Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Be N’Dona Payi Nuhiho He N’Nọ Dotó lẹ Go Wẹ Ya?

Be N’Dona Payi Nuhiho He N’Nọ Dotó lẹ Go Wẹ Ya?

“Eyin n’fọ́n afọnnu tlolo, n’nọ tá nuhiho de janwẹ. Eyin n’biọ mọto mẹ, n’nọ tá nuhiho de. Eyin n’to whégbè bo to gbigbọjẹ, to họmẹ sẹdo kavi tlẹ to wehia, nuhiho mẹ ján n’nọ te. Whelẹponu wẹ n’nọ to ohàn sè.”—Carla.

Be hiẹ lọsu yiwanna nuhiho di Carla wẹ ya? Eyin mọwẹ, hosọ ehe na gọalọna we nado yọ́n lehe a sọgan duvivi ale he nuhiho nọ hẹnwa lẹ tọn, bo dapana owù he e bẹhẹn lẹ do podọ lehe a na nọ de nuhiho towe lẹ po nuyọnẹn po do.

 Ale lẹ

Nuhiho sọgan yin yiyijlẹdo núdùdù go. Nado mọaleyi sọn e mẹ, a dona de dehe sọgbe lọ jẹ obá he sọgbe mẹ. Lẹnnupọndo nuhe bọdego lẹ ji:

  • Nuhiho sọgan hẹn we tindo numọtolanmẹ dagbe.

    “Eyin awú ma yá mi to azán de ji, n’nọ tá nuhiho he n’yiwanna de, bo nọ mọ dee mẹ to afọdopolọji.”—Mark.

  • Nuhiho sọgan hẹn we flin nudelẹ.

    “Ohàn delẹ tin he nọ saba hẹn mi flin ojlẹ ayidego tọn de, bọ homẹ ṣie nọ hùn to whedepopenu he n’sè ohàn mọnkọ.”—Sheila.

  • Nuhiho sọgan yidogọna pọninọ.

    “N’yì plidopọ akọjọpli tọn Kunnudetọ Jehovah tọn lẹ tọn de, bọ to whenue mẹhe wá sọn tògodo lẹpo to ohàn godo tọn lọ ji, avi sọ mi. Mí ma nọ do ogbè dopolọ lẹ, etomọṣo hànjiji lọ kọ̀n mí dopọ.”—Tammy.

  • Nuhiho sọgan gọalọna we nado wleawuna jijọ dagbe lẹ.

    “Whenue a to pinplọn nado yọ́n hànjinu de hò, a na plọn nado nọ domẹplọnlọ dewe go bo nọ fahomẹ. E ma yin nude he nọ má mẹ to zánto dopo mẹ. Onú dopo gee he nọ gọalọnamẹ nado yọ́n hànjinu lọ hò ganji wẹ nado nọ hò e whẹwhẹ.”—Anna.

Be a yọnẹn ya? Owe Psalm tọn he yin owe he klohugan to Biblu mẹ bẹ ohàn voovo 150 hẹn.

Nọ de ohàn he a na sè lẹ dile a nọ de núdùdù he a na dù do

 Owù lẹ

Nuhiho delẹ nọ taidi núdùdù he yin hinhẹnflu bo sọgan doazọ̀nmẹ. Pọ́n nuhewutu e do yinmọ.

  • Ohàn susu nọ bẹ hogbe gblewa tọn lẹ hẹn.

    “E taidi dọ ohàn he dọhodo fẹnnuwiwa ji lẹ wẹ gbẹtọ lẹ nọ yiwanna hugan. Yé ma tlẹ sọ nọ tẹnpọn nado ṣinyọnnudo e yẹẹ de ba.”—Hannah.

    Biblu dọmọ: “Mì gbọ galilọ po mawé wunmẹ lẹpo po kavi nukunkẹn ni ma tlẹ yin nùdego to ṣẹnṣẹn mìtọn blo.” (Efesunu lẹ 5:3) Kanse dewe dọ, ‘Be nuhiho he n’nọ dotó lẹ nọ hẹn mi nado yinuwa jẹagọdo ayinamẹ ehe wẹ ya?’

