Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Be n’ko wleawufo nado biọ họntọn mẹ ya?

Be n’ko wleawufo nado biọ họntọn mẹ ya?

 Etẹwẹ họntọn mẹ bibiọ zẹẹmẹdo?

  • A nọ saba tọ́n hẹ mẹhe yin vijinu awetọnọ de. Be a ko to họntọn mẹ biọ niyẹn ya?

  • Hiẹ po omẹ vijinu awetọnọ de po tindo ojlo na ode awetọ. To azán dopo ji, mì nọ do wekanhlanmẹ susu hlan mìde kavi nọ dọhodopọ na whenu susu to alokan ji. Be a ko to họntọn mẹ biọ niyẹn ya?

  • Whedepopenu he a tin to hagbẹ lẹ mẹ, omẹ vijinu awetọnọ dopo gee de janwẹ a nọ nọpọ́ hẹ hugan. Be a ko to họntọn mẹ biọ niyẹn ya?

E yọnbasi dọ e ma na vẹawuna we nado na gblọndo kanbiọ tintan tọn. Ṣigba, vlavo e sọgan biọ dọ a ni lẹnnupọn taun whẹpo do na gblọndo kanbiọ awetọ po atọ̀ntọ po tọn. Etẹwẹ họntọn mẹ bibiọ zẹẹmẹdo na taun tọn?

Na taun tọn, họntọn mẹ bibiọ zẹẹmẹdo nuwiwa pọmẹ tọn depope he mẹ a nọ tindo numọtolanmẹ owanyi tọn na omẹ tangan de te bo nọ na ẹn ayidonugo vonọtaun bọ mẹlọ lọsu nọ ze ayidonugo etọn lẹpo do jiwe.

Enẹwutu gblọndo kanbiọ atọ̀n lọ lẹpo tọn wẹ mọwẹ. Eyin hiẹ po họntọn towe vijinu awetọnọ de po sin onú nọ jẹ ode awetọ tọn ji to aliho vonọtaun mẹ bọ mì sọ nọ tindo hodọdopọ whẹwhẹ vlavo to alokan ji kavi mì nọ yì mọ mìde, to gbangba kavi to nuglọ, be mì ko biọ họntọn mẹ niyẹn.

 Lẹndai tẹ wutu wẹ mẹde do nọ biọ họntọn mẹ?

Họntọn mẹ bibiọ tin na lẹndai nujọnu tọn dopo—enẹ wẹ na sunnu de po yọnnu de po nido yọnẹn taun eyin yé jlo na dà yede kavi lala.

Na nugbo tọn, delẹ to hagbẹ towe lẹ mẹ sọgan nọ yí nukunpẹvi do pọ́n họntọnmẹninọ. Vlavo yé ma to linlẹn nado wlealọ hẹ họntọn yetọn vijinu awetọnọ de, amọ́ yé nọ jlo poun nado nọpọ́ hẹ ẹ. Delẹ to yé mẹ tlẹ sọgan nọ pọ́n họntọn vijinu awetọnọ lọ hlan taidi ajọ̀ de kavi aṣọ́donu de poun he yé gán yí do doawagun to gbẹtọ lẹ nukọn.

Ṣigba, haṣinṣan mọnkọtọn lẹ ma nọ saba nọ aimẹ dẹn. Viyọnnu de he nọ yin Heather dọmọ: “Jọja he nọ biọ họntọn mẹ lẹ nọ saba wá jo yede do to osẹ dopo kavi awe godo. Yé nọ pọ́n họntọnmẹninọ hlan taidi pọninọ ojlẹ kleun tọn de—ehe to linlẹn de mẹ nọ dekọtọn do gbẹdai mẹ na yé kakati nido yin alọwle.”

Na nugbo tọn, eyin a biọ họntọn mẹ hẹ mẹde, a nọ yinuwa do numọtolanmẹ mẹlọ tọn ji. Enẹwutu, nọ hẹn ẹn diun dọ a ma to linlẹn nado tafu mẹlọ.Luku 6:31.

