Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Naegbọn Mẹjitọ Ṣie lẹ Ma Nọ Dike Ma Deayidai Gbede?

Naegbọn Mẹjitọ Ṣie lẹ Ma Nọ Dike Ma Deayidai Gbede?

Mí ni dọ dọ a to ninọmẹ ehe mẹ:

A jlo na yì nuwiwa de tẹnmẹ, amọ́ a ma yọnẹn eyin mẹjitọ towe lẹ na nagbè we. Etẹ a na wà?

  1.  N’MA NA BIỌGBÈ—N’NA YÌ POUN

  2.  N’MA NA BIỌGBÈ—N’NA GBỌ BO HÒNÚPLA

  3.  N’NA BIỌGBÈ—BO PỌ́N

 1. N’MA NA BIỌGBÈ—N’NA YÌ POUN

Nuhewutu a gán lẹnmọ: A jlo na hùji na họntọn towe lẹ dọ a tindo mẹdekannujẹ. A nọ mọdọ emi yọnnuin hugan mẹjitọ emitọn lẹ, kavi a ma nọ na sisi pọndohlan yetọn.—Howhinwhẹn lẹ 14:18.

Kọdetọn lẹ: A gán hùji na họntọn towe lẹ nugbo, amọ́ yé nasọ yọ́n we di mẹklọtọ. Eyin a nọ klọ mẹjitọ towe lẹ, e ma na vẹawuna we nado klọ họntọn towe lẹ. Eyin mẹjitọ towe lẹ wá yọnẹn, e na vẹna yé bọ yé na mọdọ a zan emi, podọ e yọnbasi dọ yé ni dosẹ́n tintọ́n tọn na we!—Howhinwhẹn lẹ 12:15.

 2. N’MA NA BIỌGBÈ—N’NA GBỌ BO HÒNÚPLA

Nuhewutu a gán lẹnmọ: A lẹnnupọndo filọ yìyì ji bo wá tadona kọ̀n dọ nuwiwa lọ ma sọgbe hẹ nujinọtedo towe lẹ kavi dọ mẹhe na wá otẹn lọ mẹ delẹ ma na yin ogbẹ́ dagbe. (1 Kọlintinu lẹ 15:33; Filippinu lẹ 4:8) To alọ devo mẹ, e gán jlo we fẹẹ dọ a ni yì, amọ́ a ma gboadọ nado biọgbè mẹjitọ towe lẹ.

Kọdetọn lẹ: Eyin a ma yì, na a yọnẹn dọ e ma sọgbe wutu, obu ma na di we nado dọ nue zọ́n lọ na họntọn towe lẹ. Ṣigba, eyin a ma yì, na a ma gboadọ nado biọgbè mẹjitọ towe lẹ wutu, a gán sinai to whégbè ṣúdúdú bo na to linlẹn dọ hiẹ kẹdẹ wẹ ma nọ deayidai.

 3. N’NA BIỌGBÈ—BO PỌ́N

Nuhewutu a gán lẹnmọ: A yọnẹn dọ mẹjitọ towe lẹ wẹ tindo aṣẹ do ji we bọ a nọ na sisi pọndohlan yetọn. (Kọlọsinu lẹ 3:20) A yiwanna mẹjitọ towe lẹ bo ma jlo na fìn yì to godo yetọn na a yọnẹn dọ enẹ na hẹn homẹgble yé. (Howhinwhẹn lẹ 10:1) A sọ yọnẹn dọ e yọnbasi nado dọhodeji hẹ yé.

Kọdetọn lẹ: Mẹjitọ towe lẹ na mọdọ a yiwanna yé bosọ nọ si yé. Podọ eyin yé mọdọ obiọ towe sọgbe hẹ lẹnpọn dagbe, yé sọgan nagbè we.

Nuhewutu Mẹjitọ lẹ Sọgan Gbẹ́

Kẹdẹdi nuhọ́tọ huto tọn lẹ, mẹjitọ towe lẹ to otẹn dagbe mẹ nado mọ owùnu lẹ hlan

Apajlẹ de die nado do dopo to whẹwhinwhẹ́n lọ lẹ mẹ hia: Eyin a yì huto, e na jlo we nado lẹtọ̀ to fie nuhọ́tọ lẹ tin te, kavi? Etẹwutu? Na eyin a biọ hùmẹ bo to aihunda, a ma gán yọ́n owù he ja lẹpo. Amọ́, nuhọ́tọ lẹ sọgan yawu doayi owùnu lẹ go hlan olá, na fie yé nọ nọ̀ wutu. Mọdopolọ, mẹjitọ towe lẹ sọgan mọ owùnu he hiẹ ma mọ lẹ, na yé yọnnuin bo tindo numimọ hugan we wutu. Kẹdẹdi nuhọ́tọ huto tọn lẹ, yanwle mẹjitọ towe lẹ tọn ma yin nado glọnalina we ma nado deayidai, amọ́ nado gọalọna we, na a nido dapana owù he na zọ́n bọ a ma na duvivi ogbẹ̀ tọn lẹ.

