nuhudo lọ nado tindo yise to Jiwheyẹwhe mẹ hẹn. Eyin mẹde dọ dọ Jiwheyẹwhe ma tin, mẹlọ lọsu wẹ dona basi zẹẹmẹ nuhe hẹn ẹn wá tadona enẹ kọ̀n tọn; e ma yin hiẹ wẹ na dọhodo onù na ẹn.Lomunu lẹ 1:18-20.

  4. E sọgbe hẹ lẹnpọn dagbe nado yise dọ Jiwheyẹwhe tin. Nuyise mọnkọtọn tin to kọndopọ mẹ hẹ nugbo he họnwun lọ dọ ogbẹ̀ ma sọgan wá aimẹ na ede. Kunnudenu depope ma tin he sọgan nọgodona linlẹn lọ dọ ogbẹ̀ nọ tata poun bo wá aimẹ na ede.

Eyin mọ wẹ, etẹwẹ a sọgan dọ to whenue mẹde kanhose we gando yise towe to Jiwheyẹwhe mẹ go? Lẹnnupọndo nuhe a sọgan dọ delẹ ji.

Eyin mẹde dọmọ: “Mẹhe ma yì wehọmẹ pọ́n lẹ janwẹ gán yise to Jiwheyẹwhe mẹ.”

A sọgan gblọn dọ: “A lẹnmọ nugbo ya? Yẹn ma lẹnmọ. Nado dọ hójọhó, to whenue yè kanhose lẹnunnuyọnẹn-plọnmẹtọ 1 600 sọn wehọmẹ alavọ tọn nukundeji voovo lẹ mẹ, mado atọ̀n yetọn wẹ yigbe dọ emi yise to Jiwheyẹwhe mẹ. * Be a na ylọ mẹplọntọ enẹlẹ dọ agblinọ na yé tindo yise to Jiwheyẹwhe mẹ wutu wẹ ya?”

Eyin mẹde dọ: “Eyin Jiwheyẹwhe tin, naegbọn yajiji do gọ́ ogbẹ̀ lọ mẹ sọmọ?”

A sọgan gblọn dọ: “Eyin n’mọnukunnujẹ ohó towe mẹ, vlavo nuhe dọ a te wẹ yindọ, a ma yọ́n nuhe Jiwheyẹwhe to wiwà gando whẹho lọ go, kavi e taidi dọ e ma to nude yiwà. E ma yin mọ wẹ ya? [Jotẹnna gblọndo.] N’ko mọ gblọndo he sọgbe lọ gando nuhewutu yajiji do gọ́ ogbẹ̀ lọ mẹ sọmọ go. Amọ́ nado mọnukunnujẹemẹ, e nọ biọ dọ yè ni gbadopọnna nuplọnmẹ Biblu tọn voovo delẹ. Be e na jlo we nado gbadopọnna delẹ ya?”

To adà hosọ ehe tọn he na bọdego mẹ, mí na mọ nuhewutu nuplọnmẹ lọ dọ nulẹ wá aimẹ na yede ma sọgan basi zẹẹmẹ lehe mí wá gbẹ̀mẹ do tọn to gigọ́ mẹ.

^ huk. 32 Asisa Nudọnamẹ Tọn: Owe lọ Social Science Research Council, “Religion and Spirituality Among University Scientists,” gbọn Elaine Howard Ecklund dali, 5 février 2007.

Sọ Pọ́n