Eyin a biọ họntọn mẹ hẹ mẹde bọ linlẹn towe ma yin nado wá wlealọ hẹ mẹlọ, be a to nuyiwa taidi yọpọvu he yí aihundanu yọyọ de do to aihunda bo wá dovọ́na ẹn to godo mẹ

Lẹnnupọndo ehe ji: Be e na vivi na we eyin mẹde yí numọtolanmẹ towe lẹ do daihun taidi aihundanu yọpọvu lẹ tọn de—he yè nọ dọ̀n pé do deayidai na ojlẹ kleun de bo nọ wá dovọ́na ya? Eyin mọ wẹ, bo ma wàmọ na mẹdevo blo! Biblu dọ dọ owanyi “ma nọ wanu jẹagọ.”—1 Kọlintinu lẹ 13:4, 5.

Jọja de he nọ yin Chelsea dọmọ: “Ayiha ṣie nọ dọna mi to whedelẹnu dọ ojlẹ ayidedai tọn de poun wẹ họntọnmẹninọ yin, amọ́ e ma nọ saba yinmọ eyin mẹdopo ylọ haṣinṣan lọ dọ nujọnu bọ omẹ awetọ ma wàmọ.”

Ayinamẹ: Nado wleawudaina dewe na họntọn mẹ bibiọ po alọwle po, hia 2 Pita 1:5-7 bo doayi jẹhẹnu he a gbẹ́ dona wleawuna de go. To osun dopodopo gblamẹ, nọ pọ́n obá he mẹ a ko plọnnu gando jẹhẹnu enẹ go jẹ, gọna lehe a ko basi vọjlado to adà enẹ mẹ do.

 Be n’ko whẹ́n jẹ obá lọ mẹ nado biọ họntọn mẹ ya?

  •  Owhe nẹmu wẹ a lẹndọ jọja de dona do whẹpo do sọgan biọ họntọn mẹ?

  •  Todin, kàn kanbiọ dopolọ sè otọ́ towe kavi onọ̀ towe.

E yọnbasi taun dọ, owhe he a dọ ni gbọnvona dehe mẹjitọ towe lẹ dọ. E sọgan sọ nọma yinmọ! Vlavo a na ko yin dopo to jọja susu he nọ yí nuyọnẹn do whesọ lẹ mẹ, bo ma nọ biọ họntọn mẹ kakajẹ whenue yé whẹ́n ganji bo pé yede ji whẹ́.

Nuhe Danielle, yèdọ viyọnnu owhe 17 mẹvi de magbe nado wà niyẹn. E dọmọ: “Eyin n’lẹnnupọn yigodo hlan owhe awe die, nuhe n’na ko donukun sọn mẹhe n’gán wá dà de si na gbọnvo taun na nuhe n’gán donukun sọn e si to egbé. Podọ nado dọ hójọhó, etlẹ yin to alọnu din n’mọdọ n’ma ko wleawufo nado basi nudide mọnkọtọn. Eyin n’ko wá mọdọ gbẹtọ-yinyin ṣie ma diọ to owhe awe gblamẹ, whenẹnu n’gán lẹnnupọndo họntọn mẹ bibiọ ji.”

Whẹwhinwhẹ́n devo tin he wutu e do yin nuyọnẹnnu nado whesọ. Biblu zan hodidọ lọ “owhe aflanmẹ tọn” nado dlẹnalọdo ojlẹ he mẹ ojlo zanhẹmẹ tọn po numọtolanmẹ owanyi tọn po nọ jẹ nuyiwa ji sinsinyẹn do mẹde ji te whla tintan. (1 Kọlintinu lẹ 7:36) Haṣinṣan pẹkipẹki de tintindo hẹ omẹ vijinu awetọnọ tangan de to whenue yè gbẹ́ to owhe aflanmẹ tọn mẹ sọgan fọ́n ojlo zogbe dote na mẹde bo hẹn ẹn biọ walọ gblezọn de mẹ.

Na nugbo tọn, hagbẹ towe lẹ sọgan nọ nọma pọ́n enẹ di nujọnu. Susu yetọn lẹ sọgan nọ to jejeji nado tindo zanhẹmẹ bo pọ́n lehe e nọ nọ̀. Ṣigba na hiẹ tọn, a sọgan lẹnnupọn zẹ̀ fie yewlẹ to numọhlan go—podọ nuhe a dona wà lọ niyẹn! (Lomunu lẹ 12:2) To popolẹpo mẹ, Biblu na tuli mí nado “họ̀nna fẹnnuwiwa zanhẹmẹ tọn.” (1 Kọlintinu lẹ 6:18) Eyin a whesọ kakajẹ whenue a zẹ̀ owhe aflanmẹ tọn go, a na penugo nado “gbẹ́ nuhe nọ gbleawunamẹ lẹ dai.”Yẹwhehodọtọ 11:10.