Whẹwhinwhẹ́n devo die: Ojlo vẹkuvẹku mẹjitọ towe lẹ tọn wẹ nado basi hihọ́na we. Owanyi nọ whàn yé nado yigbe to whenue e yọnbasi podọ nado gbẹ́ to whenue e biọ domọ. Eyin a biọgbè yé nado wà nude, yé nọ kanse yede eyin yé sọgan nagbè we bosọ jiya kọdetọn he e na hẹnwa lẹ tọn. Eyin yé kudeji jẹ obá de mẹ dọ nuylankan de ma na jọ do gowe, whenẹnu wẹ yelọsu na kẹalọyi bo nasọ yigbena we.

Nuhe A Gán Wà bọ E Nado Yọnbasi Dọ Yé Ni Yigbena We

Nuhe a gán wà

Nugbodidọ: Kanse dewe dọ: ‘Naegbọn n’do jei taun? Be nuhe wà gbé mí jei lọ lọsu wẹ to jijlo mí wutu wẹ ya kavi na yẹnlọsu jlo na biọ gbẹ́mẹ poun wutu wẹ? Be na mẹhe sin onú nọ jẹ ṣie ji de na to otẹn lọ mẹ wutu wẹ ya?’ Eyin mọ wẹ, bo dọ nugbo na mẹjitọ towe lẹ. Yelọsu ko yin jọja pọ́n, podọ yé yọ́n we ganji. Enẹwutu, to aliho de kavi devo mẹ, yé gán yọ́n nuhe to ahun towe mẹ taun. Yé na yọ́n pinpẹn nugbodidọ towe tọn, podọ a na mọaleyi sọn nuyọnẹn yetọn mẹ. (Howhinwhẹn lẹ 7:1, 2) To alọ devo mẹ, eyin a ma nọ dọ nugbo, yé ma na dejido gowe sọmọ ba, podọ e na vẹawu dọ yé ni nọ nagbè we.

Whenue a na dọho: Ma nọ jẹ kọ̀ji na mẹjitọ towe lẹ nado biọgbè tlolo he yé gọ̀ sọn azọ́nmẹ kavi whenue whẹho devo lẹ to ahunmẹduna yé blo. Nọ dọnsẹpọ yé to whenue yé voawu. Amọ́, ma nọte kakajẹ ogàn godo tọn mẹ whẹpo do jẹ kọgbidina yé ji nado mọ gblọndo sọn yé si blo. E ma na vivi na mẹjitọ towe lẹ eyin a do ṣọ̀ṣọ̀ na yé nado yawu basi nudide. Yawu biọgbè, bo na yé whenu nado lẹnnupọn.

Nuhe a na dọ: Obiọ towe ni họnwun. Dọ nuhe dín a te tlọlọ. To whenue mẹjitọ lẹ kanse we dọ: “Mẹnu lẹ wẹ ja otẹn lọ mẹ?,” “Mẹho he whèwhín de na to finẹ ya?,” kavi “Whetẹnu a na lẹkọ?,” eyin a nọ gblọn dọ “N’ma yọnẹn,” ayiha yetọn ma na jai.

Pọndohlan he a dona tindo: A yí mẹjitọ towe lẹ do mọ kẹntọ blo. Nọ pọ́n yé hlan di azọ́nwatọgbẹ́, na nuhe yé yin na we nugbo niyẹn. Eyin a nọ pọ́n mẹjitọ towe lẹ hlan taidi azọ́nwatọgbẹ́ lẹ, e na vẹawu dọ a ni dọnnu hẹ yé, podọ yelọsu na nọ yawu kọngbedopọ hẹ we.

Dohia mẹjitọ towe lẹ dọ a whèwhín jẹ obá lọ mẹ nado kẹalọyi nudide yetọn bo na sisi i. Eyin a wàmọ, yelọsu na yọ́n otẹn towe mẹ na we. Podọ to whedevonu, e yọnbasi dọ yé ni lẹnnupọndo aliho he mẹ yé na yigbena we te lẹ ji.