  • Nuhiho delẹ sọgan hẹn we biọ awubla mẹ.

    “To whedelẹnu, n’nọ ba amlọn pò to zánmẹ dile n’to ohàn he nọ hẹn awubla-nú po nuhe gán hẹnmẹ jẹflumẹ lẹ po wá ayiha mẹ na mi lẹ dotó. Ohàn awubla tọn sọgan hẹn linlẹn apọṣimẹ tọn lẹ wá ayiha mẹ na mi.”—Tammy.

    Biblu dọmọ: “Hú whiwhla lẹpo, yí otù [kavi ahun] towe whlá.” (Howhinwhẹn lẹ 4:23) Kanse dewe dọ, ‘Be nuhiho he n’nọ dotó lẹ nọ whàn mi nado nọ lẹnnupọndo nuylankan lẹ ji wẹ ya?’

  • Nuhiho delẹ sọgan fọ́n homẹgble dote.

    “Nuhiho he nọ fọ́n homẹgble, numọtolanmẹ nuvọ́nọ-yinyin tọn, po wangbẹna po dote lẹ nọ yinuwado ji e to mayọnẹn mẹ. N’doayi e go dọ whedepopenu he n’dotó ohàn mọnkọtọn de fó, numọtolanmẹ ṣie nọ diọ. Whẹndo ṣie lọsu doayi e go.”—John.

    Biblu dọmọ: “Mì gbẹ́ onú ehe lẹpo dai mlẹnmlẹn, yèdọ homẹgble, adi, ylanwiwa gọna mẹzunzun podọ mì de ohó gbigble sẹ̀ sọn onù mìtọn mẹ.” (Kọlọsinu lẹ 3:8) Kanse dewe dọ, ‘Be nuhiho he n’nọ dotó lẹ nọ zọ́n bọ n’nọ yinuwa hẹ mẹdevo lẹ po kanyinylan po, vlavo bo ma tlẹ nọ hò numọtolanmẹ yetọn pọ́n wẹ ya?’

Etẹwẹ yin nuagokun lọ? Nọ ṣinyan ohàn he a na nọ dotó lẹ. Nuhe viyọnnu aflanmẹ de he nọ yin Julie nọ tẹnpọn nado wà niyẹn. E dọmọ: “Sọn ojlẹ de mẹ jẹ devo mẹ, n’nọ gbeje ohàn he to asi e lẹ pọ́n bo nọ súnsún dehe ma sọgbe lẹ sẹ̀. E ma nọ bọawu to whelẹponu, amọ́ n’yọnẹn dọ nuhe sọgbe lọ wà wẹ n’te.”

Jọja yọnnu de he nọ yin Tara to tintẹnpọn nado wà nudopolọ ga. E dọmọ: “To whedelẹnu, nuhiho ohàn he to yinyin hihò to ladio mẹ de tọn nọ dọ̀n mi taun, amọ́ eyin n’wá dotó nuhe hàngbe lọ lẹ to didọ, e nọ họnwun na mi dọ n’dona tá fidevo. Mọwiwà nọ taidi vivẹnudido nado jo atin-sinsẹ́n he vivi taun de do to whenue yé kán ẹn dù whladopo poun godo! Amọ́, eyin n’penugo bo gbẹ́ ma nado sè ohàn he dọhodo zanhẹmẹ ji de, e na bọawu dọ n’ma gbẹ́ ma nado tindo kọndopọ zanhẹmẹ tọn jẹnukọnna alọwle. N’ma jlo na yí nukunpẹvi do pọ́n nuyiwadomẹji he ohàn he n’nọ dotó lẹ sọgan tindo do ji e.”

 

Sọ Pọ́n

AZỌ́NWEMA LẸ NA JỌJA LẸ

Hodọdopọ de Gando Nuhiho Go

Mọyi