 Naegbọn n’dona whesọ whẹpo do biọ họntọn mẹ?

Eyin yè to mizọnmizọn do na we nado biọ họntọn mẹ bọ a ma ka ko wleawufo, e na taidi dọ a ṣẹṣẹ jẹ weplọn ji na tẹnpọn de, bọ yè ko jẹ hinhẹn we ji po huhlọn po tlolo nado wá tindo mahẹ to adà godo tọn tẹnpọn lọ tọn mẹ. Nado dọ hójọhó, e ma na sọgbe paali eyin yè wàmọ hẹ we! Na yè dona na whenu susu a nido plọnnu ganji bo mọnukunnujẹ nuhahun voovo he a gán pehẹ to tẹnpọn lọ whenu lẹ mẹ.

Nudopolọ wẹ gando họntọn mẹ bibiọ go.

Họntọn mẹ bibiọ ma yin onú vlẹkẹsẹ de. Enẹwutu whẹpo a nido jẹ nukun vonọtaun yí do pọ́n omẹ vijinu awetọnọ de ji, a dona yí whenu susu do plọnnu do “hosọ” titengbe de ji, enẹ wẹ lehe yè nọ wleawuna haṣinṣan họntọnjiji tọn lẹ do.

To nukọn mẹ, whenue a na wá mọ mẹhe sọgbe hẹ we, a na penugo nado tindo haṣinṣan he lodo taun de hẹ ẹ. Humọ, họntọn dagbe lẹ wẹ nọ wá lẹzun alọwlemẹ dagbe lẹ.

Mẹhe dọ a ni lawu bo mẹ́ ma to agbasa towe na dù, mọdopolọ ayinamẹ lọ ma nado sún jojo biọ họntọn mẹ, ma yin nado hò mẹdekannujẹ towe yí sọn asi we. Kakatimọ, e na zọ́n bọ a na tindo mẹdekannujẹ yinukọn dogọ nado ‘jaya to jọja whenu.’ (Yẹwhehodọtọ 11:9) A nasọ mọ whenu susu nado wleawudaina dewe, gbọn gbẹtọ-yinyin towe hinhẹn pọnte dogọ, podọ humọ nukọnyiyi to gbigbọ-liho dali.Avigbè Jelemia Tọn 3:27.

To ojlẹ dopolọ mẹ, a sọgan duvivi gbẹdido hẹ omẹ vijinu awetọnọ depope tọn. Etẹwẹ a gán wà nado duvivi ojlẹ enẹlẹ tọn ganji? Nọ yí whenu zan dopọ hẹ pipli he bẹ sunnu po yọnnu po hẹn lẹ. Viyọnnu de he nọ yin Tammy dọmọ: “N’lẹndọ e nọ vivi taun nado nọpọ́ domọ. E nọ yọ́n hugan eyin yè do họntọn susu.” Monica yigbe dọmọ: “Linlẹn dagbe wẹ e yin nado nọ nọ̀ hagbẹ lẹ ṣẹnṣẹn, na enẹ nọ zọ́n bọ yè nọ dogbẹ́ hẹ mẹhe tindo gbẹtọ-yinyin voovo lẹ.”

To vogbingbọn mẹ, eyin a yawu jẹ nukun vonọtaun yí do pọ́n omẹ vijinu awetọnọ dopo ji, a ma nasọ vò sọn taká mẹ di dai tọn ba. Enẹwutu yiagbọji. Yí ojlẹ gbẹzan towe tọn ehe zan nado plọn lehe a gán wleawuna haṣinṣan de bo hẹn ẹn dote do. To nukọn mẹ, eyin a de nado biọ họntọn mẹ, a na ko penugo nado yọ́n dewe ganji podọ nuhe a na donukun sọn alọwlemẹ sọgodo tọn towe si na ko họnwun